Mixael Link: Azərbaycanda müxtəlif dinlər arasındakı münasibətlər digər ölkələr üçün nümunə ola bilər

Bakı:

20 °C

83 %

6 m/s

AZ RU EN

Ana səhifə / Siyasət / Mixael Link: Azərbaycanda müxtəlif dinlər arasındakı münasibətlər digər ölkələr üçün nümunə ola bilər

Mixael Link: Azərbaycanda müxtəlif dinlər arasındakı münasibətlər digər ölkələr üçün nümunə ola bilər

13.10.2016 [10:08]

Oktyabrın 12-də Milli Məclis sədrinin müavini, Azərbaycanın ATƏT Parlament Assambleyasındakı nümayəndə heyətinin rəhbəri Bahar Muradova ölkəmizdə səfərdə olan ATƏT-in Demokratik Təsisatlar və İnsan Haqları Bürosunun direktoru Mixael Link ilə görüşüb.
AZƏRTAC xəbər verir ki, Bahar Muradova Azərbaycanın bir neçə gündən sonra dövlət müstəqilliyinin bərpasının 25-ci ildönümünü qeyd edəcəyini bildirib. Vurğulayıb ki, belə bir ərəfədə dost dövlətlərdən, eləcə də beynəlxalq təşkilatlardan nümayəndələrin Azərbaycana səfəri olduqca əhəmiyyətlidir.
Görüşdə ötən ay ölkəmizdə keçirilən referendum barədə də söhbət açılıb. Bildirilib ki, referendum zamanı Azərbaycan xalqı Konstitusiyaya təklif olunan mühüm dəyişikliklərə “hə” dedi. Bununla da Azərbaycan müstəqil ölkə kimi yeni bir mərhələyə qədəm qoydu. Konstitusiya islahatları sahəsində atılan bu mühüm addım xalqla ölkə rəhbərliyinin birliyini aydın göstərdi. Referendumda müşahidəçi kimi iştirak edən beynəlxalq təşkilatlar da səsvermənin demokratik, şəffaf şəkildə keçirildiyini təsdiq etdilər.
Bahar Muradova diqqətə çatdırıb ki, Azərbaycan ATƏT-in bütün qurumları ilə qarşılıqlı hörmət və etimada əsaslanan bərabərhüquqlu əməkdaşlığı genişləndirmək niyyətindədir.
Milli Məclis sədrinin müavini dünyada baş verən kataklizmlərin aradan qaldırılması üçün ölkələrin maksimum səy göstərməsinin önəmini qeyd edib. Bildirib ki, bu sahədə Azərbaycanın təcrübəsi, min illərə söykənən birgəyaşayış, dinlərin, mədəniyyətlərin, etnik qrupların sülh və qardaşlıq şəraitində yaşaması çox gözəl örnəkdir. Azərbaycanda multikulturalizm insanların həyat tərzidir.
Azərbaycanın mühüm beynəlxalq tədbirlərin keçirildiyi bir məkana çevrildiyini bildirən Mixael Link V Bakı Beynəlxalq Humanitar Forumunda iştirak etdiyini söyləyib və bu tədbirin əhəmiyyətini qeyd edib. O, ölkəmizə səfəri çərçivəsində “Qeyri-ayrı-seçkilik və tolerantlığın təşviqinə dair dinlərarası dialoq” mövzusunda keçirilən ikigünlük seminarda da iştirak etdiyini bildirib, bu tədbirin məlumat və təcrübə mübadiləsi baxımından əhəmiyyətli olduğunu deyib.
Mixael Link dinlərarası dialoq sahəsində Azərbaycanın qədim tarixinin olduğunu, burada müxtəlif dinlər arasındakı münasibətlərin digər ölkələr üçün nümunə ola biləcəyini vurğulayıb.
Söhbət zamanı Bahar Muradova Milli Məclisin ATƏT Parlament Assambleyasındakı nümayəndə heyətinin üzvü, deputat Tahir Mirkişilinin hazırladığı “Multikulturalizm - demokratik dəyər kimi” mövzusunda layihədən söz açıb və Mixael Linki qurumdakı təqdimat zamanı həmin sənədi dəstəkləməyə çağırıb.

Paylaş:

Baxılıb: 614 dəfə