Ünvanlı sosial yardımların təyinatı və ödənişində şəffaflığın təmin olunması ilə bağlı brifinq keçirilib

Bakı:

14 °C

72 %

5 m/s

AZ RU EN

Ana səhifə / Sosial / Ünvanlı sosial yardımların təyinatı və ödənişində şəffaflığın təmin olunması ilə bağlı brifinq keçirilib

Ünvanlı sosial yardımların təyinatı və ödənişində şəffaflığın təmin olunması ilə bağlı brifinq keçirilib

09.11.2013 [12:30]

Əmək və Əhalinin Sosial Müdafiəsi Nazirliyi (ƏƏSMN) yanında Dövlət Sosial Təminat Xidməti ünvanlı dövlət sosial yardımlarının təyinatı və ödənişində şəffaflığın təmin olunması ilə bağlı tədbir keçirib. Tədbirdə çıxış edən ƏƏSMN yanında Dövlət Sosial Təminat Xidmətinin rəisi Çingiz Əliyev ünvanlı dövlət sosial yardımlarının təyinatı və ödənişinə nəzarətin həyata keçirilməsinin nazirliyin mühüm fəaliyyət sahələrindən biri olduğunu qeyd edərək bildirib ki, bu sahədə ötən müddətdə yol verilmiş nöqsanların, korrupsiyaya şərait yaradan halların aradan qaldırılması, şəffaflığın təmin olunması istiqamətində nazirliyin yeni rəhbərliyi tərəfindən artıq müvafiq tədbirlərə başlanılıb. Aztəminatlı əhali qrupları bu tədbirlərin müsbət nəticələrini yaxın vaxtlarda hiss edə biləcəklər.
Noyabrın 4-də rayon və şəhər Əhalinin Sosial Müdafiəsi Mərkəzlərinin (ƏSMM) direktorlarının iştirakı ilə nazirlikdə iclas keçirildiyini diqqətə çatdıran Çingiz Əliyev həmin iclasda ünvanlı sosial yardımların təyin olunması və ödənişi işlərində hər hansı neqativ hala yol verilməməsi və şəffaflığın təmin olunması ilə bağlı mərkəz direktorlarına ciddi tapşırıqlar verildiyini vurğulayıb. Qeyd olunub ki, bu tapşırıqların icrası daim diqqətdə saxlanılacaq və yardım üçün müraciət edən vətəndaşlarla münasibətlərdə korrupsiya əməlinə yol verən əməkdaşlarla bağlı ciddi tədbirlər görüləcək. Eyni zamanda, hüquq-mühafizə orqanları ilə bu sahədə müvafiq nəzarət formalarının tətbiq olunması məqsədilə söhbətlər aparılıb və yardımların təyinatı işlərində qanunsuzluğa yol verən əməkdaşların ifşa olunaraq cəzalandırılması üçün birgə tədbirlər görüləcək.
Bu tədbirlərin daha effektli nəticələr verməsi üçün vətəndaşların da daha aktiv olmalarının vacibliyini diqqətə çatdıran Çingiz Əliyev bu ay ünvanlı yardım alacaq 134 mindən artıq ailəyə KİV vasitəsilə müraciət edərək, bildirib ki, təyin olunmuş yardımların alınması üçün onlara banklar tərəfindən verilmiş plastik kartları heç bir halda mərkəz əməkdaşlarına verməsinlər. Çünki bu ünvanlı yardımlar dövlət tərəfindən aztəminatlı ailələr üçün ayrılır və onlar bu vəsaitləri öz maddi ehtiyaclarına sərf etməlidirlər.
Heç bir əməkdaş vətəndaşları təyin olunmuş yardımı onlarla bölüşməyə təhrik edə, yaxud əks halda onları yardım almaq hüququndan məhrum edə bilməz.
Eyni zamanda, həmin vətəndaşlar əhalinin sosial müdafiəsi mərkəzlərində yardım təyinatı müqabilində onlarla aparılan hər hansı qanunsuz “sövdələşmələr”ə getməməli və belə hallarla üzləşdikləri təqdirdə nazirliyin 142 - Qaynar xəttinə, yaxud (012) 595 53 81, (012) 595 04 28 və (012) 595 04 26 nömrəli telefonlara müraciət etməlidirlər.
Ünvanlı yardımların təyinatı sahəsində şəffaflığın təmin olunması istiqamətində daha bir yenilik olaraq, əməkhaqları və pensiyalar, sosial müavinətlər kimi, növbəti ilin yanvar ayından etibarən ünvanlı yardımlar da aylıq hesablara köçürüləcək, yəni, bu sahədə ödənişdə hər hansı “gecikmə” tam aradan qaldırılacaq.
Pərviz SADAYOĞLU

Paylaş:

Baxılıb: 1398 dəfə