Nardaranda yuva salmış terrorçular zərərsizləşdirildi, qəsəbədə əmin-amanlıq bərpa edildi

Bakı:

29 °C

54 %

1 m/s

Əlaqə

AZ RU EN

Ana səhifə / Siyasət / Nardaranda yuva salmış terrorçular zərərsizləşdirildi, qəsəbədə əmin-amanlıq bərpa edildi

Nardaranda yuva salmış terrorçular zərərsizləşdirildi, qəsəbədə əmin-amanlıq bərpa edildi

02.12.2015 [10:13]

Azərbaycan dövləti terrorçulara, müxtəlif təxribatçı qüvvələrə, onların havadarlarına öz gücünü və qətiyyətini nümayiş etdirdi
Ölkəmizin suverenliyinin qorunması, xalqımızın təhlükəsizliyinin təminatı Azərbaycan dövlətinin əsas prioritetidir. Dünyada tolerantlıq nümunəsi sayılan ölkəmizdə insanların bütün hüquqları ölkə Konstitusiyası ilə qorunur. Digər tərəfdən, Azərbaycan Respublikasının Konstitusiyasında dinin dövlətdən ayrı olduğu təsbit olunub. Bu o deməkdir ki, Azərbaycan İslam dininə inanclı bir ölkə olsa da, sivil, dünyəvi, demokratik ölkə kimi qanunlarla idarə olunur. Məhz bu məqam Azərbaycanda dini çəkişmələrin yaranmasının qarşısını alan böyük amillərdən sayılır.
Təbii ki, Azərbaycanda bu cür yüksək səviyyəli dövlət-vətəndaş münasibətlərinin qurulması, həmçinin ölkəmizin müstəqil siyasət yürütməsi bir sıra terrorçu qüvvələri, ölkədə qarışıqlıq yaratmaq, siyasi sabitliyə xələl gətirmək istəyən ekstremistləri narahat etməyə bilməz.
Bir neçə gün öncə Bakının Nardaran qəsəbəsində yaşanan hadisələri də məhz bu yöndə izah etmək mümkündür. Konkret olaraq terror dəstəsi yaradaraq ölkə qanunlarına qarşı çıxmaq istəyən bir qrup şəxsin zərərsizləşdirilməsi istiqamətində aparılan əməliyyatın məqsədi Nardaranı yuva salmış terrorçulardan və radikal ekstremistlərdən təmizləmək, dövlət orqanlarının fəaliyyətini, eləcə də qəsəbədə mövcud olan mənfi ab-havanı aradan qaldırmaq, əmin-amanlığı və normal həyat ritmini bərpa etməkdir.
Artıq baş verən proseslərin ardından qəsəbədə tədbirlərin həyata keçirilməsinə başlanılıb, küçə və meydanlar radikal dini simvollardan, ekstremist və terrorçuların qurduğu “barrikadalar”dan təmizlənir. Bundan başqa, əməliyyat zamanı insanları itaətsizliyə və müqavimət göstərməyə çağıran terrorçu və ekstremist dəstənin üzvləri gizlənsə də, hazırda onların müəyyənləşdirilməsi və saxlanması istiqamətində tədbirlər davam etdirilir. Təbii ki, hüquqi dövlət olan Azərbaycanda qanunların pozulmasına gətirib çıxaran, xalqımızın, o cümlədən dövlətimizin təhlükəsizliyinə təhdid yaradan terrorçuların məsuliyyətə cəlb edilməsi istiqamətində lazımi addımlar atılacaq. Birmənalı şəkildə qeyd etmək gərəkdir ki, əməliyyat həyata keçirilən zaman ictimai qaydaları pozan, müqavimət və itaətsizlik nümayiş etdirən şəxslər haqqında qanun çərçivəsində tədbirlər görüləcək.
Bundan sonrakı dövrdə Nardaranda hakimiyyət orqanlarının funksiyasının mənimsənilməsi, təxribat törətmək, təhdid və təzyiq vasitəsilə insanları radikallığa və itaətsizliyə məcbur etmək cəhdlərinin qarşısı ən sərt şəkildə alınacaq, Nardaranda qanunların işləməsi təmin ediləcək, qəsəbədə ümumi həyat ritmi bərpa olunacaqdır.
Bir daha vurğulamaq gərəkdir ki, terrorçu dəstənin hüquq-mühafizə orqanlarına qarşı silahlı müqaviməti və bu məsələdə din adı ilə manipulyasiya etməsi yolverilməzdir. Dindən siyasi məqsədlər üçün istifadə edən bu cür terrorçu qruplar ölkəmizin maraqlarına zərbə vurmaqla yanaşı, silahlı qarşıdurmaların yaranmasında maraqlıdırlar.
Azərbaycan dövləti bir daha belə halların baş verməməsi üçün zəruri tədbirləri sona kimi davam etdirməkdə qərarlıdır. Dövlətimiz ekstremistlərə və terrorçulara, müxtəlif təxribatçı qüvvələrə, onların havadarlarına öz gücünü və qətiyyətini nümayiş etdirdi. Azərbaycan dövləti bir daha sübut etdi ki, sabitliyin pozulmasına yönələn bütün addımların qarşısını anındaca almağa hazırdır. Təbii ki, Azərbaycan hüquq-mühafizə orqanlarının apardıqları əməliyyat, eləcə də prosesin davamı bu terrorçu dəstənin bütün üzvlərinin və onları dəstəkləyənlərin qanun qarşısında cavab verməsini təmin edəcək.
Pərviz SADAYOĞLU

Paylaş:

Baxılıb: 700 dəfə