Azərbaycan hökuməti təbii fəlakətin nəticələrinin aradan qaldırılması üçün ən operativ və effektiv addımlar atmaqdadır

Bakı:

28 °C

47 %

13 m/s

AZ RU EN

Ana səhifə / Siyasət / Azərbaycan hökuməti təbii fəlakətin nəticələrinin aradan qaldırılması üçün ən operativ və effektiv addımlar atmaqdadır

Azərbaycan hökuməti təbii fəlakətin nəticələrinin aradan qaldırılması üçün ən operativ və effektiv addımlar atmaqdadır

18.05.2010 [10:12]

Prezident İlham Əliyevin ali məqsədi insanların yaxşı yaşamaları, hər cür qayğı ilə əhatə olunmalarını təmin etməkdir
Qlobal iqlim dəyişiklikləri dünyanın əksər ölkələrində dağıdıcı fəsadlar törətməkdə və fəlakət nəticəsində minlərlə insan öz evini itirməkdədir. Amerika, Fransa, İspaniya, çin, Yaponiya, Almaniya, Türkiyə, Rusiya kimi inkişaf etmiş dövlətlərdə sel və daşqınların vurduğu zərərlərin məbləği daha böyükdür. Qeyd olunan ölkələrin əksəriyyətində əhalinin fəlakət zonasından çıxarılması sahəsində ciddi problemlər müşahidə olunmaqdadır, hətta insanların ölüm halları artmaqda davam edir. Eyni zamanda, bu ölkələrdə əhalinin evakuasiya olunması, onların çadır düşərgələrinə köçürülməsi, məişət qayğılarının həll edilməsi ilə bağlı problemlər hələ də qalmaqdadır.
Kəskin hava şəraitinin intensivləşdiyi Azərbaycan da sel və daşqınlardan sığorta olunmadığından ölkəmizin bir sıra rayonlarında subasma halları baş verib. Fəlakət nəticəsində infrastruktur, yaşayış və inzibati binalara ziyan dəyib, təsərrüfat sahələrində problemlər yaranıb. Təbii fəlakət baş verən andan bütün dövlət orqanlarını səfərbər edən Azərbaycan hökuməti təxirəsalınmaz tədbirlər görməklə insanların təhlükəsizliyini təmin edib, onların üzləşdikləri çətinlikləri aradan qaldırıb. Prezident İlham Əliyevin tapşırıq və göstərişlərinə uyğun olaraq gücləndirilmiş iş rejimində işləyən dövlət strukturları operativ və effektiv addımlar atmaqla əhalinin yaşayış şəraitinin yaxşılaşdırılması və sosial-məişət qayğılarının həll edilməsi, eləcə də, tibbi və iaşə xidmətləri ilə əhatə olunmaları üçün davamlı tədbirlər görüb və bu proses davam etməkdədir.
Prezident İlham Əliyev təbii fəlakət baş verən ilk günlərdən etibarən mövcud vəziyyəti daim nəzarət altında saxlayaraq problemin həlli məqsədilə davamlı addımlar atıb. Dövlət başçısı hökumət üzvlərinin iştirakı ilə müşavirə keçirib və təxirəsalınmaz tədbirlər görülməsi üçün aidiyyəti qurumların rəhbərlərinin hadisə bölgəsinə ezam olunmasını tapşırıb. Prezident sel fəlakətinin fəsadlarının aradan qaldırılması üçün bütün lazımi tədbirlərin görülməsi və insanların yaxşı həyat şəraitinin təmin olunması üçün hər cür köməkliklərin göstərilməsini bildirib. Hər an vəziyyətlə bağlı müvafiq tapşırıq və tövsiyələrini verən dövlət başçısı insanların mövcud durumunu öyrənmək üçün hadisə bölgəsinə səfər edib. Prezident İlham Əliyevin Şirvandakı çadır düşərgəsində müvəqqəti məskunlaşmış Sabirabad rayonunun sakinləri ilə görüşərək onların vəziyyəti ilə