Ağdam-Xankəndi yolu vasitəsilə...

Bakı:

30 °C

45 %

5 m/s

Əlaqə

AZ RU EN

Ana səhifə / Siyasət / Ağdam-Xankəndi yolu vasitəsilə...

Ağdam-Xankəndi yolu vasitəsilə...

26.06.2023 [10:20]

Politoloq: Bu yol ilə humanitar missiyanı reallaşdırmaq tamamilə mümkündür

NARDAR

Azərbaycanın xarici işlər naziri Ceyhun Bayramov iyunun 24-də Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri Draqana Kojiçlə görüşərkən diqqətçəkən təşəbbüslə çıxış edib. İlk olaraq qeyd edək ki, görüş zamanı Azərbaycanla BQXK arasında əməkdaşlıq məsələləri, Laçın yolu ətrafında vəziyyət, habelə BQXK-nin Azərbaycanın Xankəndi şəhərində fəaliyyəti məsələləri müzakirə olunub. Nazir BQXK vasitəsilə Qarabağda yaşayan erməni sakinlərimizin tibbi məqsədlər üçün Laçın sərhəd məntəqəsindən keçidinə və zəruri tibbi ləvazimatların təchizatına imkan yaratmağa Azərbaycan tərəfinin hazır olduğunu bildirib. Mövcud vəziyyətlə əlaqədar erməni sakinlərin digər tədarük ehtiyaclarına gəldikdə, Azərbaycan tərəfinin BQXK vasitəsilə Ağdam-Xankəndi yolundan istifadə etməklə yardım göstərmək imkanının mövcud olduğu qeyd edilib.

Laçın sərhəd-buraxılış məntəqəsinin fəaliyyəti ilə bağlı yaranmış vəziyyətə münasibət bildirən Ceyhun Bayramov deyib ki, məntəqə təsis ediləndən sonra gündəlik əsasda erməni sakinlərin hər iki istiqamətdə şəffaf, təhlükəsiz və nizamlanan keçidi üçün müvafiq şərait yaradılıb. Aprelin 23-dən etibarən yüzlərlə erməni sakinin keçidi təmin olunub. Lakin iyunun 15-də Ermənistan Laçın postunu atəşə tutub. Azərbaycan tərəfinin hazırda sərhəd məntəqəsindən təhlükəsiz keçidə mane olmuş Ermənistanın bu hücumunu araşdırmaq məqsədilə müvafiq tədbirlər gördüyü diqqətə çatdırılıb.

Burada diqqətçəkən məqamlardan biri Azərbaycan tərəfinin BQXK vasitəsilə Ağdam-Xankəndi yolundan istifadə etməklə yardım göstərmək təklifidir. Dövlətimiz Qarabağ bölgəsində yaşayan etnik erməni sakinlərinin bərabərhüquqlu vətəndaşlar kimi Azərbaycanın siyasi, hüquqi, iqtisadi və sosial çərçivəsinə yenidən inteqrasiyasında qərarlıdır. Bu xüsusda, dövlətlərin daxili işlərinə qarışmamaq, milli azlıqlara mənsub şəxslərin inteqrasiyasına xələl gətirməmək və ya qonşu dövlətlərin ərazisində separatizmi qızışdırmamaq üzrə Ermənistan öz öhdəliklərinə ciddi şəkildə riayət etməlidir. Mövzu ilə bağlı qəzetimizə açıqlama verən politoloq İlyas Hüseynov bildirib ki, Azərbaycanın Həkəri çayı üzərində qurduğu sərhəd nəzarət-buraxılış məntəqəsinin fəaliyyəti tamamilə şəffaf tənzimlənirdi. Qarabağdakı erməni sakinlərimiz çox rahat şəkildə bu keçiddən istifadə edirdilər. Lakin Ermənistanın davamlı siyasi-hərbi təxribatları, eləcə də, nəzarət-buraxılış məntəqəsini atəşə tutması nəticəsində Dövlət Sərhəd Xidmətinin hərbi qulluqçusu yaralandı. Və haqlı olaraq Azərbaycan izahat tələb etməyə başladı.

Politoloqun sözlərinə görə, Azərbaycanın istəyi bundan ibarətdir ki, Ermənistan bir daha belə halın baş verməyəcəyinə zəmanət versin. Rəsmi İrəvan baş vermiş insidenti üzərinə götürməli, təxribatı törədənlər cəzalandırılmalıdır. Təəssüf ki, Paşinyan hakimiyyəti sülhü pozan hərəkətlərindən boyun qaçırır, əksinə bütün bunlardan Azərbaycana qarşı istifadə etməyə çalışırlar. Lakin Azərbaycandakı diplomatik korpusun nümayəndələri bölgəyə səfər etdilər və əyani şəkildə gördülər ki, Laçındakı pos?dan tam istifadə etmək mümkündür. Çünki Azərbaycan bütün lazımi şərait yaradıb. Sadəcə, Ermənistanın hərbi təxribatları buna imkan vermir.

“Digər tərəfdən, dövlətimiz Qarabağda yaşayan erməni vətəndaşlarımızın təhlükəsizliyini, sağlamlığını və təminatını da öz üzərinə götürə bilər. Xarici işlər naziri Ceyhun Bayramovun BQXK-nin ölkəmizdəki nümayəndəsi ilə görüşündə bu məsələ diqqət mərkəzində olub. Yəni, Ağdam-Xankəndi yolu ilə humanitar missiyanı reallaşdırmaq tam mümkündür. Düşünürəm ki, proses məhz dövlətimizin dəstəyi ilə baş tutmalıdır. Çünki kənar dəstək, Ermənistanın dəstəyi ilə humanitar yardımlar siyasi məqsəd daşıyır. Azərbaycanın istəyi budur ki, Qarabağ ermənilərinin cəmiyyətimizə reinteqrasiya prosesi sürətləndirilsin, bölgəni hərbisizləşdirilməklə dayanıqlı sülh təmin olunsun. Əks təqdirdə, biz görürük ki, Ermənistan vəziyyətdən sui-istifadə edir, Azərbaycanın humanist jestinə qarşı atəş açır, mövqelərimiz atəşə tutulur. Ona görə də, Laçın sərhəd-buraxılış məntəqəsindən mülki insanların keçdiyini nəzərə alaraq Azərbaycan bu sərhəd postunda təhlükəsizliyi birtərəfli qaydada təmin etmək məsuliyyətini öz üzərinə götürür”, - deyə İ.Hüseynov vurğulayıb.

Bundan əlavə, Azərbaycan postmünaqişə dövründə böyük bərpa və yenidənqurma işləri həyata keçirir. Lakin Ermənistan tərəfindən dəqiq mina xəritələrinin verilməməsi, habelə mina təhdidinin davam etdirilməsi görülən işlərə böyük maneədir.

Bütövlükdə, əgər rəsmi İrəvan bölgədə sülh və təhlükəsizliyin təmin olunmasını istəyirsə, təxribatlardan çəkinməli, əsassız yerə Azərbaycanı ittiham etməməli və beynəlxalq ictimaiyyəti çaşdırmamalıdır. Ən doğru yol isə Ermənistanın üzərinə götürdüyü öhdəlikləri yerinə yetirməsi və Azərbaycanın şərtlərini qəbul etməsidir.

Paylaş:

Baxılıb: 684 dəfə