Azərbaycan Jurnalist Qadınlar Assosiasiyası AzərTAc-ı ilin informasiya agentliyi seçib

Bakı:

14°C

88%

1m/s

Əlaqə

AZ RU EN

Ana səhifə / Siyasət / Azərbaycan Jurnalist Qadınlar Assosiasiyası AzərTAc-ı ilin informasiya agentliyi seçib

Azərbaycan Jurnalist Qadınlar Assosiasiyası AzərTAc-ı ilin informasiya agentliyi seçib

05.03.2010 [10:02]

Dünən Azərbaycan Jurnalist Qadınlar Assosiasiyası (JQA) ötən ilin yekunlarına əsasən milli mətbuatın inkişafı sahəsində müəyyən etdiyi nominasiyalar üzrə qaliblərin adlarını açıqlayıb. Dövlət və hökumət qurumları nümayəndələrinin, Milli Məclisin deputatlarının, ziyalıların, KİV rəhbərlərinin iştirak etdikləri tədbirdə assosiasiyanın prezidenti Sevil Yusifova qeyd edib ki, JQA artıq 11-ci ildir Azərbaycanda mətbuatın inkişafına öz töhfələrini verib, bu sahədə xidmətləri olmuş şəxsləri və qurumları mükafatlandırıb. 2009-cu ilin Azərbaycan jurnalist qadınları üçün çox məhsuldar olduğunu vurğulayan S.Yusifova mətbuat tariximizdə ilk dəfə olaraq Azərbaycan jurnalist qadınlarının birinci respublika forumunun keçirilməsini əlamətdar hadisə kimi qiymətləndirib.
Prezident Administrasiyasının ictimai-siyasi məsələlər şöbəsinin müdiri, professor Əli Həsənov milli mətbuatımızın inkişafına göstərdiyi köməyə görə diploma layiq görülüb.
Xarici işlər nazirinin müavini, Azərbaycan Diplomatik Akademiyasının rektoru, professor Hafiz Paşayev “Mətbuata açıq dövlət məmuru” nominasiyası üzrə qalib elan olunub.
Tədbirdə Prezident Administrasiyasının ictimai-siyasi məsələlər şöbəsinin mətbuat və informasiya orqanları ilə iş sektorunun müdiri Vüqar Əliyev çıxış edərək bildirib ki, Azərbaycan qadınları ictimai həyatda çox fəaldırlar və demokratik cəmiyyət quruculuğunda onların rolu əvəzolunmazdır. Ulu öndər Heydər Əliyevin qadınların fəallığının artırılmasına göstərdiyi diqqət və qayğını xatırladan V.Əliyev, ölkəmizdə söz və mətbuat azadlığının inkişafında qadınların xüsusi yeri olduğunu bildirib.
Azərbaycan Dövlət Teleqraf Agentliyi - AzərTAc 90 illik fəaliyyəti dövründə peşəkarlığına və beynəlxalq aləmdə əldə etdiyi uğurlara görə “İlin informasiya agentliyi” nominasiyası üzrə qalib elan olunub. Diplom AzərTAc-ın baş redaktoru Şahin Cəfərova təqdim edilib.
Yubiley ərəfəsində agentliyin daha bir mükafata layiq görülməsinin sevindirici hal olduğunu qeyd edən Ş.Cəfərov, AzərTAc-da çalışan qadınların çox fəal olduğunu vurğulayıb. Bu günlərdə Prezident İlham Əliyevin sərəncamları ilə agentliyin təltif edilən 19 əməkdaşından 8-i qadındır.
“İlin televiziyası” nominasiyası üzrə “Azərbaycan Televiziya və Radio Verilişləri” QSC, “İlin ən yaxşı idman kanalı” nominasiyasında “İdman-Azərbaycan” kanalı, “İlin ən yaxşı qadın jurnalı” nominasiyasında isə “Azərbaycan qadını” jurnalı qalib elan olunub.
Sonra “Mətbuata açıq diplomat”, “İlin regional televiziyası”, “İlin internet qəzeti”, “İlin jurnalist qadını”, “İlin xəbər aparıcısı”, “İlin ictimai-siyasi verilişi”, “İlin siyasi-analitik verilişi”, “İlin region qəzeti” nominasiyaları üzrə qaliblərə diplomlar təqdim olunub.
Mətbuat Şurasının sədri Əflatun Amaşov, “Gazelli” MMC-nin prezidenti Zərifə Həmzəyeva, “Azercell Telekom” MMC, “Şərq” və “Olaylar” qəzetləri müxtəlif nominasiyalar üzrə diplomlarla təltif ediliblər.

Paylaş:

Baxılıb: 1099 dəfə