Heydər Əliyev Fondu RİTN ilə birgə məhdud imkanlı şəxslərə İKT-dən istifadə imkanları yaradır

Bakı:

24 °C

63 %

1 m/s

Əlaqə

AZ RU EN

Ana səhifə / Siyasət / Heydər Əliyev Fondu RİTN ilə birgə məhdud imkanlı şəxslərə İKT-dən istifadə imkanları yaradır

Heydər Əliyev Fondu RİTN ilə birgə məhdud imkanlı şəxslərə İKT-dən istifadə imkanları yaradır

22.12.2009 [11:12]

Bu gün informasiya-kommunikasiya texnologiyaları (İKT) sürətlə inkişaf edir, sosial-iqtisadi həyatın bütün sahələrində uğurla tətbiq edilərək insanların həyat şəraitinin və yaşayış tərzinin yaxşılaşdırılmasında böyük rol oynayır. Qlobal informasiya cəmiyyətinin qurulması istiqamətində beynəlxalq təşkilatların müzakirə etdiyi mühüm məsələlərdən biri də ölkələrin irqindən, cinsindən, sosial vəziyyətindən asılı olmayaraq, hər bir vətəndaşa İKT imkanlarından səmərəli istifadə şəraitinin yaradılması istiqamətində apardığı işlərdir. Minilliyin çağırışında və informasiya cəmiyyəti üzrə dünya sammitlərinin yekun sənədlərində bu problem xüsusilə qeyd olunub. Bunun nəticəsi olaraq BMT 2008-ci ili “Məhdud imkanlı şəxslərə İKT imkanları yaradaq” devizi ilə qeyd edib və bununla bağlı xüsusi bəyanat yayıb.
Qloballaşan dünyanın dinamik inkişaf edən bir üzvü olan Azərbyacanda da informasiya cəmiyyətinin qurulması istiqamətində dövlət siyasətinin tərkib hissəsi kimi məqsədyönlü işlər görülür. ölkədə İKT-nin tətbiqi prioritet elan olunaraq, bilik iqtisadiyyatı qurulması məqsədi ilə yüksək texnologiyalar sektoru inkişaf etdirilir. Həmçinin, cəmiyyətin hər bir üzvünün İKT vərdişlərinin inkişafına xüsusi əhəmiyyət verilir, məhdud imkanlı insanlara müasir texnologiyalardan, elektron informasiya resurslarından istifadə imkanları yaradılır.
Respublikamızda ilk belə təşəbbüs Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva tərəfindən irəli sürülüb. Belə ki, 2005-ci il dekabrın 9-da BMT-nin İnkişaf Proqramı ilə Heydər Əliyev Fondu arasında “Görmə qabiliyyətini itirmiş və görmə qabiliyyəti zəif olan insanlar üçün informasiya-kommunikasiya texnologiyalarına çıxışın təmin edilməsinə dair” layihə çərçivəsində Bakının Nərimanov rayonundakı kor və zəif görən uşaqlar üçün respublika internet məktəbində model İKT sinifləri yaradılıb.
Bu işin davamı olaraq, Heydər Əliyev Fondu, Rabitə və İnformasiya Texnologiyaları Nazirliyi və BMT-nin İnkişaf Proqramının birgə həyata keçirdiyi layihə əsasında məhdud imkanlı insanların informasiya-kommunikasiya texnologiyalarından istifadə imkanlarının artırılması məqsədi ilə Gəncə şəhərində Regional İnformasiya Mərkəzi yaradılıb. Mərkəzin xidmətindən Gəncə və Naftalan şəhərlərinin, Ağstafa, Daşkəsən, Qazax, Gədəbəy, Goranboy, Samux, Tovuz, Göygöl, Şəmkir rayonlarının fiziki qüsurlu 60 mindən çox sakini istifadə edə biləcək. Hazırda müvafiq mərkəz Naxçıvan Muxtar Respublikasında da yaradılır. Burada oxu zalı, təlim-tədris mərkəzi, audiokitabxana, kitabxana fondunun audioformata çevrilməsi üçün səsyazma studiyası, sürətli internetə çıxışı olan, kor və görmə qabiliyyəti zəif uşaqlar üçün nəzərdə tutulmuş son model kompyuterlərlə təmin edilmiş kompyuter mərkəzi təşkil ediləcək, qurumun internet saytı açılacaq. Mərkəzdə 50 adda kitab brayl əlifbası ilə çap olunaraq kitabxananın səsyazma studiyasının köməyi ilə audio formata çevrilməsi nəzərdə tutulur. Mərkəzdə görmə qabiliyyəti zəif olanlar üçün kompyuterlərə elektron böyüdücü cihazların quraşdırılması, brayl şriftli kitabların nəşri, lal və karlar üçün subtitrli filmlərin nümayişi, əqli cəhətdən zəif insanlar üçün zehni inkişaf etdirən kompyuter oyunlarının yaradılması nəzərdə tutulur. Buraya əlil arabası ilə gələnlərin maneəsiz hərəkətinin təmin olunması üçün müvafiq şərait yaradılacaq.
Birgə əməkdaşlıq çərçivəsində yaradılan bu mərkəzlər məhdud imkanlı insanların cəmiyyətin həyatında fəal iştirakını, informasiya-kommunikasiya vasitəsilə məlumat əldə etmək və biliklərini artırmaq imkanlarının genişləndirilməsini, bütövlükdə yaşayış tərzinin yaxşılaşdırılmasını təmin etməyə yönəlib.

Paylaş:

Baxılıb: 1194 dəfə