Xüsusi nümayəndələrin Moskva görüşü baş tutdu

Bakı:

29 °C

57 %

3 m/s

Əlaqə

AZ RU EN

Ana səhifə / Siyasət / Xüsusi nümayəndələrin Moskva görüşü baş tutdu

Xüsusi nümayəndələrin Moskva görüşü baş tutdu

15.01.2022 [00:10]

Ermənistan Türkiyə ilə münasibətlərin normallaşdırılmasına hazırdırmı?

Nardar BAYRAMLI

Xəbər verildiyi kimi, yanvarın 14-də Türkiyə və Ermənistanın münasibətlərinin normallaşdırılması üzrə xüsusi nümayəndələri Serdar Kılıç və Ruben Rubinyan arasında Rusiyanın paytaxtı Moskvada ilk görüş keçirilib. Görüş bir saat yarım davam edib. Türkiyənin Xarici İşlər Nazirliyi rəsmi məlumat yayaraq bəyan edib ki, xüsusi nümayəndələrin müsbət və konstruktiv atmosferdə gerçəkləşən ilk görüşündə Türkiyə və Ermənistan arasında dialoq yolu ilə davam etdiriləcək normallaşma prosesinə yönəlik fikir mübadiləsi aparılıb. “Tərəflər müzakirələri ilkin şərtlər olmadan davam etdirməyə razılaşıblar. İkinci görüşün yeri və tarixi diplomatik kanallar vasitəsilə müəyyənləşdiriləcək”,-deyə məlumatda qeyd olunur. Ermənistanın Xarici İşlər Nazirliyi də xüsusi nümayəndələrin Moskva görüşü ilə bağlı oxşar məlumat yayıb.

İlk görüşün konstruktiv məcrada keçməsi perspektiv üçün nə vəd edir? Ermənistan regionda sülh və təhlükəsizliyin təmin olunması təşəbbüslərinə adekvat siyasət yürüdəcəkmi? Mövzu ilə bağlı qəzetimizə açıqlama verən Milli Məclisin deputatı Naqif Həmzəyev bildirib ki, Azərbaycanın 44 günlük müharibədə zəfər qazanması regionda yeni reallıqlar yaratdı. Onun sözlərinə görə, Ermənistan da müəyyən dərəcədə bu reallıqları dərk edir, həm Azərbaycan, həm də Türkiyə ilə münasibətlərini yaxşılaşdırmaq istəyini ortaya qoyur: “Türkiyə-Ermənistan münasibətlərinin soyuq və gərgin olmasının bir sıra səbəbləri var. Ən əsası Ermənistanın Osmanlı İmperiyasında “erməni soyrqırımı” ilə bağlı iddiaları idi ki, əslində belə bir şey olmayıb, ermənilər, sadəcə olaraq bunu iddia edərək Türkiyədən təzminat istəyirlər. Həmçinin Ermənistan tərəfi Qars müqaviləsini tanımır və 44 günlük zəfər müharibəsinə qədər də Azərbaycan torpaqlarını işğal altında saxlayırdı. Bu səbəbdən Türkiyə Ermənistanla sərhədlərini bağlamışdı, konkret şərtləri var idi, bunlar yerinə yetirilməyənə qədər onlarla hər hansısa münasibətlərin qurulmayacağını söyləyirdi. Bu gün yeni reallıqlar fonunda qeyri-şərtsiz hər iki tərəf nümayəndələr təyin edib və keçirilən görüş kontekstində də münasibətləri yaxşılaşdırmaq üçün ümidlər böyükdür. Xüsusilə də, İstanbul və İrəvan arasında fevralın 2-də ilkin aviauçuşun reallaşdırılması fikrimcə, bunun üçün əla fürsətdir. Ermənistanın artıq Türkiyəyə qarşı hansısa iddialarla çıxış etməsi və tələb etməsi real görünmür. Çünki bu ölkə elə bir vəziyyətdə də deyil”.

Millət vəkili qeyd edib ki, artıq Ermənistan Türkiyə ilə münasibətlərini yaxşılaşdırmaq, sərhədləri açmaq, ticarət əlaqələrini reallaşdırmaq istəyir: “Bu baxımdan da, hansısa bir şərt ortaya qoyulmayacaq. Ancaq erməni tərəfi onu da bilir ki, Türkiyə ilə münasibətləri normallaşdırmaq üçün hansı addımları atmalıdır. Bu, ilk növbədə, Azərbaycanla Ermənistan arasında sülh müqaviləsinin imzalanması, Ermənistanın həm Türkiyə, həm də Azərbaycanın ərazi bütövlüyünü tanımasıdır. Hesab edirəm ki, Ermənistan buna məcbur olacaq. Həmçinin bilirik ki, Ermənistan region üçün önəmli olan Zəngəzur dəhlizinin açılması prosesini müəyyən dərəcədə ləngidir. Türkiyə bu dəhlizin açılmasının qısa müddətdə baş tutmasının tərəfdarıdır və Ermənistana dəfələrlə çağırışlar edib. Qardaş ölkədə çoxlu sayda Ermənistan vətəndaşları qeyri-leqal formada yaşayıb işləyirlər. Yəni minlərlə erməni ailəsi Türkiyənin hesabına dolanırlar. Göründüyü kimi, Ermənistanın sosial-iqtisadi inkişafı üçün Türkiyəyə böyük ehtiyacı var. Əgər erməni tərəfi regionun gələcək inkişafı naminə Türkiyə və Azərbaycanın təşəbbüslərinə qoşularsa, qonşu ölkə kimi üzərinə düşən öhdəlikləri yerinə yetirərsə sərhədlərin açılması gerçəkləşək. Bütün bunlara xüsusi nümayəndələrin növbəti görüşlərində aydınlıq gələcək”.

Paylaş:

Baxılıb: 749 dəfə