Azərbaycanın və Türkiyənin daxili işlər orqanları arasında əlaqələrin inkişafı məsələləri müzakirə edilib

Bakı:

22 °C

62 %

7 m/s

AZ RU EN

Ana səhifə / Siyasət / Azərbaycanın və Türkiyənin daxili işlər orqanları arasında əlaqələrin inkişafı məsələləri müzakirə edilib

Azərbaycanın və Türkiyənin daxili işlər orqanları arasında əlaqələrin inkişafı məsələləri müzakirə edilib

04.04.2014 [09:01]

Aprelin 3-də Azərbaycan Respublikasının daxili işlər naziri, general-polkovnik Ramil Usubov ölkəmizdə səfərdə olan Türkiyə Silahlı Qüvvələrinin Baş Qərargah rəisi, ordu generalı Necdet Özel ilə görüşüb.
Daxili İşlər Nazirliyinin mətbuat xidmətindən AzərTAc-a bildiriblər ki, qonağı səmimiyyətlə salamlayan nazir Ramil Usubov Azərbaycanın dövlət müstəqilliyini bərpa etdikdən sonra qazandığı ən böyük dəyərlər sırasında qardaş Türkiyə ilə əlaqələrin inkişafını önə çəkib, Ümummilli lider Heydər Əliyevin bu sahədəki xidmətlərini, Ulu öndərin “Bir millət, iki dövlət” siyasətinin dövlətimizin başçısı İlham Əliyev tərəfindən uğurla həyata keçirildiyini xatırladıb.
General-polkovnik Ramil Usubov iki dost və qardaş ölkənin daxili işlər orqanları arasında mövcud olan işgüzar əlaqələrdən, Türkiyə Jandarm Komandanlığının Azərbaycan Daxili İşlər Nazirliyinin Daxili Qoşunlarına göstərdiyi maddi-texniki yardımdan, kadr hazırlığı sahəsindəki rolundan bəhs edib. Qonağın bundan öncə Türkiyə Jandarm Qüvvələrinin baş komandanı vəzifəsində çalışdığı dövrdə həmin məsələyə xüsusi həssaslıqla və diqqətlə yanaşdığını məmnunluqla xatırladan nazir göstərilən hərtərəfli dəstəyə və yardıma görə Türkiyə tərəfinə, şəxsən Necdet Özelə minnətdarlığını bildirib.
Ramil Usubov bu səfərin əlaqələrimizin inkişafına təkan verəcəyinə, iki qardaş dövlətin müvafiq qurumları arasında əməkdaşlığın potensial imkanlarından bundan sonra da səmərəli istifadə olunacağına əminliyini ifadə edib.
Daha sonra nazir kriminogen durum barədə qısa məlumat verib, Azərbaycan Respublikasının Prezidenti İlham Əliyevin rəhbərliyi altında ölkəmizin son illərdəki sürətli inkişafını şərtləndirən əsas amillərdən olan sabitliyin yaradıldığını və dönməzliyinin təmin olunduğunu bildirib. Daxili işlər naziri bunun ilk növbədə, vətəndaşlarımızın, həmçinin əcnəbilərin təhlükəsiz, əmin-amanlıq şəraitində yaşayıb fəaliyyət göstərmələrinə, külli miqdarda xarici sərmayənin Azərbaycan iqtisadiyyatına qoyulmasına əlverişli şərait yaratdığını diqqətə çatdırıb.
Problemlərə toxunan Ramil Usubov transmilli mütəşəkkil cinayətkarlığın bütün forma və təzahürlərinə, o cümlədən terrorçuluq, narkotiklərin qanunsuz dövriyyəsi, qeyri-qanuni miqrasiya və insan alveri ilə yalnız birgə səylərlə mübarizə aparılmasının mümkünlüyünü vurğulayıb.
Türkiyə Silahlı Qüvvələrinin Baş Qərargah rəisi, ordu generalı Necdet Özel dost və qardaş Azərbaycanda yenidən olmağından məmnunluğunu bildirib, iki ölkənin aidiyyəti orqanları, o cümlədən Silahlı Qüvvələrin müvafiq qurumları arasındakı faydalı işbirliyini yüksək qiymətləndirib və bu əlaqələrin inkişafı üçün səylərini bundan sonra da əsirgəməyəcəyini qeyd edib.
Görüşdə Türkiyənin ölkəmizdəki səfiri İsmayıl Alper Coşqun iştirak edib.

Paylaş:

Baxılıb: 825 dəfə