Dağlıq Qarabağ problemi AŞPA-nın qış sessiyasında geniş müzakirə olunur

Bakı:

15°C

72%

3m/s

Əlaqə

AZ RU EN

Ana səhifə / Siyasət / Dağlıq Qarabağ problemi AŞPA-nın qış sessiyasında geniş müzakirə olunur

Dağlıq Qarabağ problemi AŞPA-nın qış sessiyasında geniş müzakirə olunur

27.01.2011 [11:29]

Azərbaycan nümayəndə heyəti Ermənistanın işğalçılıq siyasətinin ifşa olunması istiqamətində uğurlu fəaliyyət göstərir
Məlum olduğu kimi, Strasburqda Avropa Şurası Parlament Assambleyasının qış sessiyası keçirilir və Azərbaycan nümayəndə heyəti sessiyada iştirak edir. Sessiyanın gündəliyinə Moldovada keçirilmiş parlament seçkiləri, “Şərq tərəfdaşlığı” proqramı və onun Şərqi Avropada iqtisadi inkişafa təsiri, Gürcüstanda demokratik təsisatların inkişafı, Bern Konvensiyasının yerinə yetirilməsi və digər məsələlər daxildir. Həmçinin, sessiyada insan haqları və qaçqınların vəziyyəti diqqət mərkəzində olacaq.
Artıq baş tutmuş iclaslarda Azərbaycan nümayəndə heyəti Dağlıq Qarabağ münaqişəsinin həlli məsələsini gündəliyə gətirərək ölkəmizin mövqeyini açıqlayıb, azərbaycanlı qaçqın və məcburi köçkünlərin pozulmuş hüquqlarının bərpası məsələsini qaldırıblar. Bununla yanaşı, Türkiyənin xarici işlər naziri, Avropa Şurası Nazirlər Komitəsinin sədri Əhməd Davudoğlu da sessiyadakı çıxışında Ermənistanı işğalçılıq siyasətinə görə sərt tənqid edib. O, bildirib ki, Türkiyə qonşuları ilə bütün məsələləri açıq şəkildə müzakirə etməyə hazırdır: “Ermənistanla münasibətlərin normallaşmasını nəzərdə tutan protokolların imzalanması bəzi məqsədlər daşıyırdı. Mövcud problemlər bu normallaşmanın həyata keçirilməsinə maneələr yaratdı. Ermənistan bu gün Avropa Şurasına üzv olan bir ölkənin torpaqlarının 20 faizini işğal edib”. Ə.Davudoğlunun sözlərinə görə, Cənubi Qafqazda münasibətlərin normallaşması təkcə Türkiyə ilə Ermənistan arasında deyil, Ermənistanla Azərbaycan arasında da münasibətlərin normallaşmasından asılıdır: “Azərbaycan Avropa Şurasının üzvüdür. Əgər Ermənistan onun 20 faiz ərazisini işğal edirsə, deməli, təşkilatın əsas dəyərlərinin pozulması halı var. Əgər siz Avropa Şurasının bütün dəyərlərinə hörmət etsəniz, əminəm ki, bir gün Avropanın bu hissəsində də sülh bərqərar olacaq. Belə olarsa, Azərbaycanla Ermənistan arasında da münasibətlər əsaslı şəkildə yaxşılaşar. Türkiyə onu əhatə edən ölkələri dost kimi görür. Əgər Ermənistan da ətrafında dost ölkə görmək istəyirsə, Azərbaycanı da dost qismində görməlidir. Bu halda Qafqazda sülh və sabitlik bərqərar olar. Bu, bizim siyasi məqsədimizdir”.
