Siyavuş Novruzov: Yalan xəbər yayanlara qarşı cəza sərtləşdiriləcək

Bakı:

18 °C

88 %

4 m/s

Əlaqə

AZ RU EN

Ana səhifə / Siyasət / Siyavuş Novruzov: Yalan xəbər yayanlara qarşı cəza sərtləşdiriləcək

Siyavuş Novruzov: Yalan xəbər yayanlara qarşı cəza sərtləşdiriləcək

30.09.2014 [09:19]

“Bu Sərəncam çox vacib və əhəmiyyətli sənəddir”. Bunu Publika.az-a açıqlamasında Yeni Azərbaycan Partiyası (YAP) İcra katibinin müavini, Milli Məclisin Təhlükəsizlik və müdafiə komitəsinin üzvü Siyavuş Novruzov Prezident İlham Əliyevin imzaladığı “Azərbaycan Silahlı Qüvvələrinin Ermənistan Silahlı Qüvvələri ilə təmas xəttində bəzi təhlükəsizlik tədbirləri haqqında” Sərəncama münasibət bildirərkən deyib.
Onun sözlərinə görə, Sərəncamda əks olunan əsas məsələlərdən biri də cəbhəyanı ərazilərdə yerli əhalidən ibarət patrul xidmətinin yaradılması ilə bağlıdır: “Bu çox önəmli məsələdir. Bu, həm də Azərbaycana düşmən tərəfindən hər hansı bir təxribat və diversiya cəhdlərinin qarşısının alınmasında yeni bir mərhələ hesab olunur. Yəni, cəbhəyanı ərazidə yaşayan əhali o zonanın mövcud şəraitini və relyefini kənar ərazilərdən gələn adamlardan daha yaxşı bilir. Ona görə də yerli əhali arasından patrul xidmətinə cəlb olunması düşmən cəhdlərinin qarşısının alınmasında mühüm rol oynayacaq”.
Millət vəkili deyib ki, bu Sərəncamda yer alan digər vacib məsələ isə cəbhəyanı ərazilərdə mövcud olan ictimai və dövlət əhəmiyyətli, xüsusilə də hərbi obyektlər barədə məlumatların düşməndən gizli saxlanılması və düşmənə ötürülməməsi ilə bağlıdır: “Yəni, düşmən tərəfi bütün bu obyektlərin sıradan çıxarılması məqsədi güdərsə, o zaman onların qarşısını almaq üçün də bu Sərəncamda müvafiq göstərişlər əksini tapır. Bundan əlavə, Sərəncamda KİV-lərin dövlətin kəşfiyyat, əks-kəşfiyyat, hərbi, döyüş və müdafiə məsələləri ilə bağlı xəbərlərin yayılması zamanı Müdafiə Nazirliyinin mətbuat xidməti ilə razılaşdırılma aparılması ilə bağlı da məsələ yer alır. Yəni, Azərbaycan ordusu və təmas xəttində baş verən vəziyyətlə bağlı erməni KİV-də yayılmış məlumatları vermək doğru deyil. Bütün bunlar isə çox vacib əhəmiyyət kəsb edir. Sərəncamda yer alan digər məsələlər də cəmiyyət üçün aktualdır”.
S.Novruzov bildirib ki, sözügedən Sərəncamdan irəli gələrək “Dövlət sirri haqqında” Qanuna bir sıra əlavə və dəyişikliklər edilməsi gözlənilir: “Milli Məclisin payız sessiyasında bu məsələyə baxılacaq və yalan informasiya yayanlara qarşı qanunda nəzərdə tutulan cəza sərtləşdiriləcək. Çünki cənab Prezident bu Sərəncamla mövcud olan bəzi qanun boşluqlarının aradan qaldırılmasına hüquqi baza yaratdı. Ona görə də, “Dövlət sirri haqqında” Qanuna əlavə və dəyişikliklər olacaq. Cənab Prezidentin imzaladığı sözügedən Sərəncamda yer alan məsələlər isə həmin qanunda öz əksini tapacaq”.

Paylaş:

Baxılıb: 636 dəfə