"Mitinq komitəsi" yaratdıqlarını iddia edənlər təfəkkürlərini ötən 23 ildə dəyişmədiklərini bir daha təsdiq etmiş oldular

Bakı:

8°C

87%

0m/s

AZ RU EN

Ana səhifə / Siyasət / "Mitinq komitəsi" yaratdıqlarını iddia edənlər təfəkkürlərini ötən 23 ildə dəyişmədiklərini bir daha təsdiq etmiş oldular

"Mitinq komitəsi" yaratdıqlarını iddia edənlər təfəkkürlərini ötən 23 ildə dəyişmədiklərini bir daha təsdiq etmiş oldular

31.03.2011 [09:44]

Maraqlı xarici qüvvələrin əlində əsirə çevrilən, özünü “müxalifət” adlandıran, amma heç bir siyasi elektorata malik olmayan və xalq tərəfindən birmənalı şəkildə dəstəklənməyən radikal qüvvələr yenidən Azərbaycanda siyasi sabitliyi pozmağa çalışırlar. Belə ki, bir sıra xarici dövlətlərdə baş verən hadisələrdən “ruhlanaraq” ölkədə siyasi qarışıqlıq törətməyə çalışan radikal müxalifət təmsilçilərinin yaratdıqları “ictimai palata” adlı əldəqayırma qurum aprelin 2-də mitinq keçirmək istəyir. Əslində, onların bu istəkləri özlərini yenidən gülüş obyektinə çevirməkdən başqa bir şey deyil. Bunun üçün sadəcə, bir müddət öncə özlərini həmin “palatanın” lokomotivi sayan partiyaların keçirdikləri aksiyaları göz önünə gətirmək bəs edir. Həmin aksiyalara nəinki adam çıxara, hətta qəzetlərində tirajlamaq üçün kütləvi şəkil belə çəkə bilməyən radikal müxalifətin məqsədi aydındır.
Ən maraqlı məsələ isə onların “mitinq komitəsi” yaratmaları ilə bağlı yaydıqları informasiyalardır. Məhz sözügedən informasiya radikal müxalifətin hələ də 1988-90-cı illərin nostaljisi ilə yaşadıqlarını bir daha təsdiq edir. Qeyd etmək lazımdır ki, həmin dövrdə Sovet imperiyasına qarşı ittifaq respublikalarında keçirilən kütləvi mitinqlər üçün mitinq komitələri yaranırdı. Bu isə imperiya güclərinə qalib gəlmək məqsədilə xalq hərəkatının formalaşdırdığı komitələr idi. Həmin komitələrin yaranmasında əsas məqsəd xalqların suverenlik, imperiya əsarətində saxlanılan respublikaların müstəqillik əldə etməsi idi. Digər tərəfdən, həmin dövrdə bütün etiraz aksiyaları Azərbaycanı müstəqilliyə qovuşdurmaq üçün keçirilirdi və bu xalqın etirazı idi...
Bəs, elə isə bu gün radikal müxalifətin yaratdığı “mitinq komitəsi” kimə və ya nəyə qarşı yönəlib? Cavab aydındır. Onlar məhz ölkəmizin müstəqilliyinə qarşı “mitinq komitəsi” yaradırlar. Ən əsası xalq tərəfindən dəstəklənməyən, məhdud bir çevrədən ibarət olan bu mitinq “azarkeşləri” xaricdən aldıqları maddi vəsaitin müqabilində Azərbaycanda mövcud olan demokratik, hüquqi dövlətçiliyə kölgə salmağa çalışırlar.
