Moskvada “Parlamentarilər narkotiklərə qarşı” beynəlxalq konfrans işə başlayıb

Bakı:

24 °C

64 %

12 m/s

Əlaqə

AZ RU EN

Ana səhifə / Siyasət / Moskvada “Parlamentarilər narkotiklərə qarşı” beynəlxalq konfrans işə başlayıb

Moskvada “Parlamentarilər narkotiklərə qarşı” beynəlxalq konfrans işə başlayıb

05.12.2017 [10:25]

Dekabrın 4-də Moskvada, Rusiya Dövlət Dumasında “Parlamentarilər narkotiklərə qarşı” beynəlxalq konfrans işə başlayıb. BMT-nin himayəsi ilə keçirilən konfransda Azərbaycanın Milli Məclis sədrinin birinci müavini Ziyafət Əsgərovun başçılığı ilə nümayəndə heyəti iştirak edir.
AZƏRTAC xəbər verir ki, tədbirə dünyanın 44 ölkəsinin parlament rəhbərləri, məsul şəxslər və aparıcı ekspertlər dəvət olunublar.
Beynəlxalq konfransın plenar iclasında BMT Baş katibinin müavini Yuri Fedotov, Rusiyanın xarici işlər naziri Sergey Lavrov, daxili işlər naziri Vladimir Kolokoltsev, səhiyyə naziri Veronika Skvortsova, İndoneziya, İran, Meksika, Pakistan, Özbəkistan, Ekvador parlamentlərinin sədrləri, bir sıra ölkələrin parlament sədrlərinin müavinləri, QHT-lərin nümayəndələri çıxış ediblər.
Plenar iclasdan sonra konfrans işini “Narkotik asılılıq: müalicəyə və reabilitasiyaya müasir yanaşma”, “Narkotiklərin qeyri-qanunu dövriyyəsi ilə mübarizənin qanunvericiliklə tənzimlənməsinin təkmilləşdirilməsi”, “Narkotik təhlükəsi ilə mübarizədə QHT-lərin rolu” mövzularında seksiyalarda davam etdirib.
Milli Məclis sədrinin birinci müavini Z.Əsgərov “Narkotiklərin qeyri-qanuni dövriyyəsi ilə mübarizənin qanunvericiliklə tənzimlənməsinin təkmilləşdirilməsi” mövzusunda seksiyada aparılan müzakirələrdə iştirak edib. Azərbaycan nümayəndə heyətinin rəhbəri çıxış edərək narkotik vasitələrin qeyri-qanuni dövriyyəsinə və narkomaniyaya qarşı mübarizəyə dair fikirlərini bölüşüb. O bildirib ki, narkotik vasitələrin yayılması və ticarəti ilə mübarizə qlobal miqyasda, beynəlxalq səviyyədə əməkdaşlıq şəraitində aparılmalıdır. Narkotik vasitələrin qanunsuz dövriyyəsinin terrorizmin, separatizmin, qeyri-qanuni silahlı birləşmələrin maliyyələşdirilməsi ilə bilavasitə bağlı olduğunu vurğulayan Z.Əsgərov qeyd edib ki, müxtəlif şüarlar, eləcə də öz müqəddəratını müəyyənetmə hüququnun beynəlxalq hüququn prinsiplərinə uyğun olmayan interpretasiyası altında suveren dövlətlərin ərazilərində istənilən qanunsuz fəaliyyətin, o cümlədən narkotiklərin qeyri-qanuni dövriyyəsinin həyata keçirildiyi “boz zonalar” yaradılır. Bu baxımdan, separatizm, dövlətlərin ərazi bütövlüyünün pozulması ilə narkotrafik, qanunsuz silah dövriyyəsi və terrorizmin maliyyələşdirilməsi kimi cinayətlərin sıx əlaqəsi aydın görünür. Bu, Azərbaycan Respublikasında xüsusilə Dağlıq Qarabağla bağlı ciddi narahatlıq doğurur. Dağlıq Qarabağın işğal olunmuş ərazilərində ölkənin mərkəzi hakimiyyətinin fəaliyyəti tamamilə istisna edilib. Bu isə müxtəlif cinayətkar qrupların, o cümlədən narkotik vasitələrin qanunsuz dövriyyəsi ilə məşğul olan qrupların fəaliyyəti üçün münbit zəmin yaradır.
Ziyafət Əsgərov çıxışında, həmçinin Azərbaycanda narkotik vasitələrdən istifadə edənlərin sosial həyata qaytarılması üçün də kompleks tədbirlər görüldüyünü qeyd edib. O, narkotik vasitələrlə əlaqədar Azərbaycan qanunvericiliyində əksini tapmış cəza təbirləri ilə yanaşı, ölkədə narkomanların resosializasiyası üçün yaradılan şərait barədə məlumat verib.
Qeyd edək ki, iki gün davam edəcək konfrans çərçivəsində iştirakçıların Rusiya Milli Antinarkotik İttifaqının sosial reabilitasiya mərkəzlərinə gedəcəyi gözlənilir.
Konfransın yekunlarına dair birgə bəyannamə qəbul ediləcək.

Paylaş:

Baxılıb: 584 dəfə