Dünya birliyi Ağdaban faciəsinə susmasaydı...

Bakı:

13 °C

74 %

3 m/s

Əlaqə

AZ RU EN

Ana səhifə / Siyasət / Dünya birliyi Ağdaban faciəsinə susmasaydı...

Dünya birliyi Ağdaban faciəsinə susmasaydı...

07.04.2022 [10:01]

Buça və onun kimi onlarla qətliamlar baş verməzdi

PƏRVİZ

1992-ci ilin aprelində, Kəlbəcərin işğalından bir il öncə erməni silahlı birləşmələri tərəfindən törədilmiş Ağdaban faciəsi Ermənistanın Azərbaycana təcavüzünün ən qanlı səhifələrindən biridir. Birinci Qarabağ müharibəsi dövründə iki dəfə ermənilər tərəfindən dağıdılan və yandırılan, insanları təcavüzə uğrayan Ağdaban kəndində baş verənlər bəşəriyyətə qarşı törədilmiş faciədir. Bu faciə zamanı ermənilərin ağlagəlməz, insanlığa sığmayan vəhşilikləri nəticəsində Ağdabanda kütləvi qırğın həyata keçirilib.

Ağdaban çayının sağ sahilində, Ağdaban dağının yamacında, Murovdağ silsiləsinin cənub ətəyində yerləşən bu kənd 1992-ci il aprelin 7-dən 8-nə keçən gecə Ermənistan silahlı birləşmələri və Dağlıq Qarabağdakı separatçı erməni quldur dəstələrinin hücumuna məruz qaldı. Hücumdan xəbərsiz olan kənd əhalisi başıaçıq-ayaqyalın qarla örtülü meşələrə, dağlara üz tutdu. Kəndləri müdafiə edən kiçik dəstələr ermənilər tərəfindən məhv edildiyindən əhali müdafiəsiz qalmışdı. Erməni daşnakları Ağdaban kəndinə soxularaq 130-dan çox evi tamamilə yandırdılar, 779 nəfər dinc sakinə divan tutdular. Onlar yaşlı, qoca, qadın, uşaq demədən dünyada görünməmiş ən qəddar üsullarla dinc əhalini qətlə yetirərək soyqırım aktı törətdilər. Bu faciə zamanı 32 nəfər amansızcasına qətlə yetirildi, 8 nəfər 90-100 yaşlı qoca, 2 nəfər azyaşlı uşaq, 7 nəfər qadın diri-diri odda yandırıldı. Həmçinin 2 nəfər itkin düşdü, 12 nəfərə ağır bədən xəsarəti yetirildi, 5 nəfər isə girov götürüldü...

Ağdabanlılar bu faciədən sonra belə öz doğma yurdlarını tərk etmədilər. Bununla belə kənd o zamankı AXC-Müsavat hakimiyyətinin günahı ucbatından ikinci dəfə eyni təcavüzə məruz qaldı. 1993-cü il mart ayının 27-də ermənilərin Kəlbəcərə hücumu elə Ağdabandan başladı. Ermənilər Ağdaban kəndinə hücum edib, onu ikinci dəfə viranəyə döndərdilər. Kənd evlərinin əksəriyyəti yandırıldı və qarət edildi. Ağdabanın ikinci dəfə işğalı isə Kəlbəcərin hər tərəfdən mühasirəyə düşməsinə yol açdı. Ermənilər Ağdabanı təkcə strateji məkan olduğu üçün deyil, əslində Kəlbəcər ədəbi mühitinin beşiyi kimi də çoxdan hədəfə almışdılar. Onlar Ağdabanda yalnız soyqırım törətmədilər. Erməni quldurları tərəfindən tarix, memarlıq və mədəniyyət abidələri dağıdıldı, müqəddəs ziyarətgah və məzarlıqlar təhqir olunaraq məhv edildi.

2020-ci ildə baş verən Vətən müharibəsi işğal altında olan digər torpaqlarımız kimi Kəlbəcərimizi də öz azadlığına qovuşdurdu. Ali Baş Komandan İlham Əliyevin rəhbərliyi ilə Silahlı Qüvvələrimiz 30 illik işğala son qoydu. Ağdaban da düşmən tapdağından azad olundu. Bununla belə, ermənilərin bu torpaqlarda törətdikləri vəhşiliklər, soyqırımları unudulmamalıdır. Prezident İlham Əliyevin bildirdiyi kimi, biz yaşadığımız faciələri yaddan çıxarmamalıyıq. Təəssüfləndirici haldır ki, XX əsrin sonlarında baş verən Ağdaban faciəsi hələ də beynəlxalq səviyyədə tanınmır, öz layiqli qiymətini almır. Bu faciəni törədən ermənilər beynəlxalq ədalət məhkəməsi qarşısında məsuliyyət daşımalı və etdikləri vəhşiliklərə görə cavab verməlidirlər. Bu gün Buçada baş verən hadisələrə görə ayağa qalxan, səfərbər olan dünya birliyi bir həqiqəti anlamalıdır. 30 il öncə dünyanın gözü qarşısında təcavüzə uğrayan, dağıdılan, qətl edilən Ağdabana layiqli qiymət verilsəydi, bu faciəni törədənlər qanun və hüquq qarşısında cavab versəydilər, bəlkə də Buça və onun kimi onlarla faciələr yaşanmazdı. Bu baxımdan Ağdaban faciəsinin təbliğinə, tanıdılmasına böyük ehtiyac var. Erməni vandalizminin ən böyük sübutlarından biri olan bu faciəni unutmamalı və unutdurmamalıyıq!

Paylaş:

Baxılıb: 1247 dəfə