Kütləvi informasiya vasitələri məsələlərə milli maraqlar çərçivəsindən yanaşmalıdır

Bakı:

26 °C

69 %

11 m/s

Əlaqə

AZ RU EN

Ana səhifə / Siyasət / Kütləvi informasiya vasitələri məsələlərə milli maraqlar çərçivəsindən yanaşmalıdır

Kütləvi informasiya vasitələri məsələlərə milli maraqlar çərçivəsindən yanaşmalıdır

12.03.2010 [10:11]

Prezident İlham Əliyev: Həqiqi məlumatın vaxtında verilməsi operativ qərarların qəbulu, proseslərin düzgün şərh edilməsi, ölkələr arasında ikitərəfli və çoxtərəfli əlaqələrin qurulmasında mühüm rol oynayır
İnformasiya əsri sayılan XXI əsrdə kütləvi informasiya vasitələrinin cəmiyyətin inkişafında rolu getdikcə artmaqdadır. ümumiyyətlə, cəmiyyətin aynası sayılan KİV aşkarlığın və demokratik prinsiplərin bərqərar olmasında əhəmiyyətli yer tutur. Azərbaycanda KİV-in azad fəaliyyətinin təmin olunması istiqamətində olduqca mühüm qərarlar qəbul edilib. 1993-cü ildə xalqın təkidi ilə yenidən hakimiyyətə gələn ümummilli liderimiz Heydər Əliyevin şəxsi təşəbbüsü ilə ölkədə senzura ləğv olundu, qəzetlərin qeydiyyat proseduru asanlaşdırıldı, müxtəlif dövrlərdə mətbuat orqanlarına edilən maddi yardımlar hesabına redaksiyaların texniki təchizatı yaxşılaşdırıldı, nəşrlərin dövlət nəşriyyatına olan borcu ləğv olundu. Bu siyasət Azərbaycan Prezidenti İlham Əliyev tərəfindən uğurla davam etdirilir. İki il öncə qəbul olunan Kütləvi İnformasiya Vasitələrinin İnkişafına Dövlət Dəstəyi Konsepsiyası bu istiqamətdə görülən geniş miqyaslı işlərin təməlini qoydu. Ardınca Azərbaycan Respublikasının Prezidenti yanında KİV-in İnkişafına Dövlət Dəstəyi Fondunun yaradılması ölkədə söz azadlığının, demokratik prinsiplərin inkişafı istiqamətində yeni mərhələ açdı.
Azərbaycanda söz azadlığı prinsipi Konstitusiya ilə təsbit olunub. Bundan başqa, KİV-in inkişafı həm də bu sahənin təsiredici vasitə kimi rolunu yüksəldib. İstər daxili müstəvidə ictimai rəyin, istərsə də beynəlxalq səviyyədə dövlətlərarası münasibətlərin formalaşmasında KİV olduqca əhəmiyyətli rola malikdir. Müasir kütləvi informasiya vasitələri nəinki dünya hadisələrini çevik işıqlandırır, həm də informasiyanın təhlili ilə məşğul olur, onu süzgəcdən keçirir və seçərək istifadə edir. Məhz buna görə kütləvi informasiya vasitələri insanların şüuruna güclü təsir göstərir. O baxımdan dövlətin mətbuata, KİV-ə bu qədər diqqət və qayğısının qarşılığında bu sahənin nümayəndələri də öz üzərlərinə düşən məsuliyyəti vicdanla yerinə yetirməli və hər bir məsələyə milli maraqlar çərçivəsindən yanaşmalıdır.
Azərbaycan Respublikasının Prezidenti İlham Əliyev AzərTac-ın 90 illik yubiley mərasimində və MDB ölkələri milli informasiya agentlikləri rəhbərləri şurasının iclasında iştirak edən nümayəndə heyətlərinin başçılarını qəbul edərkən informasiya agentliklərinin, kütləvi informasiya vasitələrinin ölkələr və xalqlar arasında qarşılıqlı anlaşmaya daha geniş imkanlar açdığını söyləyib. Prezident deyib ki, həqiqi məlumatın vaxtında verilməsi operativ qərarların qəbulu, proseslərin düzgün şərh edilməsi, ölkələr arasında ikitərəfli və çoxtərəfli əlaqələrin qurulmasında mühüm rol oynayır: “Kütləvi informasiya vasitələri daha yaxşı qarşılıqlı anlaşmaya, yaxınlaşmağa və əməkdaşlığın genişləndirilməsinə fəal kömək edə bilərlər. Lakin təəssüf ki, bəzən əksinə də olur. Bəzən hansısa yoxlanılmamış və ya qərəzli informasiya, yaxud sifariş xarakterli informasiya ikitərəfli münasibətlərə müəyyən dərəcədə zərər də vura bilər. Buna görə də, biz hamımız - həm siyasətçilər, həm KİV nümayəndələri, həm də ictimai qurumlar əlbəttə, ilk növbədə, qarşımızda duran vəzifələrə məsuliyyətlə yanaşmalıyıq”.
Həqiqətən də, müasir zaman kəsiyində informasiya və telekommunikasiya texnologiyalarının inkişafı, cəmiyyətin sosial-siyasi və mədəni həyatında KİV-in təsirinin güclənməsi, eyni zamanda bu sahənin nümayəndələrinin- jurnalistlərin peşəkarlığının artırılmasını zəruri edir. ölkəmizin dünya informasiya məkanına daxil olması və informasiya cəmiyyətinə keçidlə əlaqədar şəxsiyyətin, cəmiyyətin və dövlətin informasiya təhlükəsizliyinin təmin edilməsi xüsusi əhəmiyyət kəsb edir. Buna görə də, kütləvi informasiya vasitələrinin inkişafına və fəaliyyətinin təkmilləşməsinə dövlət dəstəyi ən vacib məsələlərdəndir.
Digər tərədən, qeyd etmək lazımdır ki, bu gün ölkəmizdə KİV-in inkişafı həm də dövlətimizin qüdrətlənməsinin təcəssümüdür. Azərbaycanın sosial-iqtisadi inkişafı, hüquqi islahatların keyfiyyətcə yeni mərhələyə daxil olması, vətəndaş cəmiyyəti quruculuğunun inkişafı və siyasi plüralizmin genişlənməsi cəmiyyətdə informasiyaya olan ictimai tələbatı daha da artırır. Məhz bu tələbatın təmin olunması zərurəti kütləvi informasiya vasitələrinin ictimai həyatda xüsusi rolunu şərtləndirir. Bu gün Qərbə inteqrasiya edən Azərbaycan nəinki postsovet məkanında, hətta Avropanın özündə belə son illərdə ən yüksək yeni texnologiyaları mənimsəyən və tətbiq edən dövlətlərdən sayılır.
Pərviz SADAOYÄžLU

Paylaş:

Baxılıb: 1260 dəfə