Elektrik enerjisi və təbii qazın istifadəsində güzəşt limitinin artırılması ölkə ictimaiyyəti tərəfindən razılıqla qarşılanıb

Bakı:

19 °C

82 %

5 m/s

AZ RU EN

Ana səhifə / Sosial / Elektrik enerjisi və təbii qazın istifadəsində güzəşt limitinin artırılması ölkə ictimaiyyəti tərəfindən razılıqla qarşılanıb

Elektrik enerjisi və təbii qazın istifadəsində güzəşt limitinin artırılması ölkə ictimaiyyəti tərəfindən razılıqla qarşılanıb

24.12.2016 [11:08]

Məlum olduğu kimi, Azərbaycan Respublikası Tarif (qiymət) Şurasının 2016-cı il noyabrın 28-də keçirilmiş iclasında təbii qaz və elektrik enerjisi tariflərinə baxılıb və ölkədə aparılan sosialyönümlü siyasət nəzərə alınmaqla və əhalinin aztəminatlı təbəqəsinin sosial müdafiəsi məqsədilə diferensial tariflərin tətbiqi barədə qərar verilib. Lakin bir müddət sonra Azərbaycan Respublikasının Prezidenti İlham Əliyevin tapşırığına əsasən, əhalinin sosial müdafiəsinin daha da gücləndirilməsi və güzəştin şamil edildiyi əhali istehlakçılarının əhatə dairəsinin daha da genişləndirilməsi məqsədilə Tarif Şurasının iclasında əhali üçün tarifi dəyişməyən təbii qaz üçün təsdiqlənmiş illik istehlak həcmi 1500 kubmetrdən 1700 kubmetrə, aylıq elektrik enerjisinin istehlakının həcmi isə 250 kilovat-saatdan 300 kilovat-saata qaldırılıb. Bununla da son tarif tənzimlənməsindən sonra ödənişlərində artım olmayan əhali abonentlərinin sayı təbii qaz üzrə 62 faizdən 75 faizədək, elektrik enerjisi üzrə isə 72 faizdən 80 faizədək yüksəlmiş olur.
Göründüyü kimi, sosial xidmətlərə görə tarif siyasəti əhalinin potensial imkanları nəzərə alınmaqla vətəndaşların və dövlətin maraqlarının müdafiəsi prinsipi üzərində qurulub. Məhz Tarif Şurasının elektrik enerjisi və təbii qazla bağlı tarif tənzimlənməsi barədə sonuncu qərarında ölkədə aparılan sosialyönümlü siyasət nəzərə alınıb, optimal qiymətlərin tətbiqi məqsədəuyğun hesab olunub.
Bu isə bir daha hökumət tərəfindən qəbul edilən qərarların əsas motivində məhz əhalinin mənafeyinin, vətəndaşların sosial rifah halının yaxşılaşdırılmasının dayandığını göstərir.
Yeri gəlmişkən, Prezident İlham Əliyevin tapşırığına əsasən, əhalinin sosial müdafiəsinin daha da gücləndirilməsi və güzəştin şamil edildiyi əhali istehlakçılarının əhatə dairəsinin daha da genişləndirilməsi məqsədilə Tarif Şurasının iclasında təbii qaz və elektrik enerjisi istehlakının həcminin artırılması ölkəmizin vətəndaşları tərəfindən məmnunluqla qarşılanıb. Bu sırada cəbhə bölgəsində yaşayan sakinlər də yer alırlar. Məsələn, Ağdam rayon Qaradağlı kənd sakini Eyvaz Mirzəyev deyib: “Təbii qaz üçün illik istehlak həcminin 1500 kubmetrdən 1700 kubmetrə, aylıq elektrik enerjisi istehlakının həcminin isə 250 kilovat-saatdan 300 kilovat-saata qaldırılması əhalinin sosial müdafiəsi baxımından atılmış mühüm addımdır. Cəbhə kəndində yaşayan vətəndaş kimi bu qərara sevinirəm və Prezidentə çox sağ ol deyirəm”.
Rzalar kənd tam orta məktəbin müəllimi Aisə Abbasova Prezidentin tapşırığı ilə verilən bu qərardan razılığını bildirib. Qeyd edib ki, dövlətimizin başçısının tapşırığına əsasən təbii qaz və elektrik enerjisinin qiymətləri ilə bağlı Tarif Şurasının qərarının dəyişilməsi onu göstərir ki, Prezidentimizin həyata keçirdiyi siyasətin əsasında insan amili, vətəndaşların rifah halının yaxşılaşdırılması dayanır.
Evdar qadın Samirə Qurbanova isə fikirlərini belə ifadə edib: “Qaz və elektrik enerjisinin tariflərinə edilən dəyişiklik məni çox sevindirdi. Çünki bu dəyişiklik sayəsində ailə büdcəmizə zərər toxunmayacaq. Bunun üçün Prezidentimizə təşəkkür edirəm”.

Paylaş:

Baxılıb: 764 dəfə