Mingəçevirdə icbari tibbi sığortanın tətbiqi ilə bağlı görüş keçirilib

Bakı:

24 °C

54 %

3 m/s

Əlaqə

AZ RU EN

Ana səhifə / Sosial / Mingəçevirdə icbari tibbi sığortanın tətbiqi ilə bağlı görüş keçirilib

Mingəçevirdə icbari tibbi sığortanın tətbiqi ilə bağlı görüş keçirilib

20.10.2016 [10:08]

Oktyabrın 19-da Nazirlər Kabineti yanında İcbari Tibbi Sığorta üzrə Dövlət Agentliyi (İTSDA) Mingəçevirdə İcbari Tibbi Sığorta Sisteminin (İTS) tətbiqi ilə əlaqədar şəhər sakinləri ilə görüş keçirib.
AZƏRTAC xəbər verir ki, tədbiri Mingəçevir şəhər İcra Hakimiyyətinin başçısı Niyazi Bayramov açıb. Bildirib ki, bugünkü görüşü ölkədə icbari tibbi sığortanın tətbiqi kimi qiymətləndirmək olar. Tibbi xidmətlərin keyfiyyətini artıracaq layihənin başlanğıc nöqtəsində dayanmaq Mingəçevir şəhəri üçün qürurvericidir.
İTSDA direktoru Zaur Əliyev qeyd edib ki, İcbari Tibbi Sığorta hökumətin sosial siyasətinin yeni istiqamətidir. Mingəçevir iqtisadi potensialı olan şəhərdir. İqtisadi imkanların yüksəlməsi əhalinin həyat səviyyəsinə, o cümlədən səhiyyə xidmətlərindən istifadəsinə də təsir göstərir. Mingəçevirin icbari tibbi sığortada pilot seçilməsi də şəhərin iqtisadi imkanlarına, Azərbaycan iqtisadiyyatında oynadığı rola bağlıdır.
Agentlik direktoru vurğulayıb ki, Prezident İlham Əliyevin tapşırığına əsasən, ölkə vətəndaşlarının daha keyfiyyətli tibbi xidmətlərlə təmin olunması, əhalinin sağlamlığının qorunmasına İcbari Tibbi Sığorta öz töhfəsini verməlidir.
Daha sonra Zaur Əliyev icbari tibbi sığortanın baza zərfi haqqında söhbət açıb. Zərfə təqribən 1800-dən artıq müayinə, müalicə, diaqnostik prosedur, cərrahiyə əməliyyatı və digər tibbi xidmətlər daxildir. Lakin dövlət proqramları tərəfindən dəstəklənən bir sıra xəstəliklərin müalicəsi icbari tibbi sığortanın baza zərfinə daxil edilməyib. Gələcək illərdə həmin xəstəliklər üzrə də təminat vermək nəzərdən keçirilir. Agentlik direktoru qeyd edib ki, icbari tibbi sığortanın pilot rayonlarda tətbiqi başa çatdıqdan sonra mərhələli şəkildə bütün ölkə ərazisində tətbiq olunacaq.
Səhiyyə Nazirliyinin nümayəndəsi Viktor Qasımov qeyd edib ki, Mingəçevirin səhiyyə sistemində islahatlar aparılıb. O bildirib ki, icbari tibbi sığortanın tətbiqi yeni maliyyə mənbələrinin yaradılmasına, tibbi xidmətlərin keyfiyyətinin yüksəldilməsinə və pilotun uğurlu nailiyyətlərinin bütün Azərbaycan ərazisində yayılmasına dəstək verəcək.
Milli Məclisin deputatı Musa Urud vurğulayıb ki, dünyada tətbiq edilən icbari tibbi sığortanın 200 ildən çox yaşı var. İcbari tibbi sığorta səhiyyənin maliyyələşməsinin ən optimal yoludur.
Milli Məclisin deputatı Məlahət İbrahimova qeyd edib ki, icbari tibbi sığortanın tətbiqi sosial islahatların aparılmasını tələb edir. Onun fikrincə, icbari tibbi sığorta həkimlərin daha səylə işləməsinə səbəb olacaq və bu sistem səhiyyənin maliyyə potensialını artırmağa kömək edəcək.
İTSDA-nın şöbə müdirləri İsa Əliyev və Vüqar Qurbanov sualları cavablandırıblar.

Paylaş:

Baxılıb: 660 dəfə