Siyavuş Novruzov: “Müsavat”ın böyük bir hissəsi İsa Qəmbəri yenidən başqan görmək istəmir

Bakı:

21 °C

88 %

6 m/s

Əlaqə

AZ RU EN

Ana səhifə / Siyasət / Siyavuş Novruzov: “Müsavat”ın böyük bir hissəsi İsa Qəmbəri yenidən başqan görmək istəmir

Siyavuş Novruzov: “Müsavat”ın böyük bir hissəsi İsa Qəmbəri yenidən başqan görmək istəmir

12.04.2014 [09:55]

“Müsavat”ın yeni başqanının kim olacağı, ilk növbədə, “Müsavat”çıların özlərinin seçimindən asılı olan məsələdir”. Bunu Gün.Az-a açıqlamasında Yeni Azərbaycan Partiyası (YAP) İcra katibinin müavini, millət vəkili Siyavuş Novruzov Müsavat Partiyasında keçirilməsi gözlənilən növbəti qurultay və bu qurultayda yeni başqanın seçilməsi məsələsi ilə bağlı həmin partiyanın daxilində baş verənlərə, o cümlədən, bu məsələ ətrafında mediada yer alan ehtimallara münasibət bildirərkən dilə gətirib.
Onun sözlərinə görə, Müsavat Partiyası, xüsusilə, partiyanın indiki başqanı və rəhbərlikdə olan bəzi şəxslər növbəti qurultayın keçirilməsində maraqlı deyillər. Məhz bu səbəbdən də onlar müxtəlif bəhanələrlə, şoularla qurultaydan və ya qurultay üçün təklif olunan yerlərdən imtina etməyə, qurultayın keçirilmə vaxtını uzatmağa çalışırlar: “Xatırladım ki, hələ il yarım-iki il bundan öncə bunlar qurultay keçirməklə bağlı fikir irəli sürməyə, qurultay nümayəndələrini seçməyə başladılar, ancaq sonradan bəhanələri də bu oldu ki, guya Bakı şəhər İcra Hakimiyyəti tərəfindən “Müsavat”çılara qurultay üçün münasib yer ayrılmır”.
S.Novruzov onu da əlavə edib ki, istənilən bir qurumla müqavilə bağlayıb, tədbir, qurultay keçirmək mümkündür: “Məsələn, YAP bütün tədbirlərini ayrı-ayrı hotellərdə və ya ayrı-ayrı özəl müəssisələrdə keçirir. Müqavilə bağlayır, pulu ödəyir və tədbirimizi keçiririk. Nə Bakı şəhər İcra Hakimiyyətinə, nə Mədəniyyət və Turizm Nazirliyinə, nə də hər hansı bir quruma tədbir keçirmək üçün müraciət etmirik. Yenə deyirəm, ayrı-ayrı özəl müəssisələrlə müqaviləmizi bağlayıb tədbirlərimizi keçiririk. Bunların, İsa Qəmbər tərəfdarlarının bəhanələri isə tamam başqadır və məsələ də, əslində, ondan ibarətdir ki, (hətta bizə də yerlərdən məlumatlar daxil olur) Müsavat Partiyasının özünün böyük bir hissəsi İsa Qəmbərin yenidən başqan olmasını istəmir. Bu da heç şübhəsiz İsa Qəmbərə və onun tərəfdarlarına sərf etmir”.
YAP İcra katibinin müavini bildirib ki, əgər qurultay zamanı başqanlıqla bağlı seçki, səsvermə düzgün keçirilsə, İ.Qəmbər yenidən “Müsavat” başqanı seçilə bilməyəcək: “Ancaq təbii ki, saxtalaşdırma olsa, o, yenidən başqan seçiləcək. Necə ki, Müsavat Partiyası Gənclər Təşkilatının yeni sədri məhz saxtalaşdırma nəticəsində həmin posta seçildi. Bu da birbaşa “Müsavat” başqanının yardımı, dəstəyi və təzyiqi nəticəsində baş verdi. Hər halda bunu da biz deyil, Müsavat Partiyası Gənclər Təşkilatının bəzi üzvləri özləri açıq şəkildə etiraf edir və təsdiqləyirlər. Onlar özləri bu yöndə mətbuatda bir sıra açıqlamalarla çıxış ediblər. Ona görə İsa Qəmbər və onun azsaylı tərəfdarları “Müsavat”ın növbəti qurultayının keçirilməsində maraqlı deyillər və qurultaydan yayınmaq üçün müxtəlif bəhanələr uydururlar”.
S.Novruzov onu da deyib ki, “Müsavat” başqanlığına bir sıra iddialı şəxslər var və onlar artıq öz iddialarını ortaya qoyublar: “Onların da hər biri təbii ki, özlərinin başqan seçilməsini istəyir və bu zaman da bir-birlərinə qarşı açıq şəkildə savaş açmaqdan çəkinmirlər. Ümumiyyətlə, dünyanın hər yerində də belədir ki, bir partiya sədri hansısa bir seçkidə qalib gəlmirsə, uduzursa, o zaman vəzifəsindən istefa verir, siyasətdən gedir, yerini başqasına verir. İsa Qəmbər isə 1990-cı ildən bu yana heç bir seçkidə qalib gələ bilməyib. Sadəcə, 1990-cı ilin parlament seçkilərində keçmiş prezident Ayaz Mütəllibovun siyahısı ilə o zamankı Ali Sovetə deputat seçilib, ondan sonrakı bütün seçkiləri uduzub. Özü də onun namizəd olduğu dairənin bütün məntəqələrində beynəlxalq müşahidəçilər olub və həmin müşahidəçilər özləri də şahid olublar ki, seçkilər tam demokratik, azad, ədalətli, şəffaf şəkildə keçirilib. Yəni, demokratik, azad, ədalətli seçkilərdə İsa Qəmbər uduzub, seçicilər tərəfindən dəstəklənməyib. Ancaq buna baxmayaraq, 20 ildən çoxdur ki, “Müsavat”ın başqanlığından getmir. Ona görə artıq Müsavatda da belə düşünürlər ki, bu adam partiyanı getdikcə geriyə aparır və “Müsavat” tamam iflasa doğru gedir. Bu baxımdan da istəyirlər ki, partiyadaxili dəyişikliklər etsinlər, yeni başqan seçsinlər. Ancaq bütün hallarda, dediyim kimi, seçim “Müsavat”ın özünündür”.

Paylaş:

Baxılıb: 972 dəfə