Türkiyəyə xəyanət Azərbaycana xəyanətdir!

Bakı:

13°C

94%

2m/s

Əlaqə

AZ RU EN

Ana səhifə / Siyasət / Türkiyəyə xəyanət Azərbaycana xəyanətdir!

Türkiyəyə xəyanət Azərbaycana xəyanətdir!

09.03.2010 [09:47]

Yaxud dünyanı idarə etmək istəyən ABŞ ədalətli hakim deyil!
Zaman-zaman dünyaya demokratiya dərsi keçənlər, özlərini bəşəriyyətə insan haqlarının müdafiəçiləri, haqq-ədalət carçıları kimi təqdim edənlər bu sadalananları öz istəklərinə uyğunlaşdırmaqdan belə çəkinmirlər. Məsələn, onlar demokratiya anlayışına təzyiq silahı kimi yanaşır, hansısa ölkəyə təzyiq etmək istəyəndə məhz bu silahdan istifadə etməyə cəhd göstərirlər. Yaxud da bir tərəfdən terrorçuluğun, işğalçılığın dünya birliyinə təhlükə törətdiyini deyənlər digər tərəfdən işğalçılığı, terrorçuluğu, faşizmi dövlət siyasəti səviyyəsinə qaldıran bir ölkəni dəstəkləməklə nə qədər “səmimi” olduqlarını nümayiş etdiririlər.
Martın 4-də okeanın o tayında baş verənlər də deyilənləri təsdiqləyir. Məlum olduğu kimi, ABŞ Konqresi Nümayəndələr Palatasının Xarici Əlaqələr Komitəsi martın 4-də keçirdiyi dinləmələrdən sonra 1915-ci ildə Osmanlı Türkiyəsində ermənilərə qarşı aparılan siyasətin dəyərləndirilməsi ilə bağlı qətnaməyə səs verib. Nümayəndələr Palatasına erməni məsələləri üzrə işçi qrupun təqdim etdiyi 252 nömrəli qətnamə 23 səs lehinə, 22 səs əleyhinə olmaqla qəbul edilib.
ABŞ-ın erməni sevgisi
Beləliklə, sözügedən bədnam layihənin müzakirəsi dünyanın “ədalətli hakimi olmaq” iddiasını ortaya qoyan Birləşmiş Ştatların səmimiliyini şübhə altına almağa kifayət qədər əsas yaratdı. Daha doğrusu, erməni sevgisinin “dozasının” artması okeanın o tayındakıları nəinki onları gözləyən “sürprizləri” görməzlikdən gəlməyə, hətta sadə hüquqi prosedurları belə ayaqlar altına atmağa sövq etdi. “Sürpriz” o baxımdan ki, bu erməni təəssübkeşliyindən sonra Birləşmiş Ştatları qlobal miqyaslı proseslərdə çoxsaylı problemlər gözləyə bilər. Bədnam layihənin əleyhinə çıxan Respublikaçı azlığın başçısı İleana Ros-Letinenin də qeyd etdiyi kimi, qətnamənin Konqresdə tanınması NATO müttəfiqi kimi Türkiyənin ABŞ-a münasibətini dəyişdirər, İraq və Əfqanıstandakı silahlı qüvvələrin təhlükəsizliyini azalda bilər. Ros-Letinenin çağırışına qoşulan Bill Delahant və Ras Karnahan isə əlavə ediblər ki, Konqresdə bu qətnamənin qəbul edilməsi nə Türkiyə, nə Ermənistan, nə də ABŞ-a xeyir gətirir.
Hüquqi prosedurların ayaqlar altına atılması məsələsinə gəlincə isə, bədnam səsvermənin gedişində yaşanan biabırçılıqları nümunə göstərmək olar. Daha doğrusu, səsvermə zamanı komitə sədri Hovardr Bermanın sərgilədiyi mövqeni demokratiya adına ləkə kimi qiymətləndirmək olar. Məsələ burasındadır ki, müzakirələr başa çatdıqdan sonra komitə sədri yarım saatlıq səsvermə elan edib. Lakin ilkin nəticələrin qətnamə layihəsinin əleyhinə olduğunu görən Berman heç bir əsas olmadan səsvermənin vaxtını iki dəfə uzadıb. Və sonda ermənilərin istədiyi nəticə əldə edilib.
ABŞ ATƏT-in Minsk qrupunun həmsədri kimi qeyri-obyektiv qərar qəbul etməklə öz etimadını itirə bilər
Bu biabırçılığın hansısa üçüncü dünya ölkəsində deyil, məhz Birləşmiş Ştatlarda qeydə alınması təəssüf hissi doğurmaqla yanaşı, ciddi bir məqamdan da xəbər verir. Görünən odur ki, Birləşmiş Ştatlar (indiki halda Konqresi Nümayəndələr Palatasının Xarici Əlaqələr Komitəsinin timsalında-N.A) bütün norma və prinsipləri bir kənara qoyaraq, yalnız işğalçı Ermənistanın iyrənc arzularını reallaşdırmaq üçün əlindən gələni edir.
