Masallıda Xalq yazıçısı Elmira Axundovanın yeni kitablarının təqdimatı keçirilib

Bakı:

24 °C

47 %

3 m/s

Əlaqə

AZ RU EN

Ana səhifə / Sosial / Masallıda Xalq yazıçısı Elmira Axundovanın yeni kitablarının təqdimatı keçirilib

Masallıda Xalq yazıçısı Elmira Axundovanın yeni kitablarının təqdimatı keçirilib

13.02.2019 [09:50]

Masallı şəhərindəki Heydər Əliyev Mərkəzində Milli Məclisin deputatı, görkəmli publisist, “Şöhrət” ordenli Xalq yazıçısı Elmira Axundovanın “Bizim tanıdığımız Elmira...” (rus dilində) və “Həmkarlarımla üz-üzə” kitablarının təqdimatı keçirilib.
AZƏRTAC-ın bölgə müxbiri xəbər verir ki, tədbir iştirakçıları əvvəlcə Mərkəzin foyesində Elmira Axundovanın kitablarının sərgisi ilə tanış olub, onun jurnalistlik fəaliyyətinin müəyyən məqamlarını və yaradıcılığını əks etdirən videoçarxa baxıblar.
CBC nəşriyyatında çap olunmuş “Bizim tanıdığımız Elmira...” adlı kitabda Xalq yazıçısının yaradıcılığına həsr edilmiş məqalə və esselər toplanıb. Burada son 15 ildə mətbuatda Elmira Axundova haqqında dərc edilmiş ən maraqlı materiallar yer alır. “Həmkarlarımla üz-üzə” kitabı isə yazıçı-publisistin müxtəlif mətbu və elektron KİV-lərə verdiyi müsahibələrdən ibarətdir. Müəllif həmin müsahibələrdə jurnalist həmkarları ilə müxtəlif mövzularda - uşaqlıq illəri, ailəsi, valideynləri, ilk məhəbbət, maraqlı və gözlənilməzliklərlə dolu həyatının müxtəlif epizodları barədə səmimi söhbət açıb.
Elmira Axundovanın yeni kitablarının təqdimat mərasimində çıxış edən Masallı rayon İcra Hakimiyyətinin başçısı Rafil Hüseynov rayon sakinləri adından görkəmli yazıçı-publisisti yüksək fəxri ada - Xalq yazıçısı adına layiq görülməsi və yazdığı monumental kitabların işıq üzü görməsi münasibətilə təbrik edərək, ona xoş arzularını bildirib. Qeyd edib ki, həmyerliləri onun yaradıcılığını diqqətlə izləyirlər. Xüsusən Ümummilli lider Heydər Əliyev haqqında yazdığı kitablar böyük maraqla oxunur.
Mərasimdə çıxış edən Masallı rayon Ağsaqqallar Şurasının sədri Ələşrəf Niftiyev, Prezident təqaüdçüsü, “Tərəqqi” medallı Şirvan Əbilov, Əməkdar incəsənət xadimi, Prezident təqaüdçüsü, “Şöhrət” ordenli yazıçı-dramaturq Natiq Rəsulzadə, Masallının “Yeni həyat” qəzetinin əməkdaşı Akif Ağayev, “Regional hüquqi və iqtisadi maarifləndirmə” İctimai Birliyinin sədri Arzu Bağırova və başqaları Elmira Axundovanın yeni kitablarının məziyyətlərindən danışıb, ona yeni yaradıcılıq uğurları arzulayıblar. Qeyd olunub ki, o, yüksək peşəkarlığı və fəal vətəndaş mövqeyi ilə seçilən yazıçı-publisistdir.
Xalq yazıçısı Elmira Axundova tədbirin təşkilatçılarına və onun ünvanına səsləndirilmiş xoş sözlərə görə minnətdarlığını ifadə edərək deyib: “Mən çox xoşbəxt insanam. Tale elə gətirib ki, Azərbaycanın tanınmış simaları ilə dostluq etmişəm. Ötən əsrin 90-cı illərində dünya şöhrətli siyasi xadim, böyük şəxsiyyət Heydər Əliyevlə ünsiyyətdə olmaq, Ondan müsahibələr almaq mənə də nəsib olub. Öz Vətənimi həyatımdan da çox sevirəm. Mənə uğur gətirən bəlkə də budur”.
Yaradıcılıq prosesində insanların ona həmişə dəstək olduğunu qeyd edən Elmira Axundova Qarabağ haqqında da monumental kitab yazmaq istəyini dilə gətirib.
Sonda rayonun incəsənət ustaları konsert proqramı ilə çıxış ediblər.

Paylaş:

Baxılıb: 517 dəfə