Bakı Nəqliyyat Agentliyi paytaxtın nəqliyyat infrastrukturunda köklü dəyişikliklər edəcək

Bakı:

21 °C

62 %

11 m/s

Əlaqə

AZ RU EN

Ana səhifə / Sosial / Bakı Nəqliyyat Agentliyi paytaxtın nəqliyyat infrastrukturunda köklü dəyişikliklər edəcək

Bakı Nəqliyyat Agentliyi paytaxtın nəqliyyat infrastrukturunda köklü dəyişikliklər edəcək

22.12.2016 [09:50]

Bakı Nəqliyyat Agentliyi (BNA) fəaliyyətdə olduğu bir il ərzində paytaxtın nəqliyyat sahəsində idarəetmə sisteminin təkmilləşdirilməsi, sərnişinlər üçün beynəlxalq standartlara uyğun avtomobil nəqliyyatı xidmətinin təşkilinin genişləndirilməsi, avtomobil nəqliyyatı ilə sərnişin daşınması qaydalarına nəzarətin gücləndirilməsi, nəqliyyatın hərəkətinin tənzimlənməsi və bu sahədə islahatların davam etdirilməsi istiqamətində mühüm tədbirlər həyata keçirib. Bu fikri Prezident İlham Əliyevin imzaladığı müvafiq Sərəncamla yaradılmış BNA-nın baş direktoru Vüsal Kərimli ötən gün keçirdiyi mətbuat konfransında səsləndirib. Onun sözlərinə görə, ötən bir il ərzində ilk olaraq paytaxtın nəqliyyat sistemində mövcud vəziyyət təhlil edilib, həlli vacib məsələlər müəyyənləşdirilib. Ümumilikdə götürdükdə isə 2016-cı ili mövcud vəziyyətin təhlili və strateji fəaliyyət planının hazırlanması ili kimi də xarakterizə etmək olar. Belə ki, ötən dövr ərzində əsas diqqət bu sahədə mövcud olan pərakəndəliyin aradan qaldırılmasına yönəldilib. Bu məqsədlə “Bakı Nəqliyyat Planı”na uyğun olaraq paytaxtda 157 sayda mövcud marşrut xətti xarici mütəxəssislərlə birgə təhlil edilib, sərnişin həcmi dəqiqləşdirilərək hərəkət sxemləri müəyyənləşdirilib. Hazırda Bakı şəhərində sərnişindaşımada istifadə edilən avtobusların ümumi sayı 2100, marşrut xətlərinin müvəqqəti istismarını həyata keçirən daşıyıcıların sayı isə 58-dir.
Qeyd olunub ki, hazırda Bakı şəhərində müntəzəm sərnişindaşıma ilə məşğul olan 58 daşıyıcıdan yalnız 17-si maddi-texniki istehsalat bazasına malikdir ki, əksəriyyəti qoyulan tələblərə tam cavab vermir: “Bu gün, təəssüflər olsun ki, hələ də bir sıra marşrut avtobusları xəttə qarajlardan deyil, müxtəlif məhəllələrdən çıxırlar. Bu sahədə mövcud vəziyyətin normallaşdırılması istiqamətində 2017-ci ildə kompleks tədbirlər həyata keçiriləcəkdir. Marşrut xətlərinin müvəqqəti istismara verilməsi Nazirlər Kabinetinin müvafiq qərarına əsasən müsabiqə yolu ilə həyata keçiriləcək”.
V.Kərimli daha sonra qeyd edib ki, sərnişindaşıma sahəsində tətbiq edilən yeniliklərdən biri də ekspress xətt marşrutunun istifadəyə verilməsidir. Hazırda Bakı şəhərində 1 ekspress marşrut xətti fəaliyyət göstərir. Sərnişinlər bu marşrut xəttindəki ən müasir avtobuslarla Metronun “28 May” stansiyasından Hava limanına, eləcə də əks istiqamətdə çox rahat şəkildə gedib-gələ bilərlər. 2017-ci ildə ekspress xətt marşrutlarının sayının artırılması nəzərdə tutulub: “Ötən bir ildə ictimai nəqliyyatda vahid kart ödəniş sisteminə keçid, nəhayət ki, reallaşdırıldı. Bu gün Bakı şəhərində müntəzəm marşrutda 450 ədəd avtobusun nağdsız ödəniş - vahid kart sisteminə qoşulması təmin edilib. 2017-ci ildə paytaxtda fəaliyyət göstərən bütün marşrut avtobuslarında bu sistemin tətbiqi başa çatdırılacaq”.
Baş direktor daha sonra bildirib ki, hesabat dövründə taksi minik avtomobilləri ilə sərnişindaşıma xidmətlərinin səmərəliliyinin və keyfiyyətinin artırılması məqsədilə də müəyyən tədbirlər həyata keçirilib. Taksi fəaliyyəti göstərən 7215 hüquqi və fiziki şəxs barədə, həmçinin nəqliyyat vasitələrinin sayı, buraxılış ili və yerləşdiyi ünvan barədə məlumat bazası hazırlanıb. Təqribi hesablamalara əsasən, hazırda Bakı şəhərində 15-16 min taksi minik avtomobili fəaliyyət göstərir. Onun sözlərinə görə, bu sahədə aparılan işlər nəticəsində son bir ildə taksi sürücülərinin nəqliyyat müfəttişləri tərəfindən incidilməsi, onlara qarşı zor tətbiq edilməsi və dövlət rüsumundan kənar ödənişlərin tələb edilməsi halları tamamilə aradan qaldırılıb.
Paytaxtda yol hərəkətinin təşkili və təhlükəsizliyindən danışan natiq qeyd edib ki, bu məqsədlə görülən işlər çərçivəsində avtobus dayanacaq məntəqələri araşdırılıb, 1200-dən çox dayanacaq məntəqəsinin vəziyyəti öyrənilib. Bundan əlavə, piyada keçidləri araşdırılıb, ümumilikdə 413 ədəd piyada keçidinin normalara uyğun yerləşdirilmədiyi müəyyən edilib. Nəqliyyat sıxlığının aradan qaldırılması və piyadaların təhlükəsizliyinin təmin edilməsi məqsədi ilə hazırlanan təkliflər Nazirlər Kabinetinin Yol Hərəkətinin Təhlükəsizliyi Komissiyasına təqdim edilib.
Qeyd edilib ki, ticarət, ictimai iaşə və xidmət obyektlərinin qarşısında parklanmanın təşkili, məlumatların çatdırılması, o cümlədən yol nişanları quraşdırılması nəqliyyat sıxlığının yaranmasına səbəb olmaqla yanaşı, həm də hərəkətin təhlükəsizliyinin təmin edilməsinə imkan vermirdi. Bu kimi problemlərin aradan qaldırılması məqsədilə Agentliyin mütəxəssisləri tərəfindən mütəmadi olaraq Bakı şəhərinin inzibati ərazisində yollara baxış keçirilərək, müvafiq icazə olmadan quraşdırılmış yol nişanlarının çıxarılması təmin edilib.
Vüsal Kərimli çıxışının sonunda qarşıdan gələn 2017-ci ilin paytaxtın nəqliyyat infrastrukturunun təkmilləşdirilməsi, sərnişinlərə beynəlxalq standartlara cavab verən xidmətlərin təşkili, bir sözlə, bu sahədə köklü dəyişikliklər ili kimi də yaddaşlarda qalacağına əminliyini vurğulayıb.
Səlim LOĞMANOĞLU

Paylaş:

Baxılıb: 648 dəfə