Vardanyan Qərb mətbuatının hədəfində...

Bakı:

23 °C

57 %

1 m/s

Əlaqə

AZ RU EN

Ana səhifə / Siyasət / Vardanyan Qərb mətbuatının hədəfində...

Vardanyan Qərb mətbuatının hədəfində...

21.02.2023 [10:46]

İsveçrənin SFR teleradio şirkəti: Ruben Vardanyan Rusiyanın “Troyka” bankının rəhbəri idi və çirkli pulların yuyulması ilə bağlı beynəlxalq sistemdə mərkəzçi rollardan birini oynayırdı.

Cinayətkar oliqarx Ruben Vardanyanın Rusiya sülhməramlıları kontingentinin müvəqqəti yerləşdiyi Qarabağ ərazilərində görünməsi Qərb mediasının da diqqətindədir. Onun əsasən Rusiyanın müəyyən dairələri tərəfindən Qarabağa göndərilməsinin səbəbləri isə artıq geniş müzakirə obyektinə çevrilib. Daha dəqiq desək, “Vardanyan kartı”, yaxud “Vardanyan layihəsi” adı altındakı siyasi oyunun təməlində dayanan məsələlərdən biri də budur ki, o, sözügedən plan əsasında məhz “Qərbin uşağı” kimi tanınan Paşinyan hakimiyyətini devirməli, özünü onunla əvəzləməlidir. Yəni, Qarabağdakı separatçı rejim Vardanyanın Ermənistana transferi üçün bir növ “tramplin” rolunu oynamalıdır.

“Moskvanın marioneti” kimi təqdim olunub

Azərbaycan Prezidenti İlham Əliyev də Münhen konfransında bu məsələyə xüsusi olaraq toxunub və Vardanyan layihəsinin hansı məqsədlərə söykəndiyini açıq şəkildə bəyan edib. Bu reallıq yalnız Azərbaycana məxsus faydalı qazıntıların separatçı-quldur rejim tərəfindən talanması, ekologiyamıza, flora və faunamıza vurulan ciddi ziyanlarla əlaqələndirilmir, həm də bütövlükdə suveren ərazilərimizə qarşı müdaxilə olaraq qiymətləndirilir. Məhz bu yanaşmalar Ruben Vardanyanın korrupsioner fəaliyyəti ilə yanaşı, digər cəhdlərini açığa çıxarmış olur.

Beləliklə, Rusiya sülhməramlıları kontingentinin müvəqqəti yerləşdikləri ərazilərdəki özbaşınalıqlar İsveçrənin nüfuzlu SFR teleradio şirkətinin də diqqətindən kənarda qalmayıb. Vardanyanın cinayətkar fəaliyyətinə həsr olunmuş verilişin başlığı da diqqət çəkib. Daha dəqiq desək, Vardanyan “Moskvanın marioneti” olaraq təqdim olunub.

Verilişdə qeyd edilib ki, onun bütün aktivləri paralel olaraq korrupsiya fəaliyyəti ilə bağlıdır. “Vardanyan Rusiyanın “Troyka”“ bankının rəhbəri idi və çirkli pulların yuyulması ilə bağlı beynəlxalq sistemdə mərkəzçi rollardan birini oynayırdı”, - deyə vurğulayan SFR telekanalı əlavə edib ki, oliqarx ötən il Ermənistanda faktiki olaraq “vətəndaş cəmiyyəti” hərəkatı yaradıb və siyasi partiyaya daxil olub. “Onun Qarabağdakı işi Ermənistandakı siyasi karyerasının xeyrinə hesablana bilər”, - deyə verilişdə bildirilir və qeyd olunur ki, Ruben Vardanyan regiona Ermənistanın baş naziri Nikol Paşinyana siyasi alternativ şəklində göndərilib.

“El mundo Financiero” qaçaq oliqarxa qarşı...

Xatırlatmaq yerinə düşərdi ki, Qərb mediası ilk dəfə deyil ki, cinayətkar oliqarxı hədəfə alır. Bundan əvvəl İspaniya mətbuatı da Vardanyanın sülhməramlıların müvəqqəti məskunlaşdığı zonada missiyası haqqında silsilə yazıları ilə çıxış edib. “El mundo Financiero” nəşri Rey Universitetinin professoru Xuan Karlosun qaçaq oliqarxın Qarabağda peyda olması ətrafında və siyasi manevrləri barədə yazıb.

“Vardanyanın Rusiya vətəndaşlığından imtinasının arxasında Avropa İttifaqının tətbiq etdiyi sanksiyalardan yayınma cəhdi ilə yanaşı, Ermənistanın hazırkı baş naziri Nikol Paşinyanın dəyişdirilməsi əməliyyatı da ola bilər”, - deyə məqalədə xüsusi olaraq vurğulanıb.

Bu faktlar isə əbəs yerə Qərb mətbuatı səhifələrində yer almır. Çünki reallıq, beynəlxalq hüquq və həqiqət Qarabağın Azərbaycanın ayrılmaz ərazisi olduğunu kifayət qədər isbatlayır. Belə olan halda isə Qarabağın hansısa bəlli siyasi mərkəzlərin əlində siyasi alət kimi istifadə edilməsi ilk növbədə Cənubi Qafqazda dayanıqlı sülhün əldə edilməsinə ciddi maneələr yaratmaqdadır. Hər halda, “Vardanyan kartının”, yaxud “layihəsinin” qısa zamanda iflasa uğrayacağı da an məsələsinə çevrilib və hadisələr də məhz bu istiqamətdə inkişaf etməkdədir.

Emin

Paylaş:

Baxılıb: 638 dəfə