Azərbaycan Memarlıq və İnşaat Universitetində IV İslam Həmrəyliyi Oyunlarının təbliğatı aparılıb

Bakı:

25 °C

52 %

2 m/s

Əlaqə

AZ RU EN

Ana səhifə / Sosial / Azərbaycan Memarlıq və İnşaat Universitetində IV İslam Həmrəyliyi Oyunlarının təbliğatı aparılıb

Azərbaycan Memarlıq və İnşaat Universitetində IV İslam Həmrəyliyi Oyunlarının təbliğatı aparılıb

14.04.2017 [09:21]

Azərbaycan Respublikasının Prezidenti yanında Bilik Fondu və “Bakı-2017” IV İslam Həmrəyliyi Oyunları Əməliyyat Komitəsi tərəfindən Oyunların mahiyyətinin ölkə ictimaiyyətinə daha ətraflı çatdırılması məqsədilə silsilə təbliğat-təşviqat tədbirləri həyata keçirilir. Belə tədbirlərdən biri də aprelin 13-də Azərbaycan Memarlıq və İnşaat Universitetində (AzMİU) təşkil edilib.
AzMİU-dan AZƏRTAC-a bildiriblər ki, tədbirdə Bilik Fondunun aparat rəhbəri İsaxan Vəliyev AzMİU-nun rektoru Gülçöhrə Məmmədova ilə IV İslam Həmrəyliyi Oyunları barədə görüşünü xatırladıb. Diqqətə çatdırılıb ki, rektor Oyunlarda fəaliyyət göstərəcək minlərlə könüllülər sırasında AzMİU-nun tələbələrinin yer almalarından məmnunluğunu bildirib.
IV İslam Həmrəyliyi Oyunlarının mahiyyətindən danışan İ.Vəliyev vurğulayıb ki, yarışlar təkcə İslam ölkələrinin deyil, başqa dinlərin, müxtəlif inancların, fərqli xalqların həmrəyliyinə də xidmət edir. Azərbaycan tolerant dəyərləri ilə dünyada nümunə ölkədir. Oyunlar ölkəmizə gələn qonaqlara multikultural dəyərlərimizi daha ətraflı təqdim etmək imkanı verir. Bu işdə könüllülərin fəaliyyətini xüsusi vurğulamaq lazımdır.
İ.Vəliyev gəncləri Azərbaycanın imicini yüksəkdə tutmağa, sülhün carçısı olduğumuzu nümayiş etdirmək üçün səylə çalışmağa, bu işdə Bilik Fondunun dəstəyinə güvənməyə çağırıb.
Azərbaycan Milli Olimpiya Komitəsinin beynəlxalq əlaqələr idarəsinin rəisi, IV İslam Həmrəyliyi Oyunları Təşkilat Komitəsinin katibi Könül Nurullayeva yarışların tarixindən söz açıb. Diqqətə çatdırılıb ki, tədbir təkcə Azərbaycanın deyil, İslam dünyası ölkələrinin, həmçinin başqa dinlərin nümayəndələrinin həmrəyliyinə, İslam dini ilə bağlı qərəzli yanaşmaların aradan qalxmasına təkan olacaq.
K.Nurullayeva yarışların proqramına daxil edilmiş idman növləri, idmançıların təmsil etdikləri ölkələr və “Bakı-2017” IV İslam Həmrəyliyi Oyunları Əməliyyat Komitəsinin iş prinsipi haqqında məlumat verib. Bildirilib ki, oyunlarda 57 İslam ölkəsindən idmançılar iştirak edəcəklər. Bu da tədbirdə bütün İslam ölkələrinin əhatə olunması deməkdir. Müsəlman ölkələrini təmsil edən üç mindən çox atlet 10 yarış günü ərzində idmanın 20 müxtəlif növü üzrə 23 kateqoriyada mübarizə aparacaq. Yarışlar 16 müasir idman qurğusunda keçiriləcək. O, aprelin 5-də paytaxtımızdakı Daş Salnamə Muzeyində “Bakı-2017” IV İslam Həmrəyliyi Oyunlarının Xəzərdən başlayan su səyahətinə start verildiyini xatırladıb. İslam Həmrəyliyi Oyunları ilə “Bakı-2015” birinci Avropa Oyunlarının maliyyə xərcləri arasında ümumi müqayisə aparan K.Nurullayeva diqqətə çatdırıb ki, bu yarışlara dəfələrlə az vəsait xərclənib. Belə ki, yarışlar “Bakı-2015” birinci Avropa Oyunları ərəfəsində tikilən idman obyektlərində keçiriləcək.
AzMİU-nun prorektoru Tofiq Qasımov “Bakı-2017” IV İslam Həmrəyliyi Oyunları ilə bağlı təbliğat-təşviqat xarakterli tədbirin bu universitetdə təşkilini yüksək dəyərləndirib.
Sonda “Bakı-2017” IV İslam Həmrəyliyi Oyunları Əməliyyat Komitəsi tərəfindən hazırlanan videoçarx nümayiş olunub.

Paylaş:

Baxılıb: 584 dəfə