“Dəmir yumruq” Paşinyanın ağlını başına gətirir

Bakı:

20 °C

88 %

5 m/s

Əlaqə

AZ RU EN

Ana səhifə / Siyasət / “Dəmir yumruq” Paşinyanın ağlını başına gətirir

“Dəmir yumruq” Paşinyanın ağlını başına gətirir

27.10.2021 [11:10]

Son günlər Ermənistanın baş naziri Nikol Paşinyanın iqtisadi və nəqliyyat infrastrukturunun açılmasının önəmi, erməni ordusunun hücum deyil, müdafiə məqsədli formalaşdırılması və s. istiqamətdə verdiyi açıqlamalar diqqəti cəlb edir. Ötən il 44 günlük müharibədə başına dəyən “dəmir yumruq”dan sonra “Düşünürəm ki, Cənubi Qafqaz regionunda düşmənçilik atmosferini aradan qaldırmalıyıq. Bu, regional inkişafın yeganə yoludur”, – deyən erməni baş nazir konstruktuv mövqe göstərməyə meyilli görünür. Radikal və barışmaz mövqe tutan erməni cəmiyyəti üçün bu açıqlamalar çox riskli və cəsarətli açıqlamalar sayıla bilər. Daha əvvəl belə çıxışlar edən erməni liderlərin, siyasətçilərin başları müsibətlər çəkib. Ancaq ABŞ-ın Azərbaycandakı keçmiş səfiri Metyu Brayzanın da dediyi kimi, son seçkilərdə rəqiblərini əsaslı fərqlə udan Paşinyan xeyli cəsarətlənib. Bu açıqlamalar real əməllərlə tamamlanarsa, o zaman Ermənistan üçün yaşam imkanları genişlənəcək. Çünki bölgədə sülh və sabitliyin olması, buradakı bütün dövlətlər üçün, xüsusən də Ermənistan üçün son dərəcədə faydalıdır. Düşmənçilik atmosferini aradan qaldırmaq lazımdır və bu istiqamətdə də əsas addımları Ermənistan, onun indiki rəhbəri atmalıdır. 27 sentyabr 2020-ci il tarixinə qədər Azərbaycana və digər qonşularına ərazi iddiaları irəli sürən, aqressiv siyasət yürüdən Ermənistan rəhbərliyinin “Dəmir yumruğ”un zərbəsindən sonra ordusunu hücum üçün deyil, müdafiə üçün hazırlamasını dilə gətirməsi gələcək üçün ümidverici perspektivlər vəd edir. Barıt çəlləyinə bənzəyən Cənubi Qafqazda sülh və sabitlik olması bölgənin iqtisadi inkişafında mühüm rol oynayacaq və bu məsələdə Ermənistanın davranışları mühüm əhəmiyyət kəsb edir. Çünki Azərbaycan, o cümlədən də Türkiyə daim konstruktiv mövqe sərgiləyirlər və qarşı tərəf ərazi iddialarından, aqressiyadan əl çəkəcəyi təqdirdə onunla əməkdaşlıq etməyə hazır olduqlarını bəyan edirlər. Paşinyanın bu çıxışları qarşıdakı günlərdə Moskvada Azərbaycan və Ermənistan rəhbərlərinin görüşünün keçiriləcəyi və mühüm bir sənədin imzalanacağı ilə bağlı xəbərlərin yayıldığı ərəfəyə təsadüf edir. Ehtimal ki, erməni baş nazir bununla həm daxili auditoriyanı həmin prosesə hazırlamaq məqsədi güdür, həm də beynəlxalq ictimaiyyətə sülhə, əməkdaşlığa hazır olmasının mesajını verir. Bəllidir ki, daxildəki radikal millətçi qrup, erməni kilsəsi, xaricdəki erməni lobbisi Azərbaycanla, Türkiyə ilə hansısa əməkdaşlığın, qarşılıqlı münasibətlərin qəti şəkildə əleyhinədir. Onların kiçik bir qismi isə ümumiyyətlə II Qarabağ müharibəsində itirdiklərini qaytarmaq, qisas almaq həvəsində və ümidindədir. Lakin “Dəmir yumruğ”un zərbəsini görmüş Paşinyan bu addımın Ermənistanın sonu olacağını anladığı üçün ərazi iddialarından imtina etməyə, aqressiyanı aradan qaldırmağa, əməkdaşlığa, anlaşmağa meyilli kimi görünür. Hadisələr təbii axarda davam edərsə, Paşinyana daxildən və xaricdən hansısa süni müdaxilələr olmazsa, yaxın gələcəkdə fərqli, qonşularla normal ünsiyyət və əlaqələr saxlayan bir Ermənistanı görə biləcəyik.

Siyasi şərhçi Mübariz Göyüşlü

Paylaş:

Baxılıb: 823 dəfə