Azərbaycanın müharibə veteranları ABŞ Konqresinin qərarına etiraz edirlər

Bakı:

16°C

82%

4m/s

Əlaqə

AZ RU EN

Ana səhifə / Siyasət / Azərbaycanın müharibə veteranları ABŞ Konqresinin qərarına etiraz edirlər

Azərbaycanın müharibə veteranları ABŞ Konqresinin qərarına etiraz edirlər

22.12.2009 [11:02]

“Biz ABŞ Konqresinin bu qərarına qəti etirazımızı bildiririk, onu işğalçı Ermənistanı və separatçı Dağlıq Qarabağı mükafatlandırmaq kimi qəbul edirik”
ABŞ Konqresinin Dağlıq Qarabağ separatçılarına maliyyə yardımı ayırmasına etiraz olaraq, Respublika Veteranlar Şurasının sədri Ə.Baxışov Amerika Birləşmiş Ştatlarının Azərbaycan Respublikasındakı Səfirliyinə müraciət ünvanlayıb: “Hörmətli cənablar! Amerika Birləşmiş Ştatları Konqresinin Azərbaycanın 20 faiz ərazisini işğal altında saxlayan, buradakı maddi və mənəvi mədəniyyət abidələrini, təbii sərvətləri məhv edən Ermənistana və separatçı Dağlıq Qarabağ rejiminə 2010-cu il üçün maliyyə yardımı ayırması bizi - II Dünya müharibəsinin iştirakçıları olan Azərbaycan veteranlarını son dərəcə məyus etmişdir. Hesab edirik ki, ABŞ Konqresinin bu addımı Dağlıq Qarabağ münaqişəsinin həlli ilə bağlı danışıqlarda Ermənistanın qeyri-konstruktiv mövqeyini daha da möhkəmləndirəcəkdir. Ermənistan maliyyə yardımından siyasi məqsədləri üçün bəhrələnərək, münaqişənin həllini uzatmağa çalışır. Buna görə də ABŞ Konqresi separatçı rejimə maliyyə yardımı göstərmək əvəzinə, münaqişənin ədalətli şəkildə aradan qaldırılması üçün təsirli tədbirlər görməli idi və Ermənistanı işğal etdiyi Azərbaycan ərazilərindən çıxmağa çağırmalı idi. İnana bilmirik ki, dünyada sülh və demokratiyanın dayağı hesab olunan və II Dünya müharibəsində bizimlə birlikdə faşizmə qarşı döyüşən, faşistlərin törətdikləri qeyri-insani əməllərin şahidi olan Amerika Birləşmiş Ştatlarının Konqresi, bu gün həmin əməlləri təkrar edən Ermənistanı himayə edə bilər. Bu necə ola bilər? Azərbaycan Amerika Birləşmiş Ştatları ilə strateji tərəfdaşdır. Lakin Azərbaycana qarşı təcavüzkar mövqe tutmuş Ermənistana maliyyə dəstəyi göstərilir. Azərbaycanın müharibə veteranları Qafqaz regionunda münaqişələrin ədalətli həlli ilə bağlı dost ABŞ dövlətinə böyük ümidlər bəsləyirlər. Biz ABŞ Konqresinin bu qərarına qəti etirazımızı bildiririk, onu işğalçı Ermənistanı və separatçı Dağlıq Qarabağı mükafatlandırmaq kimi qəbul edirik. Yaxşı bilirik ki, bu yardım heç də sizin düşündüyünüz kimi xeyirxah məqsədlərə deyil, bəd əməllərə yönəldiləcəkdir. Konqresin bu qərarı dünyada sülhün və demokratiyanın carçısı olan ABŞ və onun Konqresinə başucalığı gətirmir və yolverilməzdir. Sizdən xahiş edirik, bizim bu müraciətimizi Amerika Birləşmiş Ştatlarının müvafiq dövlət qurumlarına çatdırasınız”.

Paylaş:

Baxılıb: 976 dəfə