Gəncədə süni qiymət artımına qarşı market və mağazalarda yoxlamalara başlanılıb

Bakı:

17°C

67%

3m/s

Əlaqə

AZ RU EN

Ana səhifə / Sosial / Gəncədə süni qiymət artımına qarşı market və mağazalarda yoxlamalara başlanılıb

Gəncədə süni qiymət artımına qarşı market və mağazalarda yoxlamalara başlanılıb

16.01.2016 [10:25]

Prezident İlham Əliyevin süni qiymət artımının qarşısının alınması ilə bağlı tapşırığına əsasən, Gəncədə istehlak bazarına nəzarət etmək üçün komissiya yaradılıb. Bununla bağlı keçirilən iclasda rayon rəhbərliyi, sahibkarlar, şəhər ictimaiyyəti iştirak edib.
AZƏRTAC xəbər verir ki, şəhər İcra Hakimiyyətinin başçısı Elmar Vəliyev son vaxtlar dünya iqtisadiyyatında baş verən proseslərin ölkəmizə də təsirindən, manatın devalvasiyasından sonra yaranan iqtisadi çətinliklərdən danışıb, qiymətlərin obyektiv səbəblərlə yanaşı, həm də süni şəkildə artırılması hallarına rast gəlindiyini diqqətə çatdırıb. Ölkəmizdə istehsal olunan məhsulların qiymətlərinin süni artırılmasının qarşısının alınması üçün ciddi tədbirlər görüldüyü bildirilib. Qeyd edilib ki, istehlak bazarına nəzarət edən komissiya yaradılıb. Hüquq mühafizə orqanları və dövlət qurumlarının nümayəndələrinin də daxil olduğu komissiya mobil qruplar şəklində market və mağazalarda müşahidələrə başlayıb.
Sahibkarların fəaliyyətinə dövlət dəstəyi də iclasda əsas müzakirə mövzularından biri olub. İcra Hakimiyyətinin başçısı Gəncədə Qafqazın ən böyük ət kəsimi məntəqəsinin 3 ayadək fəaliyyətə başlaması üçün 5 milyon manat kredit verildiyini, 300 nəfərin çalışacağı Gəncə gips zavodu üçün 15 hektar torpaq sahəsinin ayrıldığını diqqətə çatdırıb. Qeyd edilib ki, dövlətimizin başçısının tapşırığına uyğun olaraq Gəncədə fəaliyyət göstərən sahibkarlara Sahibkarlığa Kömək Milli Fondu tərəfindən ilkin mərhələdə 100 milyon manat güzəştli kreditlərin ayrılması da müəyyənləşdirilib.
Det.Al alüminium zavodunun fəaliyyətini dayandırması haqqında bəzi KİV-lərdə yayılan xəbərlərin əsasının olmadığı, kompleksin tam gücü ilə işlədiyi də diqqətə çatdırılıb. Bildirilib ki, şəhərdə aparılan tikinti-quruculuq işləri, sosial və infrastruktur layihələrinin icrası bundan sonra da davam etdiriləcək.
Toplantıda vətəndaşların müraciətləri dinlənilib, şəhər sakinlərini narahat edən problemlərin əksəriyyəti, o cümlədən 54 tələbənin təhsil haqqının ödənilməsi ilə bağlı müraciət öz həllini tapıb. Təxminən 10 ailəyə fərdi ev tikintisi üçün torpaq sahəsinin ayrılması barədə göstəriş verilib.
Çıxış edənlər dövlətimizin başçısının manatın devalvasiyaya uğramasından sonra yaranan iqtisadi çətinliklərin aradan qaldırılması ilə bağlı tapşırıq və tövsiyələrinin uğurlu nəticələr verəcəyinə əmin olduqlarını bildiriblər.

Paylaş:

Baxılıb: 667 dəfə