Ümumxalq səsverməsi demokratik, şəffaf və seçicilərin yüksək fəallığı şəraitində baş tutub

Bakı:

16 °C

77 %

2 m/s

Əlaqə

AZ RU EN

Ana səhifə / Siyasət / Ümumxalq səsverməsi demokratik, şəffaf və seçicilərin yüksək fəallığı şəraitində baş tutub

Ümumxalq səsverməsi demokratik, şəffaf və seçicilərin yüksək fəallığı şəraitində baş tutub

27.09.2016 [10:11]

Müşahidə missiyaları və xarici KİV referendumun beynəlxalq standartlara uyğun keçirildiyini təsdiq ediblər
Azərbaycan demokratik inkişaf yolunda əmin addımlarla irəliləməkdədir. Həyata keçirilən ardıcıl tədbirlərin qanunauyğun nəticəsi kimi, Azərbaycanda təkmil siyasi sistem bərqərar olunub və hüquqi dövlət quruculuğu istiqamətində əhəmiyyətli nailiyyətlər əldə edilib. Eyni zamanda, ölkəmizdə hüquqi dövlətin təməllərinin möhkəmləndirilməsi istiqamətində islahatlar davamlı xarakter daşıyır. Məhz sentyabrın 26-da keçirilən ümumxalq səsverməsi - referenduma çıxarılan məsələlər də islahatlar kursunun tərkib hissəsini təşkil edir.
Konstitusiya islahatları demokratik inkişaf prosesinə əhəmiyyətli töhfədir
Təsadüfi deyil ki, ekspertlər ümumxalq səsverməsinin inkişafın ortaya çıxardığı reallıqlardan və zərurətdən qaynaqlandığını diqqətə çatdırıblar. Yəni Azərbaycan inkişaf etdikcə yeni reallıqlar və tələblər ortaya çıxıb, bu zamana qədər həyata keçirilən islahatların müasir çağırışlara uyğun olaraq davam etdirilməsi zərurətə çevrilib. Bu baxımdan əminliklə ifadə edilməkdədir ki, Konstitusiya islahatları Azərbaycanın inkişafının davamlı xarakter daşımasına, dövlət müstəqilliyinin möhkəmlənməsinə xidmət etməklə yanaşı, idarəetmənin təkmilləşdirilməsi və demokratik inkişaf prosesinə əhəmiyyətli töhfədir. Təsadüfi deyil ki, dünya ictimaiyyəti də Konstitusiya islahatlarının aparılmasını demokratik inkişaf baxımından təqdirəlayiq hal kimi xarakterizə etmişdi. Bütövlükdə, beynəlxalq ictimaiyyət ölkəmizdə demokratiya və onun başlıca atributları olan vətəndaş cəmiyyəti və hüquqi dövlətin mütləq komponentlərinin təşəkkül tapması və inkişafını, həmçinin demokratik inkişafa xidmət edən davamlı islahatları yüksək qiymətləndirib, Azərbaycanın demokratiya yoluna sadiq olduğunu əminliklə bəyan ediblər. Ümumi qənaət bu olub ki, reallaşdırılan kompleks islahatlar Azərbaycanın dinamik inkişafının, əsaslı ictimai-siyasi sabitliyin davamlı olacağına əminlik yaradır.
Beynəlxalq və yerli müşahidəçilər ciddi qanun pozuntusuna rast gəlinmədiyini qeyd ediblər
Yeri gəlmişkən, sentyabrın 26-da Azərbaycan Respublikasının Konstitusiyasına əlavə və dəyişikliklərlə bağlı keçirilən referendum demokratik, şəffaf və seçicilərin yüksək fəallığı şəraitində baş tutub. Beynəlxalq və yerli müşahidəçilər seçicilərin yüksək fəallığı, referendumun qanunauyğun və yüksək səviyyədə təşkili, Mərkəzi Seçki Komissiyasının, Seçki İnformasiya Mərkəzinin, dairə və məntəqə komissiyalarının fəaliyyəti barədə müsbət fikirlər bildirib, prosesin beynəlxalq standartlara uyğun təşkil olunduğunu, səsvermənin nəticələrinə təsir edə biləcək ciddi qanun pozuntusuna rast gəlinmədiyini xüsusi qeyd ediblər.
Xüsusilə beynəlxalq müşahidəçilər mətbuata açıqlamalarında referendumun demokratik və beynəlxalq standartlara uyğun keçirildiyini təsdiq ediblər. Xarici mətbuat isə Azərbaycanda keçirilən ümumxalq səsverməsinə böyük diqqət göstərib, televiziya kanalları, mətbuatda, internetdə verilən materiallarda referendum yüksək qiymətləndirilib.
“Beşinci kolon”un iddiaları ifşa olunub
Xaricdən idarə olunan “beşinci kolon” faktları təhrif etməklə referendumun guya saxtalaşdırıldığı barədə ictimai rəy formalaşdırmağa cəhd göstərib, heç bir əsası olmayan qərəzli xəbərlər, dezinformasiya yayıb, amma onların iddiaları bütünlüklə ifşa olunub. Əlbəttə, müəyyən qərəzli dairələrin siyasi aləti qismində çıxış edən “beşinci kolon” nümayəndələrinin anti-dövlət və anti-xalq mövqeyində durması təsadüfi deyil, çünki onlar ölkəmizin davamlı islahatlar vasitəsilə öz qüdrəti və nüfuzunu artırmasından narahatlıq keçirərək “qara piar” kampaniyası aparırlar. Buna baxmayaraq, ölkəmiz öz müstəqil inkişaf yolunda əmin addımlarla irəliləyir, eləcə də Azərbaycanda Konstitusiya islahatları xalqın iradəsi əsasında həyata keçirilir, bu islahatların reallaşdırılması yerli hüquqa - milli qanunvericilik sisteminə və ölkəmizin tərəfdar çıxdığı beynəlxalq konvensiyalara uyğundur.
Nurlan QƏLƏNDƏRLİ

Paylaş:

Baxılıb: 553 dəfə