Göründüyü kimi, qardaş Türkiyə dövləti nüfuzlu beynəlxalq təşkilatın tribunası vasitəsilə bir daha Ermənistanın işğalçılıq siysətini pisləyərək Azərbaycanın təcavüzdən əziyyət çəkdiyini diqqətə çatdırıb. Sessiyada həmçinin, Dağlıq Qarabağ münaqişəsi ilə bağlı alt komitənin fəaliyyətinin bərpası məsələsi də gündəmdədir. Məlum olduğu kimi, AŞPA-nın sədri Mövlüd çavuşoğlu Ermənistan tərəfinin etirazlarına baxmayaraq alt komitənin fəaliyyətinin bərpa olunacağını bildirib. Eləcə də, təşkilatın baş katibi Torbyörn Yaqland da məsələyə münasibətini açıqlayıb.
Qurumun qış sessiyasında Azərbaycan üçün vacib məqamlardan biri ötən ilin noyabr ayında keçirilimiş parlament seçkiləri ilə bağlı hesabatın müzakirəsi olub. Assambleyanın sessiyasının birinci günü plenar iclasın sonunda qurumun Daimi Komitəsi adından Lüksemburqlu parlamentar xanım Anna Brasserin hazırladığı hesabat ətrafında müzakirələr aparılıb.
Azərbaycanın AŞPA-dakı nümayəndə heyətinin rəhbəri Səməd Seyidov seçkiləri 7 mindən çox yerli və beynəlxalq müşahidəçilərin izlədiyini deyib: “Seçkiöncəsi müşahidələr də seçki prosesini daha yaxşı anlamaq üçün çox vacibdir. Bildiyiniz kimi, bu seçkilərlə bağlı AŞPA, ATƏT-in Demokratik Təsisatlar və İnsan Hüquqları Bürosu, ATƏT Parlament Assambleyası və Avropa Parlamenti birgə bəyanat qəbul etdilər. Bu sənədə imza atan təşkilatlar Azərbaycanın gələcəyi naminə ölkəmizlə əməkdaşlıqlarını davam etdirəcəklərini qeyd ediblər. Bu çox mühüm bir məsələdir. çox təəssüf ki, bir qrup adamlar seçkilərin belə sakit bir şəraitdə keçdiyini nəzərə almaq istəmirlər. Onlar ölkədəki bütün siyasi partiyaların iştirakını lazımi şəkildə qiymətləndirmədilər. Biz demək olar ki, bütün namizədlərə ölkənin İctimai Televiziyasında efir vaxtı ayırdıq. Onlar bu seçkilərlə bağlı beynəlxalq təşkilatların məqbul sayılan rəylərini də qəbul etmək istəmədilər və bizi tənqid və şantaj atəşinə tutdular. özü də ki, tək hakim partiyanı deyil, eyni zamanda, bunu beynəlxalq müşahidəçilərə qarşı da etdilər. Bu baxımdan, mən bir daha AŞPA-ya və onun üzvlərinə öz təşəkkürümü bildirmək istərdim. çünki seçkilərdə iştirak etmiş AŞPA üzvləri onların ATƏT Demokratik Təsisatlar və İnsan Hüquqları Bürosundan olan həmkarlarından fərqli olaraq vəziyyətin daha real tərəfini əks etdirdilər. Bu baxımdan, hesab edirəm ki, bu seçkilər birmənalı olaraq irəliyə atılan addımdır. Eyni zamanda, biz bu təşkilatın məsləhət və tövsiyələrini dinləməyə və əməkdaşlıq etməyə də hazırıq”.
Mövzu ətrafında çıxış edən Azərbaycan nümayəndə heyətinin üzvü Rafael Hüseynov AŞPA-dan Azərbaycandakı son parlament seçkilərində müşahidəçi olaraq iştirak etmiş bütün həmkarlarına minnətdarlığını bildirib. O, bu müşahidəçiliyi Azərbaycan xalqı və dövlətinə demokratiya yolunda daha bir addım irəliyə getmək üçün göstərilən kömək kimi qiymətləndirdiyini deyib. Onu da qeyd edək ki, dünən Azərbaycanın Avropa Şurasına üzvlüyünün 10 ili tamam olub, bu münasibətlə qurumun sessiyası çərçivəsində tədbirlər keçirilib.
Nardar BAYRAMLI

Paylaş:

Baxılıb: 961 dəfə