Elmin inkişafına ayrılan maliyyə vəsaitindən səmərəli istifadə etmək lazımdır

Bakı:

1 °C

75 %

10 m/s

Əlaqə

AZ RU EN

Ana səhifə / Siyasət / Elmin inkişafına ayrılan maliyyə vəsaitindən səmərəli istifadə etmək lazımdır

Elmin inkişafına ayrılan maliyyə vəsaitindən səmərəli istifadə etmək lazımdır

23.12.2009 [09:20]

Abel Məhərrəmov: Azərbaycanlı gənclərin xaricdə təhsil aldıqdan sonra ölkəyə qayıtması istiqamətində əməli addımlar atılmalıdır
Elmdə islahatlar aparmaq və elmin inkişafı üzrə strategiyanı müəyyənləşdirmək üçün çoxfunksiyalı fəaliyyət lazımdır. SİA-nın xəbərinə görə, bu barədə jurnalistlərin suallarını cavablandıran Bakı Dövlət Universitetinin (BDU) rektoru Abel Məhərrəmov bildirib. Rektor deyib ki, elmin inkişafı üçün ilk növbədə maliyyə imkanlarını artırmaq lazımdır. Dövlət tərəfindən elmin inkişafı üçün vəsaitin ayrıldığını deyən A.Məhərrəmov vurğulayıb ki, cari il Prezident İlham Əliyevin göstərişinə uyğun olaraq bu islahatları həyata keçirmək üçün 17 milyon manat maliyyə vəsaiti ayrılıb: “Bunun 10 milyonu cihazların alınması, 7 milyonu isə elmin inkişafı istiqamətində dövlət proqramlarının həyata keçirilməsinə ayrılıb. Bunların bir qismi xərclənsə də, bir qismi hələ də qalmaqdadır. Amma mən hesab edirəm ki, 2010-cu ildə ayrılan bu vəsaitlərin hamısı xərclənməlidir. Əgər xərclənməsə biz inkişaf edə bilmərik”.
Abel Məhərrəmov, həmçinin, söyləyib ki, hazırda Milli Məclisdə “Elm haqqında” qanun layihəsi ilə bağlı iş gedir. Onun sözlərinə görə, yaxın vaxtlarda parlamentin yaz sessiyasında layihə geniş müzakirə olunaraq I oxunuşa çıxarıla bilər. Onun sözlərinə görə, “Elm haqqında” Qanun “Təhsil haqqında” Qanunla balanslı olmalı və bir-birini tamamlamalıdır. Millət vəkili vurğulayıb ki, “Təhsil haqqında” Qanundan irəli gələn “Ali təhsil qanunu”, “Orta təhsil sistemini idarə etmək üçün normativ” və digər hüquqi aktlar yaxın vaxtlarda hazırlanaraq Milli Məclisdə birinci oxunuşa çıxarılacaq. Azərbaycanlı tələbələrin xaricdə təhsili məsələsinə münasibət bildirən A.Məhərrəmov söyləyib ki, bu gün Azərbaycanda təhsil islahatlarının 3 əsas istiqaməti var. “Birincisi ölkədaxili islahatların aparılması, ikincisi Azərbaycan gənclərinin xaricdə ali məktəb təhsili aldıqdan sonra Azərbaycana qaytarılması məsələsidir. Mən hesab edirəm ki, azərbaycanlı gənclərin xaricdə təhsil aldıqdan sonra ölkəyə qayıtması istiqamətində əməli addımlar atılmalıdır. Göndərilən tələbələrin 99 faizi ali təhsil müəssisələrinin və Azərbaycan Milli Elmlər Akademiyasının (AMEA) sifarişi əsasında göndərilməlidir. Onlar qayıdandan sonra AMEA və ya ali təhsil ocaqlarında çalışmalıdırlar. Biz Avropa məkanına, qlobal cəmiyyətə inteqrasiya edirik. Əsas məqsəd də odur ki, oradakı elm, təhsil mühitini Azərbaycana gətirək. Bunu da yalniz xaricdə təhsil alıb ölkəyə dönən tələbələr gətirə bilər”, - deyə o əlavə edib. üçüncü məsələ isə ölkəyə qayıtdıqdan sonra onlar üçün elə maddi-texniki baza olmalıdır ki, xaricdə gördükləri cihazlarla burada da işləyə bilsinlər. 3 istiqamətin sintezi əsasında Azərbaycan elminin inkişaf strategiyası müəyyənləşməlidir.

Paylaş:

Baxılıb: 1083 dəfə