MİDA: “Ernst & Young” güzəştli mənzillərin ilk satışının şəffaf keçdiyini təsdiqləyib

Bakı:

31 °C

41 %

3 m/s

Əlaqə

AZ RU EN

Ana səhifə / Sosial / MİDA: “Ernst & Young” güzəştli mənzillərin ilk satışının şəffaf keçdiyini təsdiqləyib

MİDA: “Ernst & Young” güzəştli mənzillərin ilk satışının şəffaf keçdiyini təsdiqləyib

09.02.2019 [10:33]

Beynəlxalq audit şirkəti “Ernst & Young” (“EY”) güzəştli mənzillərin ikinci seçim prosesinin şəffaf keçdiyini təsdiq edib.
Bu barədə AZƏRTAC-a Mənzil İnşaatı Dövlət Agentliyindən (MİDA) bildirilib.
Qeyd olunur ki, bu il yanvarın 25-də Mənzil İnşaatı Dövlət Agentliyinin ilk layihəsi olan Yasamal Yaşayış Kompleksinin 1-5 saylı binaları üzrə 46 mənzil, həmçinin 6 və 7 saylı binalarında yerləşən 128 mənzilin seçimi “Elektron hökumət” portalı (www.e-gov.az) üzərindən “Güzəştli mənzil” sistemi vasitəsilə bərabər şəraitdə etibarlı, təhlükəsiz, şəffaf və fasiləsiz iş rejimində həyata keçirilib.
“Güzəştli mənzil” sistemi “SOC 2” və “SOC 3” rəylərinə uyğun olaraq müstəqil beynəlxalq audit şirkəti “Ernst & Young” tərəfindən öncədən tam nəzarətə götürülüb və sistem üzərində davamlı olaraq müşahidə aparılıb. Bununla yanaşı, sistemin əlaqəli fəaliyyətini təmin etmək məqsədilə MİDA-nın inzibati binasında agentliyin, Nəqliyyat, Rabitə və Yüksək Texnologiyalar Nazirliyinin, nazirliyin Milli Sertifikat Xidmətləri Mərkəzinin və Regional Data Mərkəzinin, Xüsusi Dövlət Mühafizə Xidmətinin Xüsusi Rabitə və İnformasiya Təhlükəsizliyi Dövlət Agentliyinin, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “Elektron Hökumətin İnkişafı Mərkəzi”nin nümayəndələrindən ibarət operativ qərargah yaradılıb. Eyni zamanda, aidiyyəti qurumların məsul şəxslərindən ibarət xüsusi işçi qrup MİDA-ya və “108” Çağrı mərkəzinə daxil olan vətəndaş müraciətlərini operativ şəkildə cavablandırıb.
Seçim prosesi başa çatdıqdan sonra “Ernst & Young” şirkəti sistemdə aparılmış bütün əməliyyatları hərtərəfli təhlil etdikdən sonra fevralın 7-də “Güzəştli mənzil” sisteminin fəaliyyətinə və keçirilmiş onlayn mənzil seçimi prosesinə öz müsbət rəyini təqdim edib. Bu rəyə əsasən, mənzillərin seçimi zamanı təhlükəsizlik, konfidensiallıq, proseslərin bütövlüyü (tam, etibarlı və dəqiq), əlçatanlıq və fərdi məlumatların qorunması (“Trust Services”, Güvənli xidmət” meyarları) kimi qabaqcıl beynəlxalq standartlara və “Güzəştli mənzil” sisteminin Əsasnaməsində qeyd edilən məqsəd və prinsiplərə (mənzilləri güzəştlə almaq istəyən şəxslər üçün mənzil seçimi prosesində bərabər şəraitin yaradılması, müraciətlərə baxılma zamanı şəffaflığın və operativliyin təmin edilməsi və istifadəçilərin müraciətlərinin real vaxt rejimində qeydə alınması) əməl olunması təsdiq olunub.
Xatırladaq ki, Yasamal Yaşayış Kompleksində satışa çıxarılan 174 mənzili seçmiş vətəndaşlardan 16-sı mənzili öz vəsaiti, 158-i isə güzəştli ipoteka krediti hesabına mənzilləri əldə etmək niyyətindədir. Seçim edən şəxslər arasında yaşı 35-dən çox olmayan gənc ailə üzvləri kateqoriyaları 41 faiz, yaşından və ailə vəziyyətindən asılı olmayan digər şəxslər kateqoriyaları isə 59 faiz təşkil edir.

Paylaş:

Baxılıb: 619 dəfə