Gürcüstanda siyasi proseslər yeni məcrada...

Bakı:

20 °C

88 %

7 m/s

Əlaqə

AZ RU EN

Ana səhifə / Siyasət / Gürcüstanda siyasi proseslər yeni məcrada...

Gürcüstanda siyasi proseslər yeni məcrada...

21.10.2021 [10:49]

Azərbaycan ictimaiyyəti də qonşu dövlətdə baş verənləri narahatlıqla izləyir

Ölkəmizlə eyni regionda yerləşən və bir sıra mühüm layihələrdə tərəfdaşımız olan Gürcüstanda baş verən hadisələr diqqəti cəlb edir. Belə ki, Gürcüstanın keçmiş Prezidenti Mixeil Saakaşvilinin bu ölkəyə qayıdışı və həbsi bir sıra siyasi proseslərə yol açıb. Eks-prezidentin lideri olduğu "Vahid Milli Hərəkat" partiyası ardıcıl aksiyalar keçirir. Bununla belə, dövlət strukturları hər hansı bir insidentin baş verməməsi üçün də bütün gücünü səfərbər edib. Saakaşvili tərəfdarları əsas məsələ kimi, keçmiş dövlət başçısının azad olunmasını və onunla bağlı cinayət işinin bağlanmasını istəyirlər.

Müasir beynəlxalq münasibətlər sistemində mühüm yerə malik olan Cənubi Qafqazda bu kimi distabilliyin yaranması birmənalı qəbul edilmir. Bəzi xarici ekspertlər baş verənləri qütblərarası savaşın təzahürü olaraq qiymətləndirirlər. Bununla yanaşı, Saakaşvilinin revanş əldə edərək hakimiyyətə qayıdacağını düşünənlər də var. Hər bir halda, bu ölkədə yaşanan siyasi çaxnaşmalar regiona müsbət dividend qazandırmayacaq.

Məsələ ilə bağlı “Yeni Azərbaycan” qəzetinə açıqlama verən Azərbaycan-Gürcüstan parlamentlərarası əlaqələr üzrə işçi qrupunun üzvü Kamilə Əliyeva bildirib ki, Gürcüstan Azərbaycanın Cənubi Qafqazda ən yaxın tərəfdaşıdır. İki ölkə arasında yüksək əlaqələrin mövcud olduğunu dilə gətirən millət vəkilinin fikrincə, bu ələqələr regional inkişafa mühüm töhfələr verib: " Bu baxımdan, Gürcüstanda sabitliyin olması bizim üçün də maraqlıdır. Təbii ki, baş verənlərlə bağlı narahatlıqlar olsa da, fikrimcə, bu məsələ Gürcüstanın daxili işidir. Azərbaycan heç bir zaman başqa bir dövləti öz daxili işlərinə qarışdırmadığı kimi, digər ölkələrin də daxili işlərinə qarışmır. Hər bir halda, Gürcüstanda baş verən siyasi prosesləri izləyirik. Hansısa bir qarşıdurmanın baş verməməsini, bütün məsələlərin qanun çərçivəsində həll olunmasını arzulayırıq. Gürcüstanda yüz minlərlə azərbaycanlı yaşayır və bu dövlət bizimlə qonşudur. Bu mənada, yaxın zamanda siyasi sabitliyin yenidən təmin olunacağını güman edirəm".

Yeni Azərbaycan Partiyası İdarə Heyətinin üzvü Ramiz Hüseynov da Azərbaycanla Gürcüstan arasında çoxşaxəli əlaqələrin olmasını önə çəkib: "44 günlük Vətən müharibəsi dövründə də Gürcüstan qonşu ölkə olaraq məsuliyyətli davranış sərgilədi. İki dövlət arasında istər siyasi, istərsə də iqtisadi müstəvidə mühüm tərəfdaşlıq əlaqələri mövcuddur. Bu baxımdan, orada baş verən siyasi proseslər bizim üçün də maraq kəsb edir. Orada yaşayan soydaşlarımızla bağlı da narahatlıqlarımız mövcuddur. İnanırıq ki, proseslər qanun çərçivəsində inkişaf edəcək. Hər bir halda bu məsələ Gürcüstanın daxili işidir".

Pərviz Sadayoğlu

Paylaş:

Baxılıb: 826 dəfə