Rauf Əliyev: Qlobal Forum Azərbaycanın beynəlxalq aləmdə növbəti uğurudur

Bakı:

25 °C

69 %

15 m/s

Əlaqə

AZ RU EN

Ana səhifə / Siyasət / Rauf Əliyev: Qlobal Forum Azərbaycanın beynəlxalq aləmdə növbəti uğurudur

Rauf Əliyev: Qlobal Forum Azərbaycanın beynəlxalq aləmdə növbəti uğurudur

29.04.2016 [09:59]

“BMT-nin Sivilizasiyalar Alyansının VII Qlobal Forumu öz işini uğurla başa çatdırdı. Azərbaycan Prezidenti İlham Əliyev Forumun açılış mərasimindəki çıxışında qeyd edib ki, Bakıda BMT-nin Sivilizasiyalar Alyansının VII Qlobal Forumunun keçirilməsi fəaliyyətimizin etirafının və mədəniyyətlərarası dialoq, multikulturalizm dəyərlərinin irəliləməsinin əlamətidir. Ümumiyyətlə, Forum beynəlxalq münasibətlər sistemində mövcud olan ən aktual problemlərin müzakirəsi baxımından böyük əhəmiyyətə malikdir”. Bu fikirləri Milli Məclisin Əmək və sosial siyasət komitəsinin sədr müavini Rauf Əliyev deyib.
R.Əliyev bildirib ki, Azərbaycan bu Foruma ev sahibliyi etməklə həm dünyanın siyasi mərkəzinə çevrildi, həm də ölkəmizin, xalqımızın dünyaya daha yaxından tanıdılması ilə bağlı öz məqsədinə nail oldu. Onun fikrincə, bu mötəbər beynəlxalq tədbirin Bakıda keçirilməsi göstərdi ki, Azərbaycan tolerantlığın məkanı kimi multikultural ənənələrə sadiq, mədəniyyətlərin dialoqunun inkişafına, mədəni müxtəlifliyin qorunub saxlanılması və sivilizasiyalar arasında qarşılıqlı münasibətlərin tənzimlənməsinə yönəlmiş mühüm layihələrin təşkili sahəsində geniş təcrübəyə malik bir ölkəyə çevrilib.
“Forumun yüksək səviyyədə keçirilməsi Azərbaycan dövlətinin beynəlxalq nüfuzunun daha da artırılmasında, xalqımızın tarixi-mədəni irsinin geniş miqyasda tanınmasında böyük rol oynayır. Bakı bu günlər ərzində sivilizasiyalar arasında dialoqun möhkəmləndirilməsi, xalqlar və dövlətlər arasında dostluq, əməkdaşlıq və davamlı inkişafın təşviqi, milli, dini və irqi ayrı-seçkiliyin, dünyada sülh və təhlükəsizliyi təhdid edən neqativ halların aradan qaldırılması, habelə ümumbəşəri əhəmiyyət kəsb edən aktual məsələlərin müzakirə olunduğu, mühüm dünyəvi problemlərin həllinə dəstək məqsədi daşıyan qlobal platformaya çevrilib. Forum çərçivəsində ekstremizmə və terrora qarşı mübarizə, münaqişə zonalarında sülhün bərqərar edilməsi, qlobal miqrasiya, qlobal vətəndaşlıq, nifrətin yayılmaması, təhsil, din, idman, cəmiyyətdə gənclərin rolu, inklüziv cəmiyyətlərin qurulması, multikulturalizm və s. məsələlər müzakirə olunub. Azərbaycan artıq bir neçə ildir ki, ardıcıl olaraq qlobal və regional səviyyəli beynəlxalq tədbirlərə ev sahibliyi edir, bütün dünyanın diqqət mərkəzində olan məsələlərin müzakirə olunduğu mərkəz kimi tanınır. Bütün bu nailiyyətlər Azərbaycan Prezidenti İlham Əliyevin düşünülmüş, müdrik siyasəti nəticəsində Azərbaycanın sosial-iqtisadi inkişaf sahəsində əldə etdiyi yüksək göstəricilər sayəsində əldə olunub. İnanırıq ki, Azərbaycan bundan sonra da bu inkişaf yolunu davam etdirəcək və həmişə mühüm beynəlxalq tədbirlərin keçirildiyi məkan kimi dünyada öz mövqeyini qoruyub saxlayacaq”, - deyə R.Əliyev vurğulayıb.

Paylaş:

Baxılıb: 558 dəfə