Beynəlxalq Ətraf Mühit Günü ilə əlaqədar Heydər Əliyev Mərkəzində “dəyirmi masa” təşkil olunub

Bakı:

10 °C

87 %

6 m/s

Əlaqə

AZ RU EN

Ana səhifə / Sosial / Beynəlxalq Ətraf Mühit Günü ilə əlaqədar Heydər Əliyev Mərkəzində “dəyirmi masa” təşkil olunub

Beynəlxalq Ətraf Mühit Günü ilə əlaqədar Heydər Əliyev Mərkəzində “dəyirmi masa” təşkil olunub

03.06.2016 [10:01]

İyunun 2-də IDEA İctimai Birliyinin təşəbbüsü ilə Heydər Əliyev Mərkəzində Beynəlxalq Ətraf Mühit Günü ilə əlaqədar “Vəhşi heyvanların qaçaqmalçılığı” mövzusunda “dəyirmi masa” keçirilib.
İctimai Birlikdən AZƏRTAC-a verilən məlumata görə, tədbirdə aidiyyəti dövlət qurumlarının, o cümlədən hüquq mühafizə orqanlarının nümayəndələri, elm xadimləri, araşdırmaçılar, vətəndaş cəmiyyəti təşkilatları və beynəlxalq qurumların təmsilçiləri iştirak ediblər.
“Dəyirmi masa”da BMT-nin Ətraf Mühit Proqramının (UNEP) icraçı direktorunun Beynəlxalq Ətraf Mühit Günü ilə bağlı videomüraciəti dinlənilib və vəhşi heyvanların qanunsuz ticarəti barədə arayış təqdim olunub. Həmçinin dəyərli fauna növlərinin qlobal ticarəti, qazanc məqsədilə nəsli kəsilməkdə olan heyvan növlərinin öldürülməsi və qaçaqmalçılığı probleminin ölkəmizə mümkün təsirləri müzakirə edilib.
Qeyd olunub ki, IDEA-nın təsisçisi Leyla Əliyevanın təşəbbüsü ilə “Qafqazın böyük beşliyi” - regionun nəsli kəsilmək təhlükəsi altında olan 5 əsas heyvan növü (bəbir, ceyran, qonur ayı, boz canavar və imperial qartalı) müəyyən edilib. Ötən dövr ərzində IDEA İctimai Birliyi Ekologiya və Təbii Sərvətlər Nazirliyi və beynəlxalq tərəfdaşlarla birlikdə bu dəyərli növlərin mühafizəsi ilə bağlı bir sıra uğurlu layihələr həyata keçirib. Nəticədə bu növlərin mühafizə gücləndirilib, yaşayış arealları bərpa olunub və heyvanların təbii artımı üçün əlverişli şərait yaradılıb. Bununla belə, dünyada olduğu kimi, ölkəmizdə də vəhşi təbiətin mühafizəsi səylərinə ən böyük əngəllərdən biri onların mənfəət məqsədilə öldürülməsi və qanunsuz ticarətidir.
Çıxış edənlər təbiətimizin nadir flora və fauna növlərinin daha səmərəli mühafizəsi üçün qanunvericiliyin təkmiləşdirilməsi və institusional tədbirlərin bundan sonra da davam etdirilməsinin vacibliyini vurğulayıbıar. Bununla yanaşı, qabaqcıl beynəlxalq təcrübənin ölkəmizdə tətbiqi ilə bağlı təkliflər irəli sürülüb. Təkliflər baxılması üçün aidiyyəti dövlət qurumlarına göndərilib.
Xatırladaq ki, BMT Baş Assambleyasının 1972-ci ildə qəbul etdiyi qətnamə ilə 5 iyun tarixi Beynəlxalq Ətraf Mühit Günü elan edilib və həmin tarixdən etibarən hər il bütün dünyada qeyd olunur. UNEP-in qərarına əsasən, Beynəlxalq Ətraf Mühit Gününün 2016-cı ildə “Vəhşi heyvanların qanunsuz ticarəti ilə mübarizə” mövzusuna həsr olunub.

Paylaş:

Baxılıb: 692 dəfə