VI Beynəlxalq Elm Olimpiadasının qalibləri ali təhsil ocaqlarına imtahansız daxil ola bilərlər

Bakı:

24 °C

63 %

1 m/s

Əlaqə

AZ RU EN

Ana səhifə / Siyasət / VI Beynəlxalq Elm Olimpiadasının qalibləri ali təhsil ocaqlarına imtahansız daxil ola bilərlər

VI Beynəlxalq Elm Olimpiadasının qalibləri ali təhsil ocaqlarına imtahansız daxil ola bilərlər

03.12.2009 [09:22]

Azərbaycanlı şagirdlər VI Beynəlxalq Elm Olimpiadasında qalib gələrsə onlara ali təhsil ocaqlarına imtahansız daxil olmaq imkanı yaradıla bilər. Bu barədə dekabrın 2-də Gənclər və İdman Nazirliyində olimpiadaya həsr olunmuş mətbuat konfransında gənclər və idman nazirinin müavini İntiqam Babayev məlumat verib. Bildirilib ki, dekabrın 3-də açılışı olacaq olimpiada 15 yaşlı yeniyetmələr arasında fizika, kimya və biologiya fənləri üzrə keçiriləcək. 49 ölkədən 600-dən artıq şagird və onların müəllimləri VI Beynəlxalq Elm Olimpiadasında iştirak etmək üçün müraciət edib.
Olimpiada Heydər Əliyev Fondu, İJSO (International Junior Science Olympiad), Azərbaycan Milli Elmlər Akademiyasının dəstəyi ilə keçirilir. Tədbirə Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyeva sədrlik edəcək.
Olimpiadaya hazırlıq məqsədi ilə artıq Təhsil və Elm Komitələri, eyni zamanda, olimpiadanın keçirilməsinə məsul qurumların nümayəndələrinin iştirakı ilə işçi qrupu yaradılıb. Nazir müavini qeyd edib ki, olimpiadanın Elm Komitəsinə görkəmli alim, Azərbaycan Diplomatik Akademiyasının rektoru Hafiz Paşayev, Təşkilat Komitəsinə isə gənclər və idman naziri Azad Rəhimov rəhbərlik edirlər. Olimpiadanın işçi qərargahı bu ilin mart ayından fəaliyyətə başlayıb.
Milli mütəxəssilərin iştirakı ilə test, nəzəri və təcrübə tapşırıqlar hazırlanıb.
Təcrübə üçün avadanlıq xarici ölkələrin şirkətlərində sifariş edilib.
Olimpiadada Azərbaycandan 15 şagird iştirak edəcək. Müxtəlif ölkələrdə təhsil sistemlərinin fərqli olmasını nəzərə alaraq ölkəmizə gələn müəllimlər açılş mərasimindən sonra hazırlanmış suallarla tanış olacaqlar. Suallar müzakirə olunacaq. Suallar uyğunlaşdırıldıqdan sonra müəllimlərlə şagirdlərin ünsiyyəti tamamilə məhdudlaşdırılacaq.
Olimpiada zamanı ölkəmizə gəlmiş şagirdlərin, onların müəllimlərinin, habelə müşahidəçilərin Azərbaycan tarixi və mədəniyyəti ilə tanış olmaları üçün xüsusi proqram hazırlanıb.
Test suallarını cavablandırarkən hər bir şagird fərdi qaydada, təcrübə zamanı isə bütövlükdə komanda qiymətləndiriləcək. Hər fənn üzrə 10 test tapşırığı veriləcək. Sonra isə təcrübə tapşırıqları yerinə yetiriləcək.
Qeyd edək ki, kimya fənni üzrə təcrübə zamanı istifadə olunan mayelər milli meyvə şirələrindən olacaq. Qonaqları müşayiət etmək üçün 100-dək könüllü seçilib, onlar üçün əlavə hazırlıq təlimləri keçirilib.
VI Beynəlxalq Elm Olimpiadasının prezidenti Masna Gintinq tədbirin Azərbaycanda keçirilməsinin əhəmiyyətindən danışıb. Bildirib ki, Azərbaycan bu tədbirə ev sahibliyi edən ilk Avropa ölkəsidir. Növbəti olimpiada Nigeriyada keçiriləcək. Beləliklə olimpiada bütün qitələri əhatə etmiş olacaq. M.Gintinq iştirakçıların yaş həddinin 15 olmasına aydınlıq gətirərək vurğulayıb ki, əsas məqsəd şagirdlərdə texniki fənnlərə maraq oyatmaqdır. Yuxarı sinif şagirdləri bu olimpiadadan ali məktəblərə imtahansız daxil olmaq imkanı əldə etmək üçün istifadə edirdi. Biz də iştirakçıların yaş həddini azaltmaq qərarına gəldik. Olimpiada dekabrın 11-dək davam edəcək.

Paylaş:

Baxılıb: 1222 dəfə