Bakıda MDB və Baltikyanı dövlətlərin dəmiryolçularının həmkarlar ittifaqı təşkilatları üçün seminar keçirilir

Bakı:

29 °C

57 %

3 m/s

AZ RU EN

Ana səhifə / Siyasət / Bakıda MDB və Baltikyanı dövlətlərin dəmiryolçularının həmkarlar ittifaqı təşkilatları üçün seminar keçirilir

Bakıda MDB və Baltikyanı dövlətlərin dəmiryolçularının həmkarlar ittifaqı təşkilatları üçün seminar keçirilir

01.10.2015 [10:33]

Sentyabrın 30-da Bakıda MDB və Baltikyanı dövlətlərin dəmiryolçularının həmkarlar ittifaqı təşkilatları üçün seminar işə başlayıb.
AZƏRTAC xəbər verir ki, iki günlük seminarda Beynəlxalq Əmək Təşkilatının (BƏT), Nəqliyyatçıların Beynəlxalq Federasiyasının və Dəmiryolçuların Həmkarlar İttifaqları Beynəlxalq Konfederasiyasının, MDB və Baltikyanı ölkələrin həmkarlar ittifaqı təşkilatının nümayəndələri iştirak edirlər.
Azərbaycan Həmkarlar İttifaqları Konfederasiyasının (AHİK) sədri, Milli Məclisin deputatı Səttar Mehbalıyev seminarın açılışında çıxış edərək onun əsas mövzusunun “Transmilli şirkətlərdə və şəxsi müəssisələrdə həmkarlar ittifaqı təşkilatlarının yaradılması (BƏT-in 87-ci və 98-ci konvensiyalarının icrası)” olduğunu deyib. O bildirib ki, qlobal iqtisadi böhrana baxmayaraq Azərbaycanda sosial və ictimai-siyasi mühit stabildir. Son illərdə respublikamızdakı sosial-iqtisadi inkişaf, ölkənin ictimai-siyasi həyatında baş verən dəyişikliklər həmkarlar ittifaqlarının dövlətlə və işəgötürənlərlə münasibətlərini daha da yaxşılaşdırıb. Azərbaycan Həmkarlar İttifaqları Konfederasiyası 1,5 milyon üzvdən ibarətdir və 27 sahəni özündə birləşdirir.
Qeyd edilib ki, AHİK-in əsas fəaliyyət istiqamətinə ittifaqların təşkilati strukturunun təkmilləşdirilməsi, üzvlərin sayının artırılması, qanunverici işin yaxşılaşdırılması, sosial əməkdaşlığın inkişafı, təlim-təhsildə innovasiyaların istifadəsi, gənclərin və qadınların üzləşdikləri qanun pozuntuları ilə mübarizənin gücləndirilməsi daxildır. Transmilli şirkətlərdə və şəxsi müəssisələrdə həmkarlar ittifaqı təşkilatlarının yaradılması ilə bağlı problemlərin həlli Azərbaycan Həmkarlar İttifaqları Konfederasiyasının prioritet istiqamətidir. Konfederasiyanın ikinci və üçüncü qurultaylarında transmilli şirkətlərdə təşkilati işlərin gücləndirilməsi məsələləri müzakirə olunub. Buna görə də bir çox seminarlar, konfranslar keçirilib, BƏT ilə birgə “Azərbaycanda fəaliyyət göstərən transmilli şirkətlərdə sosial dialoqun təşkili” beynəlxalq layihəsi icra edilib. Bu layihədə on sahə üzrə ittifaqların nümayəndələri iştirak ediblər.
Diqqətə çatdırılıb ki, dünyanın aparıcı neft şirkətlərinin iştirakı ilə imzalanan və reallaşdırılan “Əsrin müqaviləsi” Azərbaycanda fəaliyyət göstərən transmilli şirkətlərdə və şəxsi müəssisələrdə həmkarlar ittifaqı təşkilatlarının yaradılması işinin başlanmasına təkan verdi. Transmilli şirkətlərdə və şəxsi müəssisələrdə həmkarlar ittifaqları neft, ticarət, kənd təsərrüfatı, tikinti, nəqliyyat vasitələri, rabitə, səhiyyə və digər sahələri əhatə edir. Bu gün 3800 transmilli şirkətdə və şəxsi müəssisədə həmkarlar ittifaqları fəaliyyət göstərir. Hər il şəxsi müəssisələrdə 200 yeni həmkarlar ittifaqı yaradılır.
Azərbaycan Dəmiryolçularının Müstəqil Həmkarlar İttifaqları Respublika Komitəsinin sədri Fəzail Bağırov çıxış edərək bildirib ki, bu, Nəqliyyatçıların Beynəlxalq Federasiyasının, Dəmiryolçuların Həmkarlar İttifaqları Beynəlxalq Konfederasiyasının və Beynəlxalq Əmək Təşkilatının birgə keçirdiyi ikinci seminardır.
Qeyd edilib ki, bu gün bütün nəqliyyat sahələrində mühüm təşkilati dəyişikliklər baş verir. Bu da həmkarlar ittifaqlarının fəaliyyətinin prioritet istiqamətlərinə və onların sayının artmasına təsir göstərir. Ona görə də seminarın “Transmilli şirkətlərdə və şəxsi müəssisələrdə həmkarlar ittifaqı təşkilatlarının yaradılması” mövzusuna həsr edilməsi mühüm əhəmiyyətə malikdir. Dünya həmkarlar hərəkatında baş verən yeniliklər və tendensiyalar bizim regionun həmkarlar ittifaqları üçün də mühüm önəm kəsb edir.
Seminarda “BƏT-in 87-ci, 98-ci konvensiyaları, onların əhəmiyyəti, təcrübə və reallaşdırma problemləri”, “Nəqliyyatçıların Beynəlxalq Federasiyasının 43-cü Konqresinin yekunları, onun qərar və qətnamələrinin həyata keçirilməsi proqramı”, “Postsovet ölkələrinin dəmir yollarında həyata keçirilən hüquqi-təşkilati dəyişikliklərin sahə həmkarlar ittifaqı hərəkatına təsiri” və s. mövzularda müzakirələr aparılıb.

Paylaş:

Baxılıb: 620 dəfə