Ombudsmanların XII Bakı Beynəlxalq konfransının iştirakçıları Quba Soyqırımı Memorial Kompleksini ziyarət ediblər

Bakı:

24 °C

54 %

3 m/s

AZ RU EN

Ana səhifə / Siyasət / Ombudsmanların XII Bakı Beynəlxalq konfransının iştirakçıları Quba Soyqırımı Memorial Kompleksini ziyarət ediblər

Ombudsmanların XII Bakı Beynəlxalq konfransının iştirakçıları Quba Soyqırımı Memorial Kompleksini ziyarət ediblər

21.06.2014 [11:07]

Ombudsmanların XII Bakı Beynəlxalq konfransının iştirakçıları iyunun 20-də Quba Soyqırımı Memorial Kompleksini və ərazidəki kütləvi məzarlığı ziyarət ediblər.
AzərTAc xəbər verir ki, ziyarətə gəlmiş konfrans iştirakçıları arasında Avropa, Asiya, Amerika qitələrinin 15-dən çox ölkəsindən ombudsmanlar və onların nümayəndələri, insan hüquqları sahəsində ekspertlər, beynəlxalq təşkilatların təmsilçiləri və hüquqşünas alimlər olublar.
Beynəlxalq konfransın iştirakçılarının diqqətinə çatdırılıb ki, Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkar edilib. Bundan sonra Azərbaycan Milli Elmlər Akademiyasının Arxeologiya və Etnoqrafiya İnstitutunun əməkdaşları tərəfindən kütləvi məzarlıqda geniş tədqiqat işləri aparılıb. Tədqiqatlar nəticəsində məzarlığın 1918-ci ildə ermənilərin yerli dinc əhaliyə qarşı törətdikləri soyqırımı ilə bağlı olduğu müəyyən edilib.
Ziyarətçilərə məlumat verilib ki, Quba Soyqırımı Memorial Kompleksi Heydər Əliyev Fondunun dəstəyi ilə yaradılıb və 2013-cü il sentyabrın 18-də açılışı olub. Diqqətə çatdırılıb ki, kompleksdə XX əsrin əvvəllərində Quba şəhərinin müxtəlif ərazilərinin görüntüləri, o zaman burada aparılan tikinti-quruculuq işləri, əhalinin həyat tərzi haqqında fotolar var. Kompleksdə quraşdırılmış sensor ekranlı monitordakı xüsusi xəritədə ermənilərin ötən əsrdə xalqımıza qarşı respublikamızın müxtəlif bölgələrində həyata keçirdikləri soyqırımı aktları barədə bir neçə dildə məlumat əldə etmək mümkündür. Burada, həmçinin Quba, Cavad, Göyçay, Şamaxı və Bakı qəzaları barədə və bu qəzalarda ermənilərin törətdikləri vəhşiliklər haqqında dolğun məlumatlar var.
Məzarlığı ziyarət edən Türkiyə nümayəndə heyətinin üzvü Serpil Çakın jurnalistlərə açıqlamasında burada gördüklərindən təsirləndiyini bildirib. O qeyd edib ki, müasir dövrdə, ümumilikdə, soyqırımı olmamalıdır. Türkiyəli qonaq deyib ki, bəzi xalqlar onlara qarşı soyqırımı törədildiyini iddia edirlər, biz isə burada faktı gördük.
Rusiyanın Orenburq vilayətinin ombudsmanı Anatoli Çadov isə bildirib ki, onların vəzifəsi dünyada bu cür halların təkrarlanmasının qarşısını almaqdan ibarətdir və bunun üçün birlikdə fəaliyyət göstərmək lazımdır.

Paylaş:

Baxılıb: 769 dəfə