Azərbaycan-İsrail əlaqələri...

Bakı:

14 °C

77 %

1 m/s

Əlaqə

AZ RU EN

Ana səhifə / Siyasət / Azərbaycan-İsrail əlaqələri...

Azərbaycan-İsrail əlaqələri...

21.04.2023 [10:11]

İsrailin xarici işlər naziri Eli Kohenin ölkəmizə səfəri münasibətlərin inkişafının göstəricisidir

Azərbaycanın xarici siyasətində dünya ölkələri ilə qarşılıqlı etimada əsaslanan bərabəhüquqlu münasibətlərin qurulması prioritetdir. Bu siyasət nəticəsində ölkəmizin xarici əlaqələri, dostluq münasibətləri daim güclənir. Azərbaycana yaxın dost və tərəfdaş ölkələrdən biri də İsrail dövlətidir. Azərbaycan və İsrail xalqları arasında dostluq əlaqələrinin qədim tarixi var. Bu xalqlar həmişə bir-birinin dilinə, dininə, mədəniyyətinə dərin hörmətlə, ehtiramla yanaşıblar. Bugünlərdə İsrailin xarici işlər naziri Eli Kohenin rəhbərlik etdiyi nümayəndə heyətinin ölkəmizə səfəri qarşılıqlı əlaqələrin inkişafının göstəricisidir. Aprelin 19-da Azərbaycanın xarici işlər naziri Ceyhun Bayramov ölkəmizdə səfərdə olan İsrail Dövlətinin xarici işlər naziri Eli Kohenin rəhbərlik etdiyi nümayəndə heyəti ilə görüşüb. Görüşdə iki ölkə arasında ikitərəfli və çoxtərəfli çərçivədə əməkdaşlığın mövcud səviyyəsindən məmnunluq ifadə olunaraq, ölkəmizin İsrail Dövləti ilə müxtəlif sahələrdə əlaqələrin inkişafına və uğurlu əməkdaşlığın genişləndirilməsinə böyük əhəmiyyət verdiyi diqqətə çatdırılıb.

Nazirlər çoxşaxəli əməkdaşlıq gündəliyində duran siyasi, iqtisadi, o cümlədən energetika, təhsil və tədqiqat, yüksək texnologiyalar, rəqəmsallaşma, turizm, humanitar və bir çox başqa sahələr daxil olmaqla əməkdaşlığın inkişaf etdirilməsi məsələləri ətrafında fikir mübadiləsi aparıblar. Bakıda iclası keçirilən Azərbaycan Hökuməti ilə İsrail Hökuməti arasında Birgə Komissiyanın fəaliyyəti təqdir edilib və münasibətlərin daha da şaxələndirilməsinə töhfə verəcəyinə əminlik ifadə olunub.

Azərbaycanla İsrail arasında tarixi dostluğa, əməkdaşlığa söykənən əlaqələrin mövcudluğundan söz açan Ceyhun Bayramov iki ölkə arasında qarşılıqlı səfərlərin, o cümlədən təmasların əhəmiyyətindən bəhs edib. Bu xüsusda keçirilən görüşlərin və aparılan müzakirələrin tərəfdaşlığımızın daha da dərinləşdirilməsi, habelə ikitərəfli dialoqun daha da inkişaf etdirilməsi baxımından mühüm olduğu diqqətə çatdırılıb.

Görüşdə ölkəmizin İsraildə səfirliyinin açılmasının son 30 ildə inkişaf edən və yeni keyfiyyət mərhələsinə qədəm qoyan Azərbaycan-İsrail münasibətlərinin gücləndirilməsinə töhfə verəcəyinə əminlik ifadə olunub. Tərəflər ikitərəfli münasibətlərin bütün istiqamətləri, habelə beynəlxalq və regional məsələlər üzrə müxtəlif səviyyələrdə siyasi dialoqun bundan sonra da inkişaf etdirilməsinə hazır olduqlarını ifadə ediblər. Söhbət zamanı, həmçinin qarşılıqlı maraq doğuran digər məsələlər ətrafında müzakirələr aparılıb.

Səfər çərçivəsində nazirlər tərəfindən “Azərbaycan Respublikası Hökuməti ilə İsrail Dövləti Hökuməti arasında 2023-2026-cı illər üçün Təhsil sahəsində əməkdaşlıq proqramı” imzalanıb.

Azərbaycan tarixən müxtəlif millətlərin və fərqli dinlərin daşıyıcılarının dinc, yanaşı yaşadığı, milli və dini tolerantlığın hökm sürdüyü ölkədir. Azərbaycanda hər zaman hər bir dinin daşıyıcısına və millətin nümayəndəsinə bərabər münasibət göstərilib və göstərilməkdədir. İstər Birinci Qarabağ müharibəsində, istərsə də sonrakı dövrlərdə ölkəmizdə yaşayan xalqların nümayəndələri Vətən uğrunda canlarından keçiblər. Azərbaycanın Milli Qəhrəmanı, milliyyətcə yəhudi olan Albert Aqarunovun xatirəsi bu gün hamı üçün çox əzizdir. Onun xatirəsi ölkəmizdə əbədiləşdirilib. 44 günlük Vətən müharibəsi zamanı da Azərbaycanda yaşayan bütün xalqların nümayəndələri, o cümlədən yəhudilər dövlətimizin, Prezidentimizin ətrafında sıx birləşdilər, torpaqlarımızın erməni işğalından azadlığı uğrunda ortaya qoyulan dəmir iradəni qətiyyətlə dəstəklədilər.

44 günlük Vətən müharibəsində İsrail dövləti də Azərbaycanın ədalətli mövqeyini müdafiə etdi. Ölkələrimiz arasında hərbi-texniki sahədə də yaxşı əlaqələr var. İsraildən alınan müasir silahlar torpaqlarımızın işğaldan azad olunmasında öz sözünü dedi.

Bu il martın 29-da İsraildə Azərbaycanın səfirliyinin açılması isə münasibətlərimizin daha da inkişafında yeni mərhələnin başlanğıcıdır. Səfirliyin açılış mərasimində iştirak edən xarici işlər naziri Ceyhun Bayramov İsrailin Prezidenti, Baş naziri, müdafiə və xarici işlər nazirləri ilə görüş keçirib. Bütün görüşlərdə Azərbaycan-İsrail münasibətlərin yüksələn xətlə inkişafından məmnunluq ifadə edilib. Beləliklə, xalqlarımızın mənafelərinə uyğun olaraq ölkələrimiz arasında əlaqələrin dərinləşdirilməsi, qarşılıqlı faydalı əməkdaşlığımızın daha da genişləndirilməsi istiqamətində birgə səylər bundan sonra da uğurla davam etdiriləcək.

Nardar BAYRAMLI

Paylaş:

Baxılıb: 484 dəfə