Ərdoğdu kimilər niyə narahatdır?

Bakı:

20 °C

68 %

2 m/s

Əlaqə

AZ RU EN

Ana səhifə / Siyasət / Ərdoğdu kimilər niyə narahatdır?

Ərdoğdu kimilər niyə narahatdır?

05.02.2022 [09:49]

Yaxud qaranlıq planlara alət olanlar “qaranlıq məqam” axtarışında...

Nurlan

Bu gün Avrasiyada tarixi anlar yaşanır. Öz ərazi bütövlüyünü və tarixi ədaləti bərpa etmiş Azərbaycanın strateji təşəbbüsləri ilə Asiyadan Avropaya doğru geniş bir coğrafiyada yeni əməkdaşlıq imkanları formalaşır. Eyni zamanda, dost, qardaş, strateji tərəfdaş olan Azərbaycan və Türkiyənin ortaq siyasi iradəsi - birgə təşəbbüsləri əsasında bölgədə işbirliyi və təhlükəsizlik mühiti yenidən dizayn olunur. Bu, milli və regional baxımdan sülh, rifah və tərəqqi deməkdir.

Revanşistlər qədər miskin və narahat

Bəhs olunan gerçəkliklərə rəğmən, prosesə zərbə vurmaq, yerli və beynəlxalq ictimaiyyəti yanıltmaq cəhdləri də müşahidə olunur. Xeyr, bu cəhdlərə təkcə Ermənistanda və məğlub ölkədən kənarda revanşistlərin timsalında rast gəlinmir. Azərbaycanın tarixi Qələbəsinin prosesə çevrilməsindən, hərbi Zəfərin siyasi-diplomatik müstəvidə möhkəmlənməsindən, bir millətin iki dövləti olan Azərbaycan ilə Türkiyənin müttəfiqlik münasibətlərinin güclənməsindən ən azı revanşistlər qədər narahat olanlar var. Onlar daha çox informasiya təxribatları törətməklə, yaxud buna çalışmaqla özlərini və bağlı olduqları şəbəkəni ifşa edirlər. Məsələn, Türkiyə Böyük Millət Məclisinin Cümhuriyyət Xalq Partiyasından (CHP) olan millət vəkili Aykut Ərdoğdunun Azərbaycan ilə Türkiyə arasında enerji sahəsində əlaqələrlə bağlı tamamilə əsassız ittihamlar səsləndirməsi - absurd iddialar irəli sürməsi təsadüfi deyil.

Ona da, bağlı olduğu dairələrə də yaxşı məlumdur ki...

Onun və bağlı olduğu dairənin özünə də yaxşı məlumdur ki, Azərbaycan ilə Türkiyə arasında bütün münasibətlər, o cümlədən enerji təhlükəsizliyi ilə əlaqədar təmaslar dostluq və qardaşlıq zəmini üzərində təşəkkül tapıb. Yəni bizim strateji tərəfdaşlığımız qardaşlıq təməlində inşa olunur, uğurla inkişaf edir. Digər tərəfdən, iki ölkənin birgə təşəbbüslər əsasında reallaşdırdıqları enerji layihələri tərəflərə iqtisadi və siyasi mənfəət gətirir, bu isə xalqlarımızın rifahının daha da yaxşılaşması, ölkəmizin dünyada mövqeyinin möhkəmlənməsi deməkdir. A.Ərdoğdu, hər halda, Bakı və Ankaranın milli məsələlərdə bir-birini beynəlxalq müstəvidə qətiyyətlə müdafiə etməsindən, Vətən müharibəsində Türkiyənin Azərbaycana prinsipial mənəvi-siyasi dəstəyindən və yeni mərhələdə birgə fəaliyyətdən də xəbərdardır. Belə ola halda, iki ölkənin münasibətlərində “qaranlıq məqam” axtarmaq elə mənəvi-siyasi qaranlığa qərq, yaxud qaranlıq planlara alət olmaq deməkdir.

İnformasiya təxribatı və ya niyə məhz indi?

Digər tərəfdən, Şuşa Bəyannaməsinin hər iki ölkənin parlamenti tərəfindən ratifikasiya edildiyi zaman və şəraitdə belə iddiaların ortaya atılması əsla təsadüfi sayıla bilməz. Bəyannamənin imzalanması və təsdiqlənməsi sıradan bir hadisə, yaxud sadə məsələ deyil. Çünki Bəyannamədən irəli gələn müvafiq addımların atılması - strateji vəzifələrin yerinə yetirilməsi postmünaqişə dövründə hərbi-siyasi təhlükəsizliyə və müttəfiqlik münasibətlərinin daha da gücləndirilməsinə müstəsna töhfə olacaq. Ən mühüm məqamlardan biri Şuşa Bəyannaməsinin imzalanması ilə hər iki ölkənin yeni hərbi-siyasi təhlükəsizlik çətiri formalaşdırması - yeni milli və regional təhlükəsizlik mexanizmi yaratmasıdır. Bu, həm də hansı geosiyasi qütbdən və ya cəhətdən gəlməsindən asılı olmayaraq, təhdidlərə qarşı birgə mübarizə platformasının əsasının qoyulmasıdır.

Bütün bu reallıqlardan narahat olanlar CHP-li millət vəkili kimi fiqurları ortaya atmaqla süni gündəm formalaşdırmağa, yaxud ən yüksək zirvədə olan münasibətləri ictimai rəydə etibarsızlaşdırmağa cəhd göstərirlər. Amma bütün hallarda reallıqlar dəyişmir! Gerçəklik Azərbaycan-Türkiyə münasibətlərinin sarsılmazlığını, möhtəşəmliyini, Ərdoğdu kimilərin isə miskinliyi və acizliyini əks etdirir.

Paylaş:

Baxılıb: 710 dəfə