“Azercell” ilə BDU arasında əməkdaşlıq memorandumu imzalanıb

Bakı:

28 °C

49 %

8 m/s

Əlaqə

AZ RU EN

Ana səhifə / Sosial / “Azercell” ilə BDU arasında əməkdaşlıq memorandumu imzalanıb

“Azercell” ilə BDU arasında əməkdaşlıq memorandumu imzalanıb

22.10.2015 [10:30]

Ölkənin lider mobil operatoru “Azercell Telekom”un “Barama” İnnovasiya və Sahibkarlıq Mərkəzi yeni maraqlı layihələr həyata keçirməkdə davam edir. Ötən gün isə “Barama” mərkəzi ölkəmizin ən nüfuzlu ali təhsil ocaqlarından biri olan Bakı Dövlət Universiteti (BDU) ilə əməkdaşlıq memorandumu imzalayıb. Bu məqsədlə təşkil olunan mərasimdə çıxış edən “Azercell Telekom” MMC-nin prezidenti Vahid Mürsəliyev bildirib ki, bu yeni əməkdaşlıq BDU-nun tələbələrinin texnoloji innovasiyalara yaxın olmasına və gələcəkdə uğurlu biznes qurmasına dəstək olaraq, “Barama” mərkəzində yeni uğurlu layihələrin həyata keçirilməsinə zəmin yaradacaq. Fəaliyyət göstərdiyi 19 il ərzində “Azercell Telekom” MMC-nin Azərbaycanda təhsilin inkişafına, təcrübəli kadrların yetişdirilməsinə hər zaman dəstək verdiyini diqqətə çatdıran şirkətin prezidenti, daha sonra, “Azercell”in bu istiqamətdə fəaliyyətini bu gün də uğurla davam etdirdiyini vurğulayıb.
BDU-nun rektoru, akademik Abel Məhərrəmov isə, öz növbəsində, imzalanan memorandumun Azərbaycan təhsilinin inkişafına öz töhfəsini verəcəyinə və tələbələrin “Azercell” və “Barama” təcrübəsindən faydalanacağına inandığını bildirib.
Qeyd olunub ki, 2009-cu ildən fəaliyyətə başlayan “Barama” mərkəzi ölkəmizdə yerli start-upların üzə çıxmasına yardımçı olaraq, gənclər arasında həm texnoloji biliklərin, həm də sahibkarlıq bacarıqlarının inkişaf etdirilməsinə şərait yaradır. Mərkəz bazarda innovativ mühitin inkişaf etdirilməsi üçün bir sıra qlobal təşkilatlar, qurumlar və qeyri-hökumət təşkilatları ilə də əməkdaşlıq edir. Xatırladaq ki, bir müddət öncə ölkənin ən iri banklarından biri olan “PAŞA Bank” da “Barama” mərkəzi çərçivəsində ölkədə gənc sahibkarlara dəstək olmaq üçün “Azercell” ilə əməkdaşlıq etməyə başlayıb.
Şirkətdən verilən məlumatda, həmçinin qeyd olunur ki, fəaliyyətdə olduğu müddət ərzində ölkədə peşəkar jurnalist kadrlarının inkişaf etdirilməsinə öz töhfəsini vermiş Azərbaycanın lider mobil operatoru “Azercell Telekom” ötən ilin mayında BDU-nun jurnalistika fakültəsinin tələbələri üçün peşə təlimi təşkil edib. Təlimçi qismində Böyük Britaniyadan dəvət olunmuş beynəlxalq miqyaslı jurnalist Den Meyson iştirak edib. Qeyd etmək yerinə düşərdi ki, “Azercell” ilə Azərbaycanın ali təhsil ocaqları arasında sıx əməkdaşlıq mövcuddur. “Azercell Telekom” öz fəaliyyəti boyunca daim gənclərin inkişafına yönələn layihələr həyata keçirir. Şirkətin elan etdiyi Tələbə Proqramı çərçivəsində Azərbaycanın ali təhsil müəssisələrində təhsil alan qabiliyyətli gənclərimiz “Azercell”dən xüsusi təqaüd və şirkətin müxtəlif şöbələrində təcrübə keçmək imkanı qazanırlar.
Məlumatda qeyd olunur ki, təhsilə və gənclərə yardım etmək bundan sonra da “Azercell”in prioritet fəaliyyət sahəsi olacaq.
Səlim LOĞMANOĞLU

Paylaş:

Baxılıb: 842 dəfə