Ətrafındakılara layiq liderlər

Bakı:

11 °C

87 %

9 m/s

Əlaqə

AZ RU EN

Ana səhifə / Siyasət / Ətrafındakılara layiq liderlər

Ətrafındakılara layiq liderlər

20.10.2010 [09:33]

Və yaxud liderlərinə layiq komanda
Bütün demokratik dövlətlərdə iqtidarda olan siyasi qüvvələrə rəqib - güclü müxalifət var. Bu müasir dünya şərtlərində qəbul edilmiş bir aksioma olaraq qarşıya çıxır. Məhz bu səbəbdən də bir çox siyasilər müxalifətin və müxalifətçiliyin əhəmiyyətindən danışarkən vurğulayırlar ki, ölkədə güclü demokratiyanın olması müxalifət partiyalarının da fəaliyyətindən asılıdır. Bu, Avropada da belədir, okeanın o tayındakı ABŞ-da da, Avstraliyada da. Amma niyəsə dünyanın hər yerində qəbul olunmuş bu aksioma Azərbaycana gələndə mahiyyətini dəyişir.
Azərbaycanda demokratiyanın inkişafı, sadəcə, xalqın iradəsindən və hakimiyyətin atdığı addımlardan asılıdır. Doğrudur, hakimiyyət bu yolda əlindən gələni edib və etməkdə davam edir. Amma demokratiya bütöv bir cəmiyyətin inteqrasiyasını əhatə etdiyindən hökumətin səyləri ilə kifayətlənmək düzgün deyil. Bu prosesdə hakimiyyətin səyləri nə qədər əhəmiyyət daşıyırsa, vətəndaş cəmiyyətinin, ayrı-ayrı siyasi partiyaların fəaliyyəti də bir o qədər böyük əhəmiyyət kəsb edir. Amma Azərbaycan müxalifəti bu reallığı dərk etmir və daşımalı olduğu missiyanı bir kənara qoyub qeyri-qanuni, siyasi etika və əxlaqa, normal insan davranışlarına uyğun olmayan işlərlə məşğuldur. Onların bu günə qədər hansı yolla siyasi səhnədə qaldıqlarını, varlıqlarını mühafizə etmək üçün nələrə hazır olduqlarını, millət, vətən anlayışlarının onlar üçün heç bir əhəmiyyət kəsb etmədiyini yaxşı bilirik. Bu gün özünü hakimiyyətə alternativ sayan, iqtidara gəlmək iddiasında olan Əli Kərimlilərin, İsa Qəmbərlərin siyasi karyeralarında yol verdikləri qanunsuzluqlar hamımıza yaxşı bəllidir. Sadəcə, bir neçə faktı sadalamaqla, əslində, bu insanların mahiyyətini də kifayət qədər açıq izah etmək mümkündür.
AXCP-nin Gənclər Təşkilatının sədri Ruslan Bəşirlinin məşhur qalmaqalı yəqin ki, hələ də yaddaşlardan silinməyib. Onun erməni xəfiyyələri ilə badə toqquşdurması, ermənilərin şəninə sağlıqlar yağdırması, Azərbaycanda iğtişaşlar törədəcəklərinə dair vədlər verməsi və bunun müqabilində pul alması faktlarını bu gün də xatırlayırıq.
Əli Kərimlinin nəzarətində olan “Azadlıq” qəzetinin baş redaktoru Qənimət Zahidin “3 palma” əhvalatı da elə asanlıqla unudula bilməz. 26 fevralda Azərbaycan xalqı Xocalıda baş verən soyqırımı qurbanlarını anarkən, bu dəhşətli qətliamları törədənlərə lənətlər yağdırarkən, Qənimət Zahid adıçəkilən istirahət mərkəzində gününü gün etməklə məşğul idi.
Və yaxud, başqa bir fakta nəzər yetirək. Əli Kərimlinin müşaviri Qabil Məmmədrzayevin törətdiyi cinayət əməlinin necə müdafiəsi ola bilər? Azərbaycan vətəndaşının evinə basqın edərək külli miqdarda pul oğurlanmasına haqq qazandırmaq mümkündürmü? Maraqlıdır, görəsən partiyada Əli Kərimliyə ən yaxın adamlardan biri, bəlkə də birincisi kimi bilinən Qabilin bu cinayətdən əldə etdiyi gəlirlər kimə və hara xərclənib?
“Azadlıq” qəzetinin baş direktoru Azər Əhmədovun bir neçə gün öncə sosial şəbəkədə yayımlanan video rolikini isə, sadəcə, ikrah hissi ilə qarşıladıq. Azərbaycan kişisinə yaraşmayan hərəkətlərə yol verən Azər Əhmədovu hansı üzlə müdafiə etmək olar?
Keçmiş qəbahətləri bəs deyilmiş kimi, elə bu günlərdə ermənilərlə əməkdaşlıq haqqında müqavilə imzalayan İsa Qəmbərin bu mövqeyini necə qəbul edəsən. Azərbaycan xalqı nə belə əxlaqı, nə belə siyasəti, nə belə siyasətçiləri, nə də belə müxalifətçiliyi əsla qəbul etmir.
Bəli, bu faktlar həmin düşərgənin təmsilçilərinin, xüsusilə də Əli Kərimlinin yaxın ətrafının rol aldıqları qəbuledilməz halların, sadəcə, bir neçəsidir. Və bu faktların sıralarını daha da genişləndirə bilərik. Amma hesab edirik ki, buna ehtiyac yoxdur və sadalanan faktlar, əslində, hakimiyyətə gəlmək iddiasında olan Əli Kərimlinin ətrafı haqqında dolğun bilgiyə malik olmağa imkan verir. Bu, həm də Əli Kərimlinin “liderlik” qabiliyyətini tam çılpaqlığı ilə üzə çıxarır. Belə demək mümkündürsə, Əli Kərimli məhz ətrafındakılara layiq liderdir.
Aqşin ŞAHİNOÄžLU

Paylaş:

Baxılıb: 1034 dəfə