Bu isə Dağlıq Qarabağ münaqişəsinin sülhlə çözümü ilə məşğul olan Minsk qrupunun həmsədrlərindən biri kimi ABŞ-ın tərəfsizlik prinsipindən əl çəkməsi, açıq konteksdə desək, işğalçılığı dəstəkləməsi kimi dəyərləndirilməlidir. çünki indiki halda qondarma “erməni soyqırımı” ilə bağlı qətnamənin qəbulunun yalnız bir tərəfə işğalçı Ermənistanın mövcud rejiminə yararı var. Bu yararı təmin edən ölkə kimi Birləşmiş Ştatların sərgilədiyi son mövqe isə işğalçı ölkənin, daha dəqiq desək, işğalçılıq siyasətini dəstəkləmək deməkdir.
Yanındayıq Türkiyə
Təbii ki, həm bu məqam, yəni, ABŞ-ın işğalçıları dəstəkləməsi, həm də indiki halda qardaş Türkiyənin əsassız iddialarla təzyiqlərə tuş gəlməsi Azərbaycanı da ciddi şəkildə narahat etməkdədir. Biz bu narahatlığımızı hələ bədnam layihə səsverməyə çıxarılmazdan öncə okeanın o tayındakılara çatdırmışdıq. Lakin nə edək ki, Birləşmiş Ştatların “erməni sevgisi” başına vurub. Məhz buna görə də amerikalılar bu qərarın onlara nəyə başa gələ biləcəyinin fərqində deyillər. çox güman ki, qısa zaman kəsiyində onlar bunu dərk edəcəklər. Hələlik isə bizim, yəni, bir millət iki dövlət olan Azərbaycanla Türkiyənin daha sıx birləşməsinə ehtiyac var. Yaşanan son olay bir daha göstərdi ki, əslində, bütün oyunların mərkəzində bəzi xarici güclərin türk dünyasının vuran ürəyi, düşənən beyni olan Azərbaycanla Türkiyəni zəiflətmək, çətin duruma salmaq istəyi dayanır. Amma bu istəklər, bu arzular onları reallaşdırmaq istəyənlərin gözündə qalacaq. çünki bizlər təkcə xoş günün deyil, eyni zamanda, dar günün dostları, qardaşlarıyıq. Bizi bir-birimizə, kökümüz, mədəniyyətimiz, dilimiz, bir də dəfələrlə tarixin ən ağır sınaqlarından çıxmış etibarımız bağlayır.
Qardaş Türkiyə bilməlidir ki, Azərbaycan dövləti və xalqı olaraq biz yenə də onun yanındayıq. Azərbaycan dövləti dəfələrlə qondarma “erməni soyqırımı” ilə bağlı öz etirazını bildirib. Heç şübhəsiz, yaxın günlərdə xalqımızın, xaricdəki diaspora təmsilçilərimizin də oxşar etirazları ABŞ Konqresinə ünvanlanacaq. Ermənistanın Azərbaycan torpaqlarını işğal etməsinə etiraz olaraq işğalçı ölkə ilə sərhədlərini bağlayan, rəsmi İrəvanla diplomatik əlaqələri donduran Türkiyə son ana qədər bütün təzyiqlərə tab gətirərək, bizim yanımızda olduğu kimi, biz də hər zaman qardaş ölkənin yanında olacağıq. Buna kimsənin şübhəsi olmasın.
Ziyanın yarısından qayıtmaq da xeyirdi...
Bütün bunlardan sonra, nəzərlər yenidən okeanın o tayına yönəlir. O mənada ki, Birləşmiş Ştatların Konqresin Nümayəndələr Palatasının Xarici Əlaqələr Komitəsinin timsalında etdiyi səhvi düzəltmək üçün hələlik imkanlar mövcuddur. Sadəcə, bu səhvi düzəltmək üçün onu edən tərəfdə, yəni, okeanın o tayında istək olmalıdır. Əgər Ağ Evdəkilər indiki halda qlobal proseslərin açarı durumunda olan, Vaşinqton üçün İslam dünyasına körpü rolunu oynayan Türkiyəni və terrorçuluğa qarşı mübarizədə Birləşmiş Ştatlara ilk dəstək verən ölkələrdən biri, Cənubi Qafqazın lider dövləti olan, Avropanın, dolayısı ilə həm də Qərbin və Birləşmiş Ştatların enerji təhlükəsizliyinin təminatçısı qismində çıxış edən Azərbaycanı itirmək istəmirsə buraxılan səhvi dərhal aradan qaldırmalıdır.
Daha dəqiq desək, bədnam qərarın qanun halına keçməsi üçün Nümayəndələr Palatasının ümumi yığıncağı layihəni dəstəkləməlidir. Yuxarıda sadaladığımız məqamlar Birləşmiş Ştatlar üçün mühüm əhəmiyyət kəsb edirsə, o zaman “soyqırımı” oyununa məhz Nümayəndələr Palatasının ümumi yığıncağında son qoyla bilər. Birləşmiş Ştatların indiki idarəçiləri bunu istəsələr, o zaman bədnam layihənin qanun halına keçməsi qeyri-mümkün olacaq. Yəni, martın 4-də ABŞ Konqresi Nümayəndələr Palatasının Xarici Əlaqələr Komitəsində keçirilən səsvermə zamanı şahidi olduqlarımız (erməniləri razı salacaq qərarın qəbulu üçün səsvermə vaxtının bir neçə dəfə uzadılması-N.A) belə deməyə əsas verir ki, amerikalılar istəyən hər şeyi edə, hətta bəzi prosedurları belə tapdalaya bilirlər.
Nadir AZƏRİ

Paylaş:

Baxılıb: 1017 dəfə