yaxından tanış olması həmin insanlarda böyük ruh yüksəkliyini artırıb, dövlət başçısına olan inam və sevgilərini daha da gücləndirib. Təbii fəlakətdən zərər çəkən insanlar ölkə başçısının bu diqqət və qayğısını yüksək qiymətləndiriblər, bu ağır gündə onlarla bir yerdə olmasından böyük məmnunluq duyduqlarını ifadə ediblər. Azərbaycan vətəndaşları Prezident İlham Əliyevin verdiyi vədlərə həmişə sadiq qaldığını və insanların yaxşı yaşamaları üçün var gücü ilə çalışdığını böyük qürur hissi ilə qeyd edirlər. Azərbaycan Prezidentinin bu addımları bir daha göstərir ki, dövlətimizin başçısı bütün ümummilli məsələlərdə vətəndaşlarla bir yerdədir, Onun üçün ali məqsəd insanların yaxşı yaşamaları, hər cür qayğı ilə əhatə olunmalarını təmin etməkdir.
Qeyd edək ki, təbii fəlakətin baş verdiyi bir sıra dövlətlərdə hökumət orqanlarının gördüyü işlərə baxmayaraq, insanların sosial şəraiti ilə bağlı çətinliklər hökm sürür. Həmin ölkələrdə dövlət və hökumət başçısının hadisə yerində olmaması, müvafiq orqanların işinin səfərbər olunması üçün ciddi addımlar atmaması mövcud çətinliklərin yaranmasında rol oynayır. Bu ölkələrin bəzilərində insanların başqa yerə köçürülməsi işində belə ciddi problemlər müşahidə olunur, onların lazımi ərzaq və tibbi xidmətlərlə təmin olunmalarında çətinliklər nəzərə çarpır. Azərbaycanda isə ölkənin rəhbəri başda olmaqla, nazirlər və icra strukturlarının başçıları təbii fəlakətlərin baş verdiyi ilk gündən etibarən hadisə bölgəsində effektiv işlər görməkdədir.
Xatırladaq ki, fəlakətə məruz qalmış insanların məskunlaşması, geyimlə təmin olunması, məişət qayğıları, sağlamlıqlarının qorunması, ərzaq təminatı dövlət hesabına həll edilib. Hökumətin ayırdığı vəsaitlər hesabına onlara gündə 3 dəfə isti yemək verilir, tibbi xidmət göstərilir və insanların bütün problemləri maksimum dərəcədə həll olunur. Bu məqsədlə, həmin ərazilərdə 24 saat fasiləsiz işləyən operativ qərargahlar qurulub. Daxili İşlər Nazirliyinin 500 nəfər və Fövqəladə Hallar Nazirliyinin isə 600-dən çox əməkdaşı qəsəbələrin, kəndlərin mühafizəsi ilə məşğuldur. Bununla yanaşı, Kənd Təsərrüfatı Nazirliyi mal-qarasını seldən xilas etmiş insanlara müvafiq köməkliklər göstərir. Fövqəladə Hallar Nazirliyinin 2 min nəfər şəxsi heyəti və 700-ə qədər texnikası Sabirabad, Saatlı, Neftçala, Salyan, Kürdəmir, Zərdab zonalarında çalışır.
Göründüyü kimi, hökumət təbii fəlakətin qarşısının alınması üçün fasiləsiz iş rejimində çalışır. ölkəmizdə əhalinin təhlükəsizliyinin təmin olunması, onların sosial-məişət qayğılarının həll edilməsi, eləcə də, tibbi və iaşə xidmətləri ilə ən yüksək səviyyədə əhatə olunmaları üçün davamlı tədbirlər görülməkdədir. Onu da qeyd edək ki, dövlət başçısının ciddi nəzarəti, müvafiq nazirlik və komitələrin rəhbərlərinin hadisə yerində operativ şəkildə fəaliyyət göstərməsi, intensiv tədbirlərin gücləndirilməsi öz mühüm nəticələrini verməkdədir.
Elbrus CƏFƏRLİ

Paylaş:

Baxılıb: 1260 dəfə