Beynəlxalq media qurumlarının Bakıda keçirilən tədbirlərini 150-dən çox xəbər agentliyi işıqlandırıb

Bakı:

25 °C

53 %

5 m/s

AZ RU EN

Ana səhifə / Siyasət / Beynəlxalq media qurumlarının Bakıda keçirilən tədbirlərini 150-dən çox xəbər agentliyi işıqlandırıb

Beynəlxalq media qurumlarının Bakıda keçirilən tədbirlərini 150-dən çox xəbər agentliyi işıqlandırıb

25.11.2016 [09:27]

Heydər Əliyev Fondunun və AZƏRTAC-ın təşkilatçılığı ilə Bakıda keçirilmiş Dünya Xəbər Agentliklərinin V Konqresi və Asiya və Sakit Okean Ölkələri İnformasiya Agentlikləri Təşkilatının (OANA) XVI Baş Assambleyası dünyanın 150-dən çox xəbər agentliyi tərəfindən işıqlandırılıb.
Bernama (Malayziya), Ukrinform (Ukrayna), MIA (Makedoniya), SANA (Suriya), Anadolu, İhlas (Türkiyə), Sinxua (Çin), TASS (Rusiya), Kyodo (Yaponiya) və digər xəbər agentliklərinin, “Entretenimento” (Braziliya) portalının, Ərəb Xəbər Agentlikləri Federasiyasının saytının, Beynəlxalq İslam Xəbərlər Agentliyinin, eləcə də “Al-Riyad” (Səudiyyə Ərəbistanı) və “Əl-Bayan” (Birləşmiş Ərəb Əmirlikləri) qəzetlərinin, TRT Haber kanalının (Türkiyə), “Foxnews” kanalının Latın Amerikası və Rumıniya bürolarının yaydıqları xəbərlərdə V Konqresin və OANA-nın XVI Baş Assambleyasının birgə açılış mərasiminə, beynəlxalq tədbirlərin sessiyalarında aparılan müzakirələrə yer verilib.
Dünya KİV-lərinin yaydıqları xəbərlərdə Prezident İlham Əliyevin açılış mərasimindəki nitqində bu mötəbər tədbirlərin Bakıda keçirilməsinin müstəqil medianın inkişafı sahəsində Azərbaycanın fəaliyyətinin və nailiyyətlərinin yüksək qiymətləndirilməsinin göstəricisi olduğu barədə fikri xüsusi vurğulanır. Bakı Konqresində müasir medianın gələcəyi baxımından mühüm məsələlərin müzakirə olunduğu qeyd edilir. Bildirilir ki, Konqresdə dünyanın 130-dan çox nüfuzlu xəbər agentliyinin təmsilçiləri jurnalistikanın əsas hədəflərini müəyyənləşdirməyə çalışdılar. Burada xəbər agentliklərinin gələcəyi ilə bağlı məsələlər, xüsusən multimedianın perspektivləri və ümumiyyətlə, jurnalistikanın aktual problemləri diqqət mərkəzində olub. Konqresdə dünya mediasında yeri və nüfuzu olan media peşəkarları öz layihələrini təqdim edib, yeni təkliflər irəli sürüblər.
Xəbərlərdə qeyd edilir ki, texnologiyaların inkişafı və onların çoxsaylı istifadəçiləri jurnalistlər qarşısında yeni çağırışlar irəli sürür. Texnoloji yeniliklərin tətbiqi, müxtəlif sistemlərdən istifadə olunması, medianın müasir dövrə adaptasiyası məsələləri xüsusi maraq doğurur. İnformasiya məkanının qloballaşması nəticəsində xəbər agentliklərinin rolu xüsusilə artıb. Eyni zamanda, düzgün, dürüst və qərəzsiz informasiyalara da daha çox ehtiyac yaranıb. Multikulturalizmin təbliği, radikal düşüncələrə qarşı mübarizə, dinc yanaşı yaşamaq, xalqlar arasında əlaqələri gücləndirmək məsələlərində medianın dəstəyi bəşəriyyətin xeyrinədir. Bütün bu mövzular V Konqresin gündəliyində əsas yer tutub.
Xarici KİV-lər, həmçinin Dünya Xəbər Agentlikləri Konqresinin medianın aktual problemlərinin müzakirəsi üçün nadir platforma olduğunu vurğulayır. Bakı Konqresi çərçivəsində xəbər istehlakının gələcəyi, yeni texnologiyaların və sosial medianın çağırışları və imkanları, xəbər agentliklərinin innovasiyası, multimedianın gələcəyi üçün jurnalistlərin təlimi, jurnalistlərin missiyasının qorunması, müasir dövrün tələblərindən irəli gələn digər aktual məsələlərə həsr olunmuş müzakirələrin əhəmiyyəti qeyd edilir. Konqresin Bakı Bəyannaməsində informasiya agentliklərinin üzləşdiyi müasir çağırışlara və problemlərə münasibətin əks olunduğu diqqətə çatdırılır.
Xəbərlərdə AZƏRTAC-ın eyni vaxtda həm Dünya Xəbər Agentlikləri Konqresinə, həm də OANA-ya sədrlik edəcəyi bildirilir, BMT-nin baş katibi Pan Gi Munun V Konqresə ünvanladığı müraciətindən bəhs olunur.

Paylaş:

Baxılıb: 524 dəfə