Ankarada “Sağlamlıq jurnalistikası” mövzusunda təlim keçirilib

Bakı:

24 °C

70 %

13 m/s

Əlaqə

AZ RU EN

Ana səhifə / Sosial / Ankarada “Sağlamlıq jurnalistikası” mövzusunda təlim keçirilib

Ankarada “Sağlamlıq jurnalistikası” mövzusunda təlim keçirilib

23.08.2017 [10:03]

Türkiyənin Anadolu Agentliyinin, ISESCO-nun və İslam Əməkdaşlıq Təşkilatının (İƏT) İslam Ölkələrinin Statistik, İqtisadi və Sosial Tədqiqatlar və Təlim Mərkəzinin (SESRİC) birgə təşkilatçılığı ilə Ankarada “Sağlamlıq jurnalistikası” mövzusunda təlim keçirilib.
AZƏRTAC xəbər verir ki, 11 gün davam edən və Azərbaycandan, Türkiyədən, Yəməndən, Mərakeşdən, Qazaxıstandan, Albaniyadan, Səudiyyə Ərəbistanından, Liviyadan, Pakistandan və Somalidən jurnalistlərin iştirak etdikləri təlimin məqsədi İƏT-ə üzv ölkələr arasında əməkdaşlığı genişləndirmək, jurnalistlər şəbəkəsi yaratmaq idi.
Təlimdə jurnalistlərə səhiyyə sahəsində xəbər yazmağın, foto və video informasiyaları hazırlamağın qaydaları öyrədilib, bu sahədə mövcud problemlərdən danışılıb, həmin problemlərin həlli yolları müzakirə edilib. Təlim İƏT ölkələrindən olan mütəxəssislər, səhiyyə sahəsində tanınmış jurnalistlər, məşhur həkimlər, habelə Anadolu Agentliyinin bu sahədə ixtisaslaşmış jurnalistləri tərəfindən aparılıb. Təlim çərçivəsində jurnalistlər, həmçinin Türkiyə Radio Televiziya Qurumunda (TRT), Anadolu Agentliyində, Ankara Atatürk Təhsil və Araşdırma Xəstəxanasında, Sağlamlığın İnkişafi Təşkilatında və Dünya Səhiyyə Təşkilatının Türkiyə ofisində olublar.
Anadolu Agentliyində jurnalistlər agentliyin beynəlxalq əlaqələri, müharibə və münaqişə zonalarında müxbirlərin fəaliyyətləri ilə tanış olublar. Agentliyin insan resursları və inzibati məsələlər şöbəsinin icraçı direktoru Mücahid Məhəmməd Soykan təlim iştirakçılarına qurumun prinsipləri və gələcək layihələr barədə ətraflı məlumat verib.
Təlimin bağlanış mərasimində çıxış edən Anadolu Agentliyinin baş direktorunun müavini, baş redaktor Metin Mutanoğlu bildirib ki, bu proqram agentlik ilə SESRIC-in ilk birgə layihəsidir. O qeyd edib ki, təlimin keçirilməsində məqsəd İƏT ölkələrinin media nümayəndələri üçün təcrübə mübadiləsi aparmağa imkan yaratmaq və səhiyyə sahəsində ixtisaslı jurnalistlər hazırlamaqdır. Metin Mutanoğlu, həmçinin təmsil etdiyi agentliyin tarixi, təcrübəsi və gələcək layihələri barədə jurnalistlərə ətraflı məlumat verib. “Biz Anadolu Agentliyinin bütün imkanlarından istifadə edərək İslam dünyasının jurnalistlərinin təkmilləşdirilməsi üçün əlimizdən gələni edəcəyik”, - deyə M.Mutanoğlu vurğulayıb.
SESRIC-in baş direktoru Musa Kulaklıkaya çıxış edərək İƏT ölkələrində sağlamlığın mövcud vəziyyəti barədə məlumat verib. O, əminliyini ifadə edərək bildirib ki, təlimdə iştirak etmiş jurnalistlər insanların sağlamlığının qorunmasında, səhiyyə sisteminin təkmilləşdirilməsində mühüm rol oynayacaqlar.
Sonda təlim iştirakçılarına sertifikatlar təqdim olunub.

Paylaş:

Baxılıb: 598 dəfə