Dostluğun və qardaşlığın zəfər günü

Bakı:

22 °C

60 %

5 m/s

Əlaqə

AZ RU EN

Ana səhifə / Siyasət / Dostluğun və qardaşlığın zəfər günü

Dostluğun və qardaşlığın zəfər günü

16.09.2014 [09:37]

Sentyabrın 15-də Türkiyə Respublikasının Azərbaycandakı səfirliyində Bakının erməni-daşnak və bolşevik qüvvələrindən azad edilməsinin 96-cı ildönümünə həsr olunan tədbir keçirilib.
AzərTAc xəbər verir ki, tədbirdə Milli Məclisin deputatları, Bakıda akkreditə olunmuş diplomatik korpusun nümayəndələri, tarixçi alimlər, tədqiqatçılar iştirak ediblər.
Türkiyənin ölkəmizdəki səfiri İsmail Alper Coşkun 96 il əvvəl türk və Azərbaycan ordusunun çiyin-çiyinə vuruşaraq qəhrəmanlıqlar göstərdiyini vurğulayıb. Diplomat Osmanlı imperiyasının çətin dövr yaşamasına baxmayaraq, öz borcunu yerinə yetirdiyini, Türkiyədə qardaş ölkəyə kömək etmək məqsədilə Qafqaz İslam Ordusu yaradıldığını qeyd edib. 1918-ci ilin 15 sentyabrını dostluq və qardaşlığın zəfər günü, ortaq türk tarixinin şanlı səhifəsi, birliyin təntənəsi kimi səciyyələndirən səfir İsmail Alper Coşkun bildirib ki, bu fədakarlıqları gələcək nəsillərə ötürmək və dünyaya bəyan etmək hər bir türkün borcudur.
Sonra Qafqaz İslam Ordusunun kəşməkəşli, eyni zamanda, şərəfli və xilaskar yürüşünü əks etdirən sənədli film nümayiş olunub.
Tədbirdə Azərbaycan Milli Elmlər Akademiyası (AMEA) A.A.Bakıxanov adına Tarix İnstitutunun direktoru, Milli Məclisin deputatı, AMEA-nın müxbir üzvü Yaqub Mahmudov çıxış edərək 1918-ci il 15 sentyabr hadisələrinin tarixi əhəmiyyətindən, baş vermə şəraitindən və nəticələrindən danışıb.
Yaqub Mahmudov Azərbaycanın bölgələr üzrə Qafqaz İslam Ordusu tərəfindən azad edilməsi ardıcıllığını diqqətə çatdırıb. O, Bakının azad edildiyi günün Azərbaycan xalqının tarixində əlamətdar hadisə olduğunu və bununla da dövlətçiliyimizin bərpa edildiyini vurğulayıb.
Tarixçi alim bildirib ki, 96 il bundan əvvəl sentyabrın 16-da Bakının azad edilməsi münasibətilə türk-Azərbaycan hərbi hissələrinin şanlı paradı keçirilib. Qafqaz İslam Ordusunun yaradılmasından və ordunun hərbi fəaliyyətindən danışan Y.Mahmudov Bakının azad edilməsində Nuru Paşanın rəhbərliyi ilə türk qoşunlarının böyük xidmətlərini xüsusilə qeyd edib. Alim bildirib ki, türk birliyinin təcəssümü, iki ölkənin tarixi dostluğunun və qardaşlığının təntənəsi olan bu hadisə bizim üçün böyük fəxrdir. Məhz Qafqaz İslam Ordusunun Bakıya gəlməsi ilə Azərbaycanın erməni quldurlarından, bolşeviklərdən təmizlənməsinə başlanılıb və bununla da, xalqımız növbəti soyqırımından qurtulub.
Azərbaycan və Türkiyə bayraqlarının daim yanaşı dalğalandığını, xalqlarımızın çətin dövrlərdə həmişə bir-birinin yanında olduğunu qeyd edən Y.Mahmudov iki ölkənin ortaq tarixinin yazılmasının vacibliyini vurğulayıb, Azərbaycanın və Türkiyənin tarixçi alimlərinin artıq bu istiqamətdə birgə fəaliyyətə başladıqlarını diqqətə çatdırıb.
Digər çıxış edənlər də daşnakların və bolşeviklərin Azərbaycan ərazisində törətdikləri soyqırımlarından, Qafqaz İslam Ordusunun xidmətlərindən danışıblar. Bildirilib ki, Bakının ən yüksək yerində bu ordunun şərəfinə abidə ucaldılıb.
Tədbir çərçivəsində Qafqaz İslam Ordusunun zəfər yürüşünün 96-cı ildönümünə - Bakının erməni-daşnak və bolşevik qüvvələrindən azad edilməsinə həsr olunan sərgi keçirilib.
Sonda “Qafqaz İslam Ordusu və Bakının işğaldan azad edilməsi” mövzusunda yazı müsabiqəsinin qalibləri mükafatlandırılıblar.

Paylaş:

Baxılıb: 872 dəfə