Ermənistan yeni “missiya” axtarışına çıxıb

Bakı:

18 °C

82 %

0 m/s

Əlaqə

AZ RU EN

Ana səhifə / Siyasət / Ermənistan yeni “missiya” axtarışına çıxıb

Ermənistan yeni “missiya” axtarışına çıxıb

20.10.2022 [11:09]

İrəvan Aİ-nin ardınca ATƏT-ə də müraciət göndərib

Avropa İttifaqının (Aİ) ardınca ATƏT də Ermənistana müşahidəçi missiyası göndərə bilər. Belə ki, Ermənistan Azərbaycanla sərhədə müşahidəçilər göndərmək üçün ATƏT-ə müraciət edib.

Bu barədə Ermənistan xarici işlər naziri Ararat Mirzoyan norveçli həmkarı ilə keçirdiyi mətbuat konfransında deyib. Mirzoyanın sözlərinə görə, hazırda Ermənistan - Azərbaycan sərhədinə ATƏT-dən müşahidəçilərin göndərilməsinin mümkünlüyü müzakirə olunur. Onların Ermənistan ərazisində yerləşdirilməsi planlaşdırılır. “Biz bu məsələyə yaxın vaxtlarda aydınlıq gətirəcəyik”, - deyə erməni nazir bildirib.

Maraqlıdır ki, 28 ildən artıq Ermənistan ilə Azərbaycan arasındakı keçmiş münaqişənin tənzimlənməsinə “vasitəçilik edən” ATƏT heç bir müsbət fəaliyyəti ilə yadda qalmamışdı. Astanada MDB Dövlət Başçıları Şurasının iclasındakı çıxışında da Prezident İlham Əliyev bildirdi ki, 28 il ərzində Minsk qrupunun nəticəsi sıfra bərabərdir: “İndi göründüyü kimi, bu qurumun başlıca məqsədi münaqişənin nizamlanması yox, onun dondurulması idi. Danışıqların aparılması münaqişənin hələ uzun illər həll olunmaması üçün yalnız pərdə idi”.

Artıq münaqişə həll olunub, Azərbaycan öz gücü ilə torpaqlarını işğaldan azad edib. Belə olan təqdirdə, Ermənistanın ATƏT-in müşahidə missiyasını öz ölkəsinə dəvət etməklə tarixin arxivinə yollanan bir qurumu dirçəltmək cəhdləri başadüşülən deyil. İkinci bir tərəfdən, Aİ missiyasının ardınca ATƏT missiyasına da “dəvət” göndərən Ermənistan bununla nə etmək istəyir? Rəsmi İrəvanın “missiya axtarışları”nın arxasında hansı məqsədlər dayanır? Maraqlıdır ki, Ermənistan üzvü olduğu, hətta sədrlik etdiyi KTMT-nin müşahidə missiyasının Ermənistana gəlməsi və fəaliyyəti üçün bu qədər “can yandırmır”. Demək ki, Ermənistana müşahidə missiyası və ya müşahidəçi lazım deyil. Rəsmi İrəvan açıq bazarda özünə dəstək alverinə çıxıb.

Məsələ ilə bağlı fikirlərini bölüşən politoloq İlqar Vəlizadə bildirib ki, Ermənistan tərəfi bu missiyaları öz ölkəsinə yığmaqla Azərbaycana təzyiq göstərmək istəyir. Bu, bəlli bir məsələdir: “Son açıqlamalarında Ermənistan rəsmiləri açıq şəkildə bildirirlər ki, Aİ missiyasının əsas məqsədi Azərbaycanın guya Ermənistana olan “təcavüzünü” dayandırmaq, bu “faktı” təsdiqləməkdir. Onlar hətta Azərbaycanın bu yöndə atılacaq “növbəti addımlarının” qarşısını almaq üçün bu missiyalara müraciət etdiklərini bildirirlər. Aydın məsələdir ki, bu missiyalar Ermənistanın əlində vasitəyə çevriləcəksə, ortaya konstruktiv yanaşma qoyulmayacaqsa, Azərbaycan buna qarşı çıxacaq. Avropa İttifaqının mülki missiyasından əlavə digər beynəlxalq təsisatların da missiyalarının İrəvana dəvət edilməsi ilə onlar təzyiqlərin hərtərəfli xarakter daşıya biləcəyini nümayiş etdirmək istəyir. Onlar bu yolla Azərbaycanı öz siyasətindən çəkindirməyə cəhd edəcəklər. Digər tərəfdən isə, Avropa İttifaqının vasitəçiliyi ilə aparılan Brüssel sülh danışıqlarında Azərbaycanın təklənməsini istəyirlər. Yəni, Aİ ilə Ermənistan Azərbaycana təzyiqlər göstərə biləcəyini düşünür. Fikrimcə, onların düşüncəsi bundan ibarətdir”.

İ.Vəlizadə bildirib ki, Ermənistanın indiki halda müşahidə missiyası üçün ATƏT-ə üz tutmasının da səbəbləri bəllidir. Onlar bu yolla ATƏT-in Minsk Qrupunu dirçəltmək istəyirlər. “Bu müraciətin əsas məqsədi ondan ibarətdir ki, Ermənistan ATƏT-in əli ilə öz yarımçıq qalan planlarını həyata keçirməyə niyyətlənib. Vaxtilə ATƏT-in Minsk qrupu vasitəsilə münaqişə dondurulmuşdu. 2020-ci ildə 44 günlük müharibə nəticəsində münaqişə bitdi, Azərbaycan öz ərazi bütövlüyünü təmin etdi. Artıq sülhün imzalanması prosesi gedir. Çox güman ki, Ermənistan tərəfi hazırki vəziyyəti qeyri-müəyyən halda saxlamaq, dondurmaq üçün ATƏT-dən kömək umur. Çünki ATƏT-in funksionallığı burada daha çox görünür. O baxımdan ki, həm Ermənistan, həm də Azərbaycan ATƏT-in üzvləridir. Düşünürlər ki, ATƏT missiyasının fəaliyyəti Azərbaycana təsir edə bilər. Amma bunların hamısı siyasi oyunlardır və nəticə verməyəcək. Nə Ermənistan öz məqsədlərinə nail ola bilər, nə də ATƏT burada hər hansı bir rol oynaya bilər”, - deyən politoloqun fikrincə, Ermənistanın müşahidə missiyası üçün üzvü olduğu KTMT-yə yox, ATƏT-ə üz tutmasının da səbəbləri var. Ermənistan anlayır ki, KTMT-nin əli ilə Azərbaycana təzyiq göstərə bilməyəcək: “KTMT üzvləri Ermənistana açıq şəkildə başa salıblar ki, hər hansı bir anti-Azərbaycan kampaniyasında iştirak etməyəcəklər, daha çox neytral mövqedə dayanacaqlar. Neytrallıq isə Ermənistana lazım deyil. Ermənistana vasitə lazımdır. Ona görə də KTMT ilə bu yöndə əvvəllər danışıqlar aparılsa da, bu danışıqlar formal xarakter daşıyıb”.

P.İSMAYILOV

Paylaş:

Baxılıb: 698 dəfə