YAP nümayəndə heyətinin Rumıniyaya səfəri başlayıb

Bakı:

12°C

82%

0m/s

Əlaqə

AZ RU EN

Ana səhifə / Siyasət / YAP nümayəndə heyətinin Rumıniyaya səfəri başlayıb

YAP nümayəndə heyətinin Rumıniyaya səfəri başlayıb

18.02.2011 [10:55]

Səfər çərçivəsində YAP və PDL arasında “Əməkdaşlıq haqqında Anlaşma Memorandumu”nun imzalanması nəzərdə tutulub
Fevralın 16-da Yeni Azərbaycan Partiyası Sədrinin müavini-İcra katibi, millət vəkili Əli Əhmədovun rəhbərliyi ilə İcra katibinin müavini, millət vəkili Mübariz Qurbanlı və Milli Məclisin üzvü Asəf Hacıyevdən ibarət YAP nümayəndə heyətinin Rumıniyaya səfəri başlayıb. İki ölkənin hakim partiyaları arasında əməkdaşlıq əlaqələrinin qurulması məqsədilə Rumıniyanın Demokrat Liberal Partiyasının (PDL) dəvətinə əsasən həyata keçirilən bu səfər çərçivəsində YAP və PDL arasında “Əməkdaşlıq haqqında Anlaşma Memorandumu”nun imzalanması nəzərdə tutulub. Səfər proqramına fevralın 16-da Buxarestdəki Tey Parkındakı Heydər Əliyev xiyabanında ümummilli liderin büstü qarşısına əklil qoyulması ilə başlayan nümayəndə heyəti həmin gün Rumıniyanın Baş naziri, PDL-in sədri Emil Bok tərəfindən qəbul olunub. Görüşdə iki ölkə arasında əlaqələrin yüksək səviyyəsindən məmnunluq hissi ifadə olunub, partiyalar arasında əlaqələrin ikitərəfli münasibətlərə yeni təkan verəcəyi vurğulanıb. Söhbət zamanı strateji tərəfdaşlıq səviyyəsinə çatmış Azərbaycan-Rumıniya əlaqələrinin yüksələn xətt üzrə inkişafı qeyd olunub, Azərbaycan Respublikasının Prezidenti İlham Əliyevin Rumıniyaya, Rumıniya Prezidenti T.Baseskunun Azərbaycana səfərlərinin nəticəsində iki ölkə arasında münasibətlərin daha da genişlənməsi üçün etibarlı zəmin yarandığı nəzərə çatdırılıb.
Emil Bok bildirib ki, onun ölkəsi Azərbaycanla bütün sahələrdə əməkdaşlğın tərəfdarı olmaqla yanaşı, Azərbaycanın Ermənistan-Azərbaycan, Dağlıq Qarabağ münaqişəsinin beynəlxalq hüquq prinsipləri və ölkəmizin ərazi bütövlüyü çərçivəsində həllinə dair ədalətli mövqeyini həmişə müdafiə edib və edəcək. YAP Sədrinin müavini - İcra katibi, millət vəkili Ə.Əhmədov ikitərəfli münasibətlərin inkişaf etdirilməsi üçün böyük potensialın mövcud olduğunu qeyd edib, PDL nümayəndə heyətini Azərbaycana səfərə dəvət edib. Baş nazir dəvəti qəbul edərək yaxın gələcəkdə PDL nümayəndə heyətinin ölkəmizi ziyarət edəcəyini bildirib. Həmin gün Yeni Azərbaycan Partiyasının nümayəndə heyəti Buxarest şəhəri 2-ci sektorunun meri Nekulay Ontsanu və Rumıniya ziyalılarının nüayəndələri ilə görüşüb.
Görüşdə Rumıniya Akademiyasının vitse-prezidenti Marius Sala, Rumıniyanın Tərəqqisi Naminə Partiyasının fəxri sədri, keçmiş ədliyyə və xarici işlər naziri Kristian Diakonesku, Buxarest Yazıçılar Birliyinin sədri Horia Qırbya və digər şəxslər iştirak ediblər. Görüşdə Buxarest şəhəri 2-ci sektoru və Bakı şəhəri Səbail rayonu arasında yüksək dinamikaya sahib olan ikitərəfli münasibətlərdən bəhs olunub, ümummilli lider Heydər Əliyevin abidəsinin məhz bu sektorun ərazisində yerləşməsi faktı xüsusilə qeyd edilib. Həmçinin, bildirilib ki, xalqlarımız arasında əlaqələrin durmadan inkişaf etməsi bütövlükdə sülh, sabitlik, iqtisadi rifaha xidmət edir. Mer N.Ontsanu Heydər Əliyev Fondunun Rumıniya nümayəndəliyinin də bu sektorun ərazisində fəaliyyət göstərdiyini vurğulayaraq, həmin təşkilatın həyata keçirdiyi geniş humanitar və xeyriyyə işlərindən bəhs edib, Azərbaycana səfəri zamanı müşahidə etdiyi böyük quruculuq işlərinin və inkişafın onda dərin təəssürat yaratdığını əlavə edib.
YAP Sədrinin müavini - İcra katibi, millət vəkili Ə.Əhmədov söylənilən fikirlərə görə minnətdarlığını bildirib, görüşdə iştirak edən və Azərbaycana rəğbəti ilə seçilən rumın ziyalılarını ölkəmizə səfərə dəvət edib.
Günün ikinci yarısında YAP nümayəndə heyəti Türkiyə Respublikasının banisi Mustafa Kamal Atatürkün Buxarestdə yerləşən abidəsini ziyarət edib, büstün qarşısına çiçəklər qoyublar. Türkiyənin Rumıniyadakı səfirliyinin hərbi attaşesi, polkovnik M.Tural mərasimdə iştirak edib. Polkovnik M.Tural qeyd edib ki, Buxarestdəki büst Türkiyə liderinin xaricdə qoyulan ilk abidəsidir və Rumıniyada səfərdə olan Azərbaycan nümayəndə heyətlərinin Atatürkün, Türkiyə heyətlərinin isə ümummilli lider Heydər Əliyevin abidələrini ziyarət etməsi ənənə halını alıb. Görüşlərdə Azərbaycan Respublikasının Rumıniyadakı səfiri E.Həsənov iştirak edib.
YAP nümayəndə heyətinin Rumıniyaya səfəri davam edir.

Paylaş:

Baxılıb: 917 dəfə