Dağlıq Qarabağ münaqişəsi ilə bağlı həqiqətləri dünya ictimaiyyətinə çatdıracaq saytın təqdimatı olub

Bakı:

26 °C

63 %

2 m/s

AZ RU EN

Ana səhifə / Siyasət / Dağlıq Qarabağ münaqişəsi ilə bağlı həqiqətləri dünya ictimaiyyətinə çatdıracaq saytın təqdimatı olub

Dağlıq Qarabağ münaqişəsi ilə bağlı həqiqətləri dünya ictimaiyyətinə çatdıracaq saytın təqdimatı olub

23.09.2015 [10:25]

Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə “Düşüncə” Gənclərin İnkişafına Dəstək” İctimai Birliyi tərəfindən hazırlanmış www.dailykarabakh.com saytının sentyabrın 22-də təqdimatı olub.
AZƏRTAC xəbər verir ki, əvvəlcə sayt haqqında videoçarx nümayiş etdirilib. Bildirilib ki, saytın yaradılmasında məqsəd Ermənistan-Azərbaycan, Dağlıq Qarabağ münaqişəsi ilə bağlı həqiqətləri müxtəlif dillərdə dünya ictimaiyyətinə çatdırmaqdır. Azərbaycan, rus, ingilis, alman və fransız dillərində fəaliyyət göstərəcək saytda Dağlıq Qarabağ münaqişəsinin tarixi, mövcud vəziyyəti, problemin həlli istiqamətində görülən işlərlə bağlı materiallar yerləşdiriləcək.
Tədbirdə çıxış edən QHT-lərə Dövlət Dəstəyi Şurasının sədri, Milli Məclisin deputatı Azay Quliyev deyib ki, Dağlıq Qarabağ münaqişəsi ilə bağlı reallıqların yayılması məsələsi hər zaman diqqət mərkəzində olmalıdır. Münaqişəyə dair həqiqətlərin dünya ictimaiyyətinə çatdırılmasında dövlətlə yanaşı, vətəndaş cəmiyyəti qurumları da fəal işləməlidir.
Bildirilib ki, bu gün dünya dəyişib və artıq Ermənistandakı cinayətkar rejimi hamı tanıyır. Hazırda Azərbaycan həqiqətləri dünyaya çatdırılır və təbii ki, bu işdə Prezident İlham Əliyevin böyük xidmətləri var.
A.Quliyev deyib: “Fəaliyyətimizin əsas xəttini Dağlıq Qarabağ münaqişəsinə dair həqiqətlərin beynəlxalq ictimaiyyətə çatdırılması təşkil edir. Dağlıq Qarabağ problemi ilə bağlı həqiqətlərin dünyada yayılmasında qeyri-hökumət təşkilatlarının da mühüm rolu var. Yeni fəaliyyətə başlayan sayt da bu işə öz töhfəsini verəcək”.
Azərbaycan Respublikası Prezidenti Administrasiyasının İctimai-siyasi məsələlər şöbəsinin sektor müdiri Elman Paşayev deyib ki, Dağlıq Qarabağ münaqişəsi başlayandan indiyədək Azərbaycan informasiya blokadasından çıxmaq üçün böyük işlər görüb. O bildirib ki, istənilən münaqişədə informasiya müharibəsi əsas rol oynayır. Biz uzun müddət informasiya blokadasında qalmağımızla bağlı geniş müzakirələr aparmışıq, çıxış yolları axtarmışıq. Nəhayət, Ümummilli lider Heydər Əliyev siyasi hakimiyyətə qayıtdıqdan sonra bu istiqamətdə böyük irəliləyişlərə nail olduq.
Sektor müdiri altı-yedi ay bundan əvvəl Qarabağ haqqında saytların monitorinqini apardıqlarını diqqətə çatdıraraq deyib: “Monitorinq zamanı məlum oldu ki, bu saytlar müəyyən dövrdən sonra fəaliyyətlərini dayandırır. Buna səbəb isə maliyyə mənbələrinin az olmasıdır. İnformasiya Texnologiyaları İnstitutu, Gənclər və İdman Nazirliyi, Rabitə və Yüksək Texnologiyalar Nazirliyi tərəfindən yaradılan portal, www.kharabag.com saytı indi də fəaliyyət göstərir. Ancaq indiyədək Qarabağla bağlı informasiyalar yalnız ayrı-ayrı saytların tərkibində yaradılıb. Qeyri-Hökumət Təşkilatlarına Dövlət Dəstəyi Şurası ötən il beş belə saytın yaradılmasına dəstək verib. İndi isə Qarabağ haqqında ayrıca bir saytın yaradılması çox sevindirici haldır. Saytda yerləşdiriləcək materialların təsirli olması, xüsusilə xarici ekspertlərin məqalələrinin yayılması önəmlidir. İnanıram ki, biz Azərbaycanın haqq işini dünyaya çatdırmaqda bu saytın işindən də yararlanacağıq”.
“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədri Bayram Səfərov Ermənistan rəhbərliyinin qeyri-konstruktiv mövqeyi ucbatından Dağlıq Qarabağ münaqişəsinin indiyədək həll edilmədiyini bildirib. O, Azərbaycanın işğal edilmiş torpaqlarının gec-tez geri qaytarılacağına əminliyini bildirib. B.Səfərov Ermənistan rəhbərliyinin yarıtmaz siyasəti nəticəsində bu ölkənin iflasa uğradığını diqqətə çatdırıb.
Milli Məclisin deputatları Bəxtiyar Əliyev, İlyas İsmayılov, Beynəlxalq Avrasiya Mətbuat Fondunun sədri Umud Mirzəyev çıxış edərək Qarabağ həqiqətlərinin dünya ictimaiyyətinə çatdırılması istiqamətində görülən işlərdən danışıblar, belə saytların fəaliyyət göstərməsinin önəmini vurğulayıblar.
“Düşüncə” İctimai Birliyinin sədri, saytın rəhbəri Emil Hüseynli yeni portalın fəaliyyəti haqqında məlumat verib. Bildirib ki, əsasən xarici dilli oxucular üçün nəzərdə tutulan bu saytda Azərbaycanın və dünyanın tanınmış ekspertlərinin, analitiklərin və politoloqların fikirlərinə, məqalələrinə də yer veriləcək.

Paylaş:

Baxılıb: 610 dəfə