Yayın “yeməyi”...

Bakı:

9°C

100%

1m/s

Əlaqə

AZ RU EN

Ana səhifə / Sosial / Yayın “yeməyi”...

Yayın “yeməyi”...

04.06.2025 [08:04]

Hansı qidalara üstünlük verək?

Sağlam olmağın vacib şərtlərindən biri düzgün qidalanmadır. Rahat və gümrah həyat sürmək istəyiriksə, ilk növbədə, sağlamlığın və gözəlliyin harmoniyası olan düzgün qidalanma qaydalarına riayət etməliyik. Gün ərzində qəbul etdiyimiz qidalar orqanizmin ehtiyac duyduğu vitamin və mineralları təmin etməlidir. Təsadüfi deyil ki, xəstəliklərin əksəriyyəti düzgün qidalanmama nəticəsində orqanizmdə maddələr mübadiləsinin pozulması ilə əlaqədar baş verir.

Artıq yay mövsümü başlayıb. Havaların isti keçdiyi günlərdə qida rasionunda nələrə diqqət etməli olduğumuz aktuallıq kəsb edir. Mütəxəssislər də yay mövsümündə xəstəliklərin əsas səbəbinin qidalanma ilə əlaqədar olduğunu bildirirlər. Məlumdur ki, isti havalarda qidalardan zəhərlənmə, həmçinin müxtəlif infeksion xəstəliklərin yaranması çoxalır.

Yuxu rejimi vacibdir...

Mövzu barədə “Yeni Azərbaycan”a danışan dietoloq Şəfa Yadigarova bildirib ki, yay fəsli maddələr mübadiləsinin aktivləşdiyi bir fəsildir: “Qışdan fərqli olaraq, bu fəsldə qan dövranı yaxşılaşır. İnsanlar yayda daha çox istirahət edirlər, fiziki aktivliyi ön plana çəkirlər. Havalar isti keçdiyinə görə, istər-istəməz çox su içirik. Daha çox detoks sularından istifadə edirik. Yediyimiz qidalar daha rahat həzm olunur. Buna baxmayaraq qida rejiminə diqqət etmək lazımdır.

Yay fəsli daxili orqanların, hormonların sürət mexanizminə çox yaxşı təsir göstərir. Odur ki, hormonların sürət mexanizminin daha da aktivləşməsi üçün yuxu rejiminə düzgün əməl etməli, səhər tezdən oyanmalı və yüngül fiziki idman hərəkətləri etməliyik. Açıq havada yoqa ilə məşğul olmaq, yürüş etmək də olar. Bu, xüsusən səhər və axşam saatlarında daha faydalıdır”.

Ağartı məhsulları...

Dietoloqun sözlərinə görə, isti havalarda su içmək vacibdir: “Meyvə-tərəvəzlərin tərkibindəki xeyirli maddələr səhər saatlarında mənimsənilir. Ona görə də səhərlər meyvə şirələrinə də üstünlük versək, gün ərzində daha pozitiv, daha gümrah olarıq. Yay fəslinin əsas vacib şərti odur ki, axşam yeməyi yüngül olsun. Çünki, axşam saatlarında həzm sistemi ağır işləyir. Ona görə də, çiy və ya bişmiş tərəvəzlərə, ev şəraitində hazırlanmış detoks çaylarına və ağartı məhsuluna üstünlük vermək lazımdır”.

Bu qidalardan uzaq durun...

Ş.Yadigarova qeyd edib ki, yay fəslində orqanizmin vitamin balansını tənzimləmək üçün təbii meyvə-tərəvəzlər yemək vacibdir: “İsti aylarda əlavə vitamin qəbulu məsləhət deyil. Çünki orqanizm bu fəsildə zəhərli toksinlər ifraz etməyə başlayır. Yəni istənilən dərman preparatlarının tərkibindəki maddə orqanizm tərəfindən mənimsənilmir. Yay fəslində əti və yağlı qidaları bir kənara qoymaq lazımdır. Dana əti belə orqanizmə bu aylarda mənfi təsir göstərir. Eləcə də quzu ətindən hazırlanmış qidaların tərkibindəki ağır xolestrin orqanizm tərəfindən yaxşı mənimsənilmir”.

Yayda kərə yağı həzm olunmur

Dietoloqun sözlərinə görə, zülal insan orqanizmi üçün vacibdir: “Zülallar həm heyvan, həm də bitki mənşəli olur. Qışda ət məhsullarına üstünlük verilir. Yayda isə bitki mənşəli zülal qəbul edilməlidir. Çalışıb paxlalı bitkilər yemək lazımdır. Tərəvəz, toyuq şorbaları içmək olar. Yayda kərə yağı həzm olunmur, orqanizmdən sovrulmur. Buna görə də yeməkləri bitki yağı ilə hazırlamaq məsləhətdir. Yayda eyni zamanda yumurtadan da az istifadə etmək lazımdır”.

Yeganə BAYRAMOVA

Paylaş:

Baxılıb: 150 dəfə