Lui Bononun ölkəmizə səfəri...

Bakı:

26 °C

54 %

2 m/s

Əlaqə

AZ RU EN

Ana səhifə / Siyasət / Lui Bononun ölkəmizə səfəri...

Lui Bononun ölkəmizə səfəri...

20.04.2023 [10:18]

ABŞ Cənubi Qafqazda sülhün təmin olunmasında maraqlıdır

Nardar BAYRAMLI

Hazırda regionda baş verən proseslər, Azərbaycanla Ermənistanın münasibətlərinin normallaşdırılmasına dair aparılan danışıqlar beynəlxalq birliyin maraq dairəsindədir. Bu mənada ABŞ da prosesləri diqqətlə izləyir. Aprelin 17-də ABŞ Dövlət Departamentinin Qafqaz danışıqları üzrə baş müşaviri Lui Bononun ölkəmizə səfəri və xarici işlər naziri Ceyhun Bayramovla görüşü bunu təsdiqləyir. Görüş zamanı, Azərbaycan-Ermənistan sülh sazişi üzrə danışıqlar prosesinin gələcək perspektivləri, eyni zamanda, Azərbaycan-Ermənistan normallaşma prosesinin digər komponentləri müzakirə olunub.

Nazir Ceyhun Bayramov üçtərəfli bəyanat çərçivəsində Ermənistanın öhdəliklərini yerinə yetirmədiyini, qüvvələrini Azərbaycan ərazilərindən tam çıxarmadığını, Azərbaycanın 8 kəndini işğal altında saxladığını, mütəmadi hərbi və siyasi təxribatlarını davam etdirdiyini diqqətə çatdırıb. Bununla yanaşı, Azərbaycanın iki hərbçisinin əsir götürüldüyü, əsirlərdən birinə qarşı fiziki zorakılıq tətbiq edildiyi, onların dərhal azad edilməsinin vacib olduğunu bildirib. Tərəflər, həmçinin qarşılıqlı maraq doğuran digər məsələlər ətrafında fikir mübadiləsi aparıblar.

Qeyd edək ki, həmin gün XİN rəhbəri Ceyhun Bayramovun ABŞ dövlət katibinin Avropa və Avrasiya məsələləri üzrə köməkçisi vəzifəsini icra edən Derek Hoqan arasında da telefon danışığı olub. Telefon danışığı zamanı Azərbaycan ilə ABŞ arasında əməkdaşlıq gündəliyində duran aktual məsələlər, regionda cari vəziyyət, o cümlədən Ermənistanla Azərbaycan arasında sülh gündəliyi müzakirə edilib.

Ümumiyyətlə, Cənubi Qafqazda sülhün və təhlükəsizliyin təmin olunması, o cümlədən Azərbaycanla Ermənistan arasında münasibətlərin normallaşdırılması üçün müxtəlif beynəlxalq təşəbbüslər mövcuddur. Azərbaycan regionda sülhün təmin olunması naminə irəli sürülən bütün təşəbbüsləri müsbət qarşılayır. Məhz bu səbəbdən də, dövlətimiz bu proseslə bağlı təklif edilən görüşlərdə və danışıqlarda iştirak edir. Keçirilən hər bir görüş sülhə xidmət etməlidir. İkinci Qarabağ müharibəsi Rusiyanın vasitəçiliyi ilə 10 noyabr birgə bəyanatının imzalanması ilə yekunlaşdı. Lakin bunun ardınca regionda sabitliyin dayanıqlı təmin olunması üçün Azərbaycanla Ermənistan arasında sülh sazişinin imzalanması gündəmə gəldi. 44 günlük müharibənin Azərbaycanın qələbəsi ilə bitməsindən sonra Avropa İttifaqı da Cənubi Qafqazın sülh və əməkdaşlıq məkanına çevrilməsi üçün fəal vasitəçiliyə başladı. Belə ki, Avropa İttifaqı Şurasının Prezidenti Şarl Mişelin təşəbbüsü ilə Azərbaycan və Ermənistan liderlərinin bir neçə görüşü keçirilib. Rəsmi Bakı “Brüssel formatı”nı dəstəklədiyini bəyan edib.

Eyni zamanda, ABŞ da bu prosesdə fəal iştirak edir. Belə ki, Birləşmiş Ştatların dövlət katibi Entoni Blinken mütəmadi olaraq hər iki ölkənin liderlərinə telefon zəngi edərək sülh prosesini müzakirə edir. Blinken sonuncu dəfə martın 21-də Azərbaycan Prezidenti İlham Əliyevə zəng edib. Bu fakt da göstərir ki, ABŞ regionda sülhün, təhlükəsizliyin və sabitliyin qorunmasında maraqlıdır. Dövlət katibi bir daha vurğulayıb ki, ABŞ Azərbaycanla Ermənistan arasında münasibətlərin normallaşdırılması və sülh müqaviləsinin imzalanması üçün səylərini bundan sonra da davam etdirəcək. Onun təşəbbüsü ilə Azərbaycan və Ermənistanın liderləri bu ilin fevral ayında Münhen Təhlükəsizlik Konfransı çərçivəsində görüş də keçiriblər.

ABŞ Cənubi Qafqaz regionunu sülh və əməkdaşlıq məkanı kimi görmək istəyir. Rəsmi Vaşinqtonun sülh prosesində vasitəçilik missiyası da buna hədəflənib. Amma unutmaq lazım deyil ki, Ermənistan indiyə qədər sülh prosesini pozmağa çalışıb, bu məqsədlə müxtəlif təxribatlar törədib. Burada məqsəd Azərbaycan haqqında beynəlxalq ictimaiyyətdə mənfi rəy yaratmaqdır. Ermənist?nın hakimiyyəti ilə yanaşı erməni diasporu və lobbisi də qarayaxma kampaniyasında aktiv iştirak edir. Bütün bunlar isə sülh təşəbbüslərinə zərbə vurur. Amma Azərbaycan öz mövqeyində haqlıdır və bunu bütün dünyaya bəyan edir. Ona görə də, beynəlxalq birlik, o cümlədən ABŞ sülhə gəlmək üçün Ermənistana təzyiq göstərməlidir.

Paylaş:

Baxılıb: 499 dəfə