Qubadlı rayon İcra Hakimiyyətində 2016-cı ilin doqquz ayının yekunları ilə bağlı hesabat yığıncağı keçirilib

Bakı:

16 °C

77 %

2 m/s

AZ RU EN

Ana səhifə / Sosial / Qubadlı rayon İcra Hakimiyyətində 2016-cı ilin doqquz ayının yekunları ilə bağlı hesabat yığıncağı keçirilib

Qubadlı rayon İcra Hakimiyyətində 2016-cı ilin doqquz ayının yekunları ilə bağlı hesabat yığıncağı keçirilib

15.10.2016 [10:38]

Dünən Qubadlı rayon İcra Hakimiyyətində 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş yığıncaq keçirilib. Yığıncaqda rayon İcra Hakimiyyətinin nümayəndələri, rayonun idarə, müəssisə və təşkilat rəhbərləri, ictimaiyyət nümayəndələri iştirak ediblər.
Tədbirdə çıxış edən rayon İcra Hakimiyyətinin başçısı Malik İsaqov ötən 9 ayda ölkəmizin sosial-iqtisadi, mədəni inkişaf sahələrində yeni-yeni uğurlar qazandığını dilə gətirib. Bu inkişafın təməlində Azərbaycan Respublikasının Prezidenti İlham Əliyevin yürütdüyü şaxələndirilmiş iqtisadi siyasətin, yaradılmış daxili sabitliyin dayandığını bildirən M.İsaqov ötən 9 ayın ən mühüm hadisəsinin Azərbaycan Respublikasının Konstitusiyasına əlavə və dəyişikliklərlə bağlı sentyabrın 26-da keçirilən referendum olduğunu bildirib. Qeyd olunub ki, Qubadlı seçiciləri bu siyasi kampaniyada fəallıqla iştirak ediblər və Konstitusiyaya edilən dəyişikliklərə öz müsbət münasibətlərini bildiriblər.
Ötən 9 ayda görülmüş işlərlə bağlı məruzə ilə çıxış edən Sosial-iqtisadi inkişafın təhlili və proqnozlaşdırılması şöbəsinin müdir müavini, YAP Qubadlı rayon təşkilatının sədri Allahverdi Haxverdiyev məcburi köçkünlərin mənzil-məişət şəraitlərinin yaxşılaşması, kommunal problemlərinin həlli istiqamətində atılan addımlardan danışıb. A.Haxverdiyev bildirib ki, cari hesabat dövründə Saatlı, Sabirabad rayonlarında yaşayan 5 ailə yeni mənzillə təmin edilib, “Dövlətqaçqınkom” tərəfindən Sumqayıt şəhər 10 saylı Peşə Liseyində yaşayan 3 ailəyə mənzil tikilib. Sumqayıt şəhərində rayon İcra Hakimiyyəti tərəfindən əvvəllər tikilmiş sosial obyektlərdə layihələndirmə aparılaraq qaz sayğacının quraşdırılması təmin edilib. Vurğulanıb ki, Qubadlı rayonundan olan məcburi köçkünlərin müraciətləri əsasında problemlərin həlli ilə bağlı lazımi addımlar atılıb. Sarıqaya qəsəbəsində yerləşən Kondisionerlər zavodunun yanğın zamanı yararsız hala düşmüş sanatoriya binası qısa vaxt ərzində əsaslı təmir edilərək yenidən köçkünlərin istifadəsinə verilib, yanğından zərər çəkən ailələrə maddi yardım göstərilib: “Eyni zamanda ötən 9 ay ərzində 110 ailəyə ünvanlı sosial yardım təyin edilib. Ümumilikdə isə rayon üzrə 366 ailənin hər birinə 142,8 manat ünvanlı sosial yardım ödənilir”.
Hesabat yığıncağında rayon Mərkəzi Xəstəxanasının baş həkimi Nüsrət Əhmədov, rayon Təhsil şöbəsinin müdiri Afət Allahverdiyeva, rayon Mədəniyyət və Turizm şöbəsinin müdiri İlham Əhmədov və Mahmudlu kənd inzibati ərazi dairəsi üzrə nümayəndə Azər Eminovun çıxışları dinlənilib. Tədbirin sonunda gündəlikdəki məsələ ilə bağlı qərar layihəsi qəbul edilib.
Pərviz SADAYOĞLU

Paylaş:

Baxılıb: 695 dəfə