Azərbaycançılıq dünya azərbaycanlılarının vahid ideologiyasına çevrilib

Bakı:

10 °C

87 %

4 m/s

Əlaqə

AZ RU EN

Ana səhifə / Sosial / Azərbaycançılıq dünya azərbaycanlılarının vahid ideologiyasına çevrilib

Azərbaycançılıq dünya azərbaycanlılarının vahid ideologiyasına çevrilib

02.11.2016 [09:55]

Hazırda dünyada bir sıra xalqlar fiziki müstəqilliyə malik olsalar da, onlar heç də mənəvi və tam müstəqilliyə malik deyillər. Çünki həmin xalqların söykəndiyi vahid ideologiya yoxdur. İdeologiyası olmayan bir dövlətin uzunömürlü olması isə mümkün deyil.
Bildiyimiz kimi, Azərbaycançılıq termini ölkənin siyasi həyatında yaxın illərdən başlayaraq istifadə olunur. BU, lap əvvəldən ölkədə yaşayan bütün etnik qrup və xalqları ümumdövlət mənafeləri əsasında real surətdə birləşdirmək və separatçılıq əhval-ruhiyyələri ilə mübarizəyə yönəldilmiş ideya kimi irəli sürülmüşdü. Sonralar bu ideya ölkədə geniş dəstəkləndi, yeni elementlər və strukturlarla dolğunlaşaraq ideologiya xüsusiyyəti kəsb etdi.
Ulu öndər Heydər Əliyev tərəfindən irəli sürülən Azərbaycançılıq ideyası Azərbaycanın dünya birliyinə inteqrasiyasının təməl sütunlarından birini təşkil edirdi. Ümummilli lider Heydər Əliyev Azərbaycançılıq ideologiyasını Azərbaycan dövlətinin ideoloji siyasətinin ana xətlərindən birinə çevirərkən ilk növbədə tarix boyu əldə edilmiş zəngin təcrübədən məharətlə istifadə etdi.
Ulu öndər Heydər Əliyev Azərbaycançılığı yeni tarixi şəraitdə milli dövlətçilik ideologiyası kimi sistemə saldı. Nəticədə Azərbaycançılıq ümummilli ideyaya və dünya azərbaycanlılarının vahid ideologiyasına çevrildi.
Azərbaycançılıq ideologiyası milli dövlətçilik ideologiyası kimi mühüm funksional elementlərlə zəngindir. Bunların mahiyyəti ölkəni hər hansı bir mənəvi və fiziki baxımdan zəiflətmək cəhdlərindən qorumaqdır. Azərbaycançılıq ideologiyası real müstəqilliyə nail olmaq, vahid, bölünməz Azərbaycanı qoruyub saxlamaq və möhkəmləndirmək üçün unikal vasitədir. Bu ideologiya unitar, hüquqi və demokratik dövlət kimi Azərbaycanın möhkəmləndirilməsinə və inkişafına yönəldilmişdir.
Azərbaycançılıq əsrlər boyu eyni bir ərazidə yaşayan, ümumi psixoloji cəhətlərə malik, oxşar sosiomədəni dəyərlərin daşıyıcısı olan xalqların, etnik birliklərin tarixi müəyyənləşmə formasıdır. Onun hədəfi Azərbaycanda yaşayan bütün əhali qrupları arasında həmrəyliyin və qarşılıqlı faydalı əməkdaşlığın möhkəmləndirilməsindən, vahid Vətən ruhunun müdafiəsindən ibarətdir. Real müstəqillik, demokratik normalara söykənən stabillik və ictimai tərəqqi bu prinsipdən kənarda mümkün deyil.
Azərbaycançılıq yüksək milli nizam-intizamın, dövləti şüurun, birgəyaşayış və birgəfəaliyyət mədəniyyətinin həm səbəbi, həm də nəticəsidir. Azərbaycançılıq ideyasının dərk olunmasının əsasında Azərbaycan xalqının tarixi, mənəvi-əxlaqi, mədəni ənənələri zəminində birlik ideyası durur. Bu ideologiya, dünyada və ölkəmizdə gedən ictimai proseslərin tarixi mənasını Azərbaycan xalqının mənafeyi baxımından izah edir.
Müasir mərhələdə qloballaşma milliliyə məxsus ən aparıcı keyfiyyətlərə güclü təsir edərək onu sıradan çıxarmağa meyillidir. Odur ki, qloballaşmanın fəsadlı təsirindən qorunmaq üçün milli ideologiyanın təbliği xüsusi əhəmiyyət daşıyır. Buna görə də hər bir azərbaycanlı Vətən, xalq və millət qarşısında özünün mənəvi borcunu şərəflə yerinə yetirməlidir. Dünyanın hansı guşəsində olmağımızdan, hansı məqsədə qulluq etməyimizdən asılı olmayaraq, Azərbaycan üçün əsl azərbaycanlı kimi nəsə etməyə çalışmaq və ya bunu etmək istəyən soydaşlarımıza dəstək vermək hər birimizin həyat şüarı, ən müqəddəs vəzifəsi olmalıdır. Diaspor təşkilatları tərkibində, tələbə qruplarında, internet bloqlarında, sərhəddə, kitabxanada, təhsildə, tibbdə, siyasətdə, elmdə bu xalqın, bu Vətənin adının ön sıralarda səslənməsi bu Vətənin övladlarından - Azərbaycan üçün əsl azərbaycanlı kimi düşünən və çalışanlardan asılıdır.
Ulu öndər Heydər Əliyev 2001-ci il noyabrın 9-da Dünya Azərbaycanlılarının I Qurultayında dövlətin siyasətini səciyyələndirərkən onun ən üstün hissəsini vurğulamışdır: “Azərbaycan dövlət müstəqilliyini əldə edəndən sonra Azərbaycançılıq aparıcı ideya kimi, həm Azərbaycanda, həm də bütün dünyada yaşayan azərbaycanlılar üçün əsas ideya olubdur. Biz həmişə bu ideya ətrafında birləşməliyik. Azərbaycançılıq öz milli mənsubiyyətini, milli-mənəvi dəyərlərini qoruyub saxlamaq, eyni zamanda, onların ümumbəşəri dəyərlərlə sintezindən, inteqrasiyasından bəhrələnmək və hər bir insanın inkişafının təmin olunması deməkdir. Müstəqil Azərbaycan dövlətinin əsas ideyası Azərbaycançılıqdır. Hər bir azərbaycanlı öz milli mənsubiyyətinə görə qürur hissi keçirməlidir və biz Azərbaycançılığı - Azərbaycan dilini, mədəniyyətini, milli-mənəvi dəyərlərini, adət-ənənələrini yaşatmalıyıq”.
Bir sözlə, Ulu öndər Heydər Əliyev tərəfindən əsası qoyulan Azərbaycançılıq ideologiyası dünya azərbaycanlılarını vahid ideya ətrafında birləşdirərək, uğurlu bir gələcəyə, onların daha sıx həmrəyliyinə, güclü və inkişaf etmiş Azərbaycan dövlətçiliyinə xidmət edir.
Elburus Edilov
Azərbaycan Respublikasının Prezidenti yanında Dövlət
İdarəçilik Akademiyasının I kurs magistr tələbəsi

Paylaş:

Baxılıb: 598 dəfə