İstanbuldakı beynəlxalq konfransda Azərbaycanda gənclərlə bağlı qəbul olunan dövlət proqramlarından danışılıb

Bakı:

18 °C

88 %

4 m/s

AZ RU EN

Ana səhifə / Sosial / İstanbuldakı beynəlxalq konfransda Azərbaycanda gənclərlə bağlı qəbul olunan dövlət proqramlarından danışılıb

İstanbuldakı beynəlxalq konfransda Azərbaycanda gənclərlə bağlı qəbul olunan dövlət proqramlarından danışılıb

28.09.2017 [10:21]

Sentyabrın 26-da İstanbulda İslam Əməkdaşlıq Təşkilatının İslam Konfransı Dialoq və Əməkdaşlıq Gənclər Forumunun “Müsəlman gənclərin vəziyyəti” mövzusunda beynəlxalq konfransı keçirilib. Azərbaycanı bu konfransda gənclər və idman naziri Azad Rəhimovun rəhbərlik etdiyi nümayəndə heyəti təmsil edib.
Gənclər və İdman Nazirliyinin mətbuat xidmətindən AZƏRTAC-a bildiriblər ki, müsəlman gənclərin qarşılaşdıqları əsas problemlərin həlli üçün gənclər sahəsində fəaliyyət göstərən dövlət orqanlarına, ictimai təşkilatlara istiqamət verib, vasitələr tapmaq konfransın əsas müzakirə mövzularından olub. Müsəlman gənclərin qarşılaşdıqları problemlərin həlli yolunda onlar arasında əlaqələndirmənin gücləndirilməsinə diqqət yetirilməsi də beynəlxalq konfransda müzakirə edilib.
Gənclər və idman naziri Azad Rəhimov konfransda çıxış edərək dövlətimizin gənclərin üzləşdiyi problemlərin həlli yolları üzərində daim işləməsi ilə yanaşı, eyni zamanda, onların əvvəlcədən qarşısının alınması istiqamətində də çalışdığını bildirib.
A.Rəhimov Azərbaycanın 1991-ci ildə müstəqilliyini bərpa etdiyi dövrdə siyasi və iqtisadi sahələrdə bir sıra çətinliklər yaşaması, Ermənistanın torpaqlarımıza təcavüzü nəticəsində ərazilərimizin 20 faizinin işğalı, bir milyondan çox insanın öz doğma torpaqlarından qaçqın və məcburi köçkün vəziyyətinə düşməsi, çoxlu sayda gəncin həyatını, eyni zamanda, dövlətin inkişafına və sabahına olan inamını itirməsi barədə danışıb. Nazir 1994-cü ildə Ulu öndər Heydər Əliyevin Sərəncamı ilə Gənclər və İdman Nazirliyinin yaradılması və ötən müddətdə ölkəmizdə gənclərin inkişafı istiqamətində dövlət proqramlarının imzalanması, “2015-2025-ci illərdə Azərbaycan gənclərinin İnkişaf Strategiyası”, ideya və təkliflərin bir yerə toplandığı forumların keçirilməsi və digər mühüm əhəmiyyət kəsb edən mövzular haqqında məlumat verib. A.Rəhimov deyib ki, imzalanan bütün dövlət proqramları gənclər siyasətinin inkişafı ilə yanaşı, hər bir gəncin bir fərd olaraq inkişafına yönəlib. Çünki gəncliyin inkişafı ölkənin inkişafı deməkdir. Bu fikir Prezident İlham Əliyevin “Neft kapitalını insan kapitalına çevirmək” ideyasını özündə tərənnüm edir.
İstanbula səfəri çərçivəsində nazir A.Rəhimov İslam Ölkələri üçün Statistik, İqtisadi və Sosial Araşdırma və Təlim Mərkəzinin icraçı direktoru Musa Kulaklıkaya, Qətərin mədəniyyət və idman naziri Salah bin Ghanim Al Ali, Türkiyənin gənclər və idman naziri Osman Aşkin Bak, Fələstinin gənclər və idman üzrə yüksək müşaviri Jibril Rajoub və başqaları ilə görüşlər keçirib.
Nazir, həmçinin Türkiyənin “TRT” və “Kanal 24” kanallarına müsahibə verib.

Paylaş:

Baxılıb: 483 dəfə