Bəli, “mitinq komitəsi” ifadəsi 20 ildən də artıq bir müddətdə tarixin arxivinə qovuşub. ötən dövrdə çox şey dəyişib. Məlum olduğu kimi, Sovet imperiyasının dağılmasının ardından uçurumun bir addımına gətirilən, bəzi qüvvələrin min yerə parçalamağa çalışdıqları Azərbaycan məhz Ulu öndər Heydər Əliyevin uzaqgörən siyasəti nəticəsində öz müstəqilliyini və bütövlüyünü qorudu. Bu gün özünü müxalifət adlandırıb xalqına, dövlətinə düşmən kəsilən qüvvələrin hakimiyyətdə olduqları vaxt dağıtdığı ölkə iqtisadiyyatı bərpa olundu və Azərbaycan yerləşdiyi regionunun ən inkişaf etmiş dövlətinə çevrildi. Şəxsi qoruma dəstələri, AXC-Müsavat funksionerlərinin saxladıqları qoçu dəstələri ləğv edildi, ölkəmizdə mərkəzi hakimiyyətə tabe olan, nizam-intizamlı ordu yaradıldı. Ən əsası isə Azərbaycanda vətəndaş cəmiyyəti, vətəndaş birliyi yaradıldı, demokratik pinsiplər bərqərar oldu. Amma görünən odur ki, müxalifət düşərgəsinin və özünü “lider” adlandıranların təfəkkürü hələ də 1988-90-cı illərdədir.
Məlum olduğu kimi, bu gün özünü siyasi qüvvə kimi təsdiq etmək və ya siyasətlə məşğul olaq istəyən hər bir partiya üçün Azərbaycanda yüksək səviyyədə şərait yaradılıb. ölkədə şəffaf, ədalətli, azad seçki hüququ mövcuddur, hər bir Azərbaycan vətəndaşına Konstitusiyaya əsasən seçmək və seçilmək hüququ verilib. Eyni zamanda, partiyaların fəaliyyət göstərməsi, seçkidə iştirak etməsi üçün dövlət bütünlüklə imkan yaradıb. Bundan başqa, ölkəmizdə mükəmməl seçki qanunu və Avropa standartları əsasında yaradılan, beynəlxalq mütəxəssislərlə birgə hazırlanan Seçki Məcəlləsi mövcuddur. Azərbaycanda bu qədər demokratik bir şərait olduğu halda müxalifət nə üçün öz siyasi məqsədləri uğruna mitinq keçirmək istəyir. Maraqlı olan budur ki, bu gün xarici qüvvələrin təhriki ilə “mitinq komitəsi” yaradan, gözdən pərdə asmaqdan ötrü min bir oyun çıxaran həmin müxalifət qüvvələri seçki dövründə bir dəfə də olsun kütləvi aksiya keçirmir və Seçki Məcəlləsi ilə onlara verilən bu hüquqlardan istifadə etmirlər. Təbii ki, bunun bir səbəbi var. Azərbaycan müxalifəti xalq tərəfindən birmənalı şəkildə dəstəklənmədiyini bilir və seçkinin nəticələrində də uğur əldə etməyəcəyini dərk edir. Bu səbəbdən də özünü yenidən cəmiyyətin gülüş obyektinə çevirməmək üçün onlar kütləvi aksiyalardan çəkinirlər. Bu gün isə icazəsiz şəkildə 3-5 nəfərlə küçədə tamaşa göstərərək gözdən pərdə asmaq, həm də “özünütəsdiq kampaniyası” yaratmaq istəyirlər. Bu isə özünüifşadan o yana bir şey vermir...
Təəssüf ki, siyasi rəqabəti yalnız xalqına, dövlətinə qarşı olan qüvvələrin təhrikçisinə çevrilmək, qeyri-sivil davranışlar sərgiləmək şəklində qavrayan, bu cür addımları ilə xalqın gözündə daha da kiçilən və siyasi palitradan silindikləri reallığı ilə barışmayan müxalifət dairələri xalqın iradəsinə və seçiminə belə hörmət göstərmirlər. Əgər hörmət göstərsəydilər o zaman bu dağıdıcı qüvvələr xalqın onlara birdəfəlik yox deməsi ilə barışardı...
Pərviz SADAYOÄžLU

Paylaş:

Baxılıb: 871 